Read Imbabura Highland Quichua LEVÍTICO 2 Bible Online

LEVÍTICO 2 - Imbabura Highland Quichua bible

LEVÍTICO 2

¹Mandaj Diosman granota cushpa rupachingapaj maijambash apamushpaca, ashtahuan ali jacutami apamunga. Chai jacupica, aceiteta talishpa, inciensota churashpami apamunga.

²Chaitaca, Aaronbaj churi curacunapajmanmi apamunga. Chai apamushcacunataca shuj curami, shuj maqui junda ashtahuan ali jacuta japinga. Shinallata aceitetapash, tucuilla inciensotapashmi japinga. Chaitaca yarichina cachunmi, altarpi churashpa rupachinga. Shina cushpa rupachijujpimi, Mandaj Diospaca mishquillagu ashnajunga.

³Diosman cushpa rupachishcamanda puchushcacunaca, Aaronbaj, paipaj churicunapajmi canga. Mandaj Diosman cushpa rupachishcacunaca, paipajlla shicanyachishcami.

⁴Jornopi cusashcata Diosman cungapaj apamushpaca, ashtahuan ali jacuta aceitehuan chapushpa, levadura illaj mishqui tandata rurashpa apamungui. Tortillacunatapash, levadura illajta rurashpa, aceiteta javishpa apamungui.

⁵Ashtahuangarin sartenbi cusashcata Diosman cungapaj apamushpaca, ashtahuan ali jacuta aceitehuan chapushpa, levadura illajta rurashcata apamungui.

⁶Chaitaca, asha asha chaupishpa, chai jahuapi aceiteta talingui. Chaica, Diosman carashcami canga.

⁷Uchilla pailapi yanushcata Diosman cungapaj apamushpaca, ashtahuan ali jacuta aceitehuan chapushpa apamungui.

⁸Chaicunata chashna aliguta alichishcata, Mandaj Diosman cungapaj apamushpaca, curaman cungui. Chaitaca, curami altarman apamunga.

⁹Chai carashcataca curami, yarichina cachun ashata japishpa, altarpi rupachijunga. Shina cushpa rupachijujpimi, Mandaj Diospaca mishquillagu ashnajunga.

¹⁰Diosman cushpa rupachishcamanda puchushcacunaca, Aaronbaj, paipaj churicunapajmi canga. Mandaj Diosman cushpa rupachishcacunaca, paipajlla shicanyachishcami.

¹¹Imata cashpapash Mandaj Diosman cunaca, levadura illajmi canga. Levadurahuan chapushcata, balun mishquihuan chapushcata, Mandaj Diosman cushpa rupachijuchunga, napacha cunachu canguichi.

¹²Chaicunataca, chagrapi punda fucushca granocunatashnami, Mandaj Diosman cuna canguichi. Ashtahuangarin altarman vichai apashpa rupachijujpi mishquillagu ashnajuchunga, na cunachu canguichi.

¹³Tucui imata Diosman carashpapash, cachihuan javingui. Can imatalla caranapica, cambaj Taita Dioshuan ari ninajushcata ricuchij cachica, ima horallapash napacha illanachu. Tucui imatalla can caranapimi, cachitaca churana cangui.

¹⁴Chagrapi punda fucushca granocunata, Mandaj Diosman apamushpaca, verde espigataca camllashpa, granocunataca cutashpa paiman cungui.

¹⁵Chai jacupica, aceitetapash, inciensotapash churashpa cungui. Chaica, Diosman carashcami canga.

¹⁶Chai carashcataca curami, chai caraj runata Dios yarichun rupachinga. Grano cutashcamanda shuj ashatapash, aceitetapash, tucuilla inciensotapashmi rupachinga. Chaica, Mandaj Diosman cushpa rupachishcami canga.