Read Imbabura Highland Quichua LEVÍTICO 18 Bible Online

LEVÍTICO 18 - Imbabura Highland Quichua bible

LEVÍTICO 18

¹Mandaj Diosca, Moisestaca cashnami nijurca:

²“Israelcunaman, cashna nishpa villai: ‘Ñucami, cangunata Mandaj Taita Dios cani.

³Canguna causanajushca Egipto llactapi causajcunashnaca, na ruranachu canguichi. Maimanmi cangunata ñuca pushajuni, chai Canaán llactapi causajcunashnapash, na ruranachu canguichi. Paicuna pactachinajuj shimicunata catishpapash, na causanachu canguichi.

⁴Ñuca mandashcacunatami, rurashpa causana canguichi. Pactachinajuchun ñuca cushca shimicunata pactachishpami, chaicunata cazushpa causana canguichi. Ñucami, cangunata Mandaj Taita Dios cani.

⁵Chaimandami, pactachinajuchun ñuca cushca shimicunata, ñuca mandashcacunata pactachishpa causana canguichi. Chaicunata pactachishpami, runaca causanga. Ñucami, Mandaj Dios cani.

⁶Maijan jaripash, na paipaj ladolla maijan familia purapipash chayangachu. Paipaj familia purapaj lluchullataca, na ricungachu. Ñucami, Mandaj Dios cani.

⁷Cambaj taitapaj lluchullatapash, cambaj mamapaj lluchullatapash na ricunachu cangui. Cambaj mama cashcamanda, paipaj lluchullataca na ricunachu cangui.

⁸Cambaj taitapaj huarmipaj lluchullataca, na ricunachu cangui. Cambaj taitapaj luchulla cajpimi, na ricuna cangui.

⁹Cambaj panipaj lluchullataca, cambaj taitapajlla ushi cajpi, na cashpaca cambaj mamapajlla ushi cajpipash, na ricunachu cangui. Huasipi huacharishca cajpi, na cashpaca maipipash huacharishca cajpipash, paipaj lluchullataca na ricunachu cangui.

¹⁰Cambaj churipaj ushi cajpipash, na cashpaca cambaj ushipaj ushi cajpipash, paipaj lluchullataca na ricunachu cangui. Cambaj aichallata cajpimi, na ricuna cangui.

¹¹Cambaj taitapaj jipa huarmipaj ushi cajpipash, paipaj lluchullataca na ricunachu cangui. Paica, cambaj taitapaj ushi cashcamanda, cambaj panillatami. Chaimandami paipaj lluchullataca, na ricuna cangui.

¹²Cambaj taitapaj panipaj lluchullatapash, na ricunachu cangui. Paica, cambaj taitapaj familia cajpimi, na ricuna cangui.

¹³Cambaj mamapaj ñañapaj lluchullatapash, na ricuna cangui. Paica, cambaj mamapaj familia cajpimi, na ricuna cangui.

¹⁴Cambaj taitapaj huauquipaj lluchullatapash, na ricunachu cangui. Paica, cambaj taitapaj huauquipaj huarmimi.

¹⁵Cambaj jachumbaj lluchullatapash, na ricunachu cangui. Paica, cambaj churipaj huarmi cajpimi, paipaj lluchullataca na ricunachu cangui.

¹⁶Cambaj huauquipaj huarmipaj lluchullatapash, na ricunachu cangui. Cambaj huauquipaj lluchulla cajpimi, na ricuna cangui.

¹⁷Mamapaj lluchullatapash, ushipaj lluchullatapash na ricunachu cangui. Chai huarmipaj churipaj ushihuan cashpapash, chai huarmipaj ushipaj ushihuan cashpapash, paipaj lluchullata ricungapaj na cazaranachu cangui. Paicunaca, quiquin familia cashcamanda, chaita ruranaca nalipachami.

¹⁸Cambaj huarmi cachunga, paipaj ñañandica na japinachu cangui. Cambaj huarmi causajujpillata, paipaj ñañapaj lluchullata ricushpaca, paicuna puratami jatun fiñajuipi churangui.

¹⁹Quilla nanaihuan ungushca mapa cajpita, chai huarmipaj lluchullata ricungapaj na tacarinachu cangui.

²⁰Shinallata cambaj cumba runagupaj huarmihuanga, na chayarinachu cangui. Paihuan puñushpaca, mapami tucungui.

²¹Cambaj jari huahuataca, Moloc shuti diosman cushpa, na rupachinachu cangui. Chai diosman carashpaca, cambaj Taita Diospaj shutitami mapayachingui. Ñucami, Mandaj Dios cani.

²²Maijan jarihuambash, huarmihuanshnaca na puñunachu cangui. Chaica jatun millanayaimi.

²³Maijan animalhuambash, na puñushpa na mapayanachu cangui. Shinallata maijan huarmipash, ima animalhuambash na puñunachu. Chaica jatun nalipachami.

²⁴Caipi nishca nalicunahuanga, maijanhuanllapash na mapayanachu canguichi. Cai tucui jatun nalicunahuanmi, cangunapaj ñaupajmanda ñuca llujchishpa cachana llactapi causajcunapash chashna mapayanajurca.

²⁵Shinamandami, chai llactaca mapayarca. Paicuna chashna jatun nalita ruranajujtaca, ñucami ricuj shamurcani. Chai llactaca, chaipi causajcunataca shungu tigrachinshnami shitarca.

²⁶Cangunaca, pactachinajuchun ñuca cushca shimicunata, mandashcacunataca pactachinami canguichi. Cangunaca, llactapillata huacharishca cashpapash, shuj llactamanda shamushpa cangunahuan causajushpapash, chashna millanayaicunatara maijandallapash na ruranachu canguichi.

²⁷(Cai tucui millanayaicunataca, canguna nara chayamujpillata, chai llactapi causanajushca runacunami chashna ruranajurca. Shinamandami, chai llactaca mapayarca).

²⁸Chai llactata mapayachijpira, cangunatapash shungu tigrachinshna llujchishpa cachanman. Canguna nara chayamujpillata causanajushca gentecunata shungu tigrachishpa shitashcanshna tucuchinman.

²⁹Maijan cashpapash tucui cai millanayaicunata maijandapash rurangapashchari. Maijambash chashna rurashpaca, paipaj gente puramanda anchuchi tucungami.

³⁰Shina cashcamanda, ñuca mandashcata pactachishpa causanguichi. Canguna nara chayamujpi, chai llactapi causajcuna millanayaicunata ruranata yachashcashnaca, na ruranachu canguichi. Na chaicunahuan mapayanachu canguichi. Ñucami, cangunata Mandaj Taita Dios cani’ nishpa villai” nijurcami.