Read Imbabura Highland Quichua LEVÍTICO 15 Bible Online

LEVÍTICO 15 - Imbabura Highland Quichua bible

LEVÍTICO 15

¹Mandaj Diosca Moisestapash, Aarondapash cashnami nijurca:

²“Israelcunaman, cashna nishpa villaichi: ‘Maijan jaripash, yuraj yacu shamujuj cashpaca, mapami canga.

³Chai yuraj yacu shamujuj runaca, cashna cashpami mapa canga: Pai charishca aichamanda yuraj yacu shamujushpa, na cashpaca chai yacu llujshina jarcarishpapash, mapami canga.

⁴Yuraj yacu shamujuj runapaca, pai siririshca maijan camapash mapami canga. Shinallata imapi pai tiarijpipash, chaicunapash mapami canga.

⁵Maijambash chai camapi tacarishpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

⁶Yuraj yacu shamujuj runa tiarishca tiarinapi maijambash tiarishpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

⁷Shinallata yuraj yacu shamujuj runapi maijambash tacarishpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

⁸Yuraj yacu shamujuj runa, na mapayashca shuj runapi t'ucajpica, t'ucai tucushca chai runaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

⁹Yuraj yacu shamujuj runa maijan animalpi imata churashpa tiarishcapash, mapami canga.

¹⁰Shina ungushca runa imapi tiarishcacunapi maijambash tacarishpaca, tutayangacamanmi mapa canga. Shinallata chai ungushca runa tacarishcacunata maijambash apashpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

¹¹Yuraj yacu shamujuj runa paipaj maquita nara maillashpallata maijambipash tacarijpica, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

¹²Yuraj yacu shamujuj runa, alpa mangata tacarijpica, chai mangataca faquichun. Caspi mangacunapi tacarijpica, chaicunataca maillachun.

¹³Yuraj yacu shamujuj runa, chai yuraj yacu shamujushcamanda mapa illaj tucushpaca, chai mapa illaj tucushca punllamandaca, canchis punllata cuentachun. Chai jipaca, pai churajushcacunatapash tajshachun. Paipash, canchis punlla tucungacaman ninanda rijuj yacuhuan armachun. Shina rurashpami, mapa illaj tucunga.

¹⁴Pusaj punllapica, ishcai urpita, na cashpaca ishcai palomata japishpami, Mandaj Diospaj ñaupajman, Dioshuan tuparina jatun carpa punguman apamunga. Shina apamushpami, curaman cunga.

¹⁵Chai animalcunataca curami shujtaca, juchamanda Diosman cunga. Shujtaca, Diosman cushpami tucuillata rupachijunga. Yuraj yacu shamujuj runataca curami, Mandaj Diospaj ñaupajpi ima mapapash illajta ruranga.

¹⁶Maijan jaripaj cashpapash, yuraj yacu yangata llujshijpica, paipash yacuhuan armachun. Shina rurashpapash paica, tutayangacamanmi mapa canga.

¹⁷Maijambajpash yuraj yacu shamujushpa churajunapi cashpa, na cashpaca carpapi cashpapash shutujpica, chaicunataca tajshachun. Shina rurashpapash paica, tutayangacamanmi mapa canga.

¹⁸Shuj runa, shuj huarmihuan chayarishpa yuraj yacu shamujpica, ishcandimi yacuhuan armanga. Shina rurashpapash paicunaca, tutayangacamanmi mapa canga.

¹⁹Maijan huarmi cashpapash, quilla nanaihuan ungushca cashpaca, chai huarmica canchis punllacamanmi shicanyashpa shuyanga. Chai huarmita maijambash tacarishpaca, tutayangacamanmi mapa canga.

²⁰Shina anchurishpa shuyajushpa, imapipapash chai huarmi siririshca cajpica, tucui chaicunaca mapami canga. Shinallata tucui imapi pai tiarishcacunapash, mapami canga.

²¹Chai huarmipaj camapi maijambash tacarishpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

²²Shinallata chai huarmi tiarishcapi maijambash tacarishpaca, pai churajushcacunata tajshachun. Shinallata paipash armachun. Shina rurashpapash paica, tutayangacamanmi mapa canga.

²³Chai huarmi puñushca camapi, na cashpaca chai huarmi tiarishca jahuapi tacarishpaca, tutayangacamanmi mapa canga.

²⁴Shina ungushca huarmihuan maijambash puñushpa, chai huarmipaj quilla nanai shamuj yahuarpash chai runata mapayachijpica, chai runaca canchis punllacamanmi mapa canga. Shinallata paicuna puñushca camapash, mapami canga.

²⁵Maijan huarmita cashpapash, quilla nanaihuan ungushca cajpi yahuar shamuna punllacunatapash ashtahuan yalishpami, yahuar shamujunga. Shina shamujupica, quilla nanaihuan canashnallatami, yahuar shamujui tucui chai punllacunapica mapa canga.

²⁶Yahuar shamujui tucui chai punllacunapi puñushca tucui camacunaca, quilla nanaihuan ungushca cajpi mapa canashnallatami, mapa canga. Shinallata ima tiarinacunapi tiarishcacunapash, quilla nanaihuan ungushca cajpi, mapa canashnashnallatami mapa canga.

²⁷Shina mapayashcacunapi maijambash tacarishpaca, mapami canga. Chaimandami, pai churajushcacunata tajshanga. Shinallata paipashmi armanga. Shina rurashpapash paica, tutayangacamanmi mapa canga.

²⁸Yahuar shamujujmanda ali tucushca jipaca, canchis punllata cuentachun. Chai jipami, ima mapapash illaj canga.

²⁹Pusaj punllapica, ishcai urpita, na cashpaca ishcai palomatami, Dioshuan tuparina jatun carpaman yaicuna punguman, curapajman apamunga.

³⁰Chai animalcunataca, curami shujtaca, juchamanda Diosman cunga. Shujtaca Diosman cushpami, tucuillata rupachinga. Yahuar shamujuj chai huarmitaca curami, Mandaj Diospaj ñaupajpi mapa illaj cachun ruranga.

³¹Chashna rurashpami israelcunataca, mapamanda shicanyachinguichi. Ñucahuan tuparina jatun carpata mapayachishcamanda, paicuna mapa cashpa ama huañuchunmi, chashna rurana canguichi’ nishpa villaichi” nijurcami.

³²Yuraj yacu shamujuj runapajpash, yuraj yacu yangata llujshijujpi mapayashca runapajpash, cai mandashcacunami.

³³Shinallata quilla nanaihuan ungushca huarmipaj cashpa, yuraj yacu shamujuj jaripaj cashpa, yahuar shamujuj huarmipaj cashpa, yahuar shamujushpa mapayashca huarmihuan puñushca jaripaj cashpapash, chai tucuicunapajmi cai mandashcacunaca.