Read Imbabura Highland Quichua LEVÍTICO 21 Bible Online

LEVÍTICO 21 - Imbabura Highland Quichua bible

LEVÍTICO 21

¹Mandaj Diosca, Moisestaca cashnami nirca: “Aaronbaj churicunaman, cashna nishpa villai: ‘Canguna purapi maijambash huañujpi, chai huañushcapi tacarishpa na mapayanachu canguichi.

²Ashtahuangarin paipaj ladolla familia, na cashpaca paipaj mama, na cashpaca paipaj taita, na cashpaca paipaj churi, na cashpaca paipaj huauqui huañujpica mapayachunlla.

³Na cashpaca cusata nara charij, jarihuan nara tacarishca paipaj panimi, paipaj huasipi causanga. Chai pani huañujpica, mapayachunlla.

⁴Paipaj llactapi causajuj maijan runashnapash mapayashnaca, na mapayanachu.

⁵Curacunaca, uma corona ajchatapash na rutuchingachu, barbas pundatapash na ruturingachu. Paipaj cuerpotapash, na aspirishpa chugrichingachu.

⁶Paicunaca, Taita Diospajlla shicanyachishcami canga. Taita Diospaj shutitapash, na yangapi churangachu. Curacunaca, Mandaj Diosman imagutapash carashcata rupachishpa, Taita Diosman carashca tandata cushpami causanajunga. Shinamandami, Diospajlla shicanyachishcacuna canga.

⁷Culquimanda huainayaj huarmihuambash, na cashpaca shuj runahuan ña tacarishca huarmihuambash na cazarangachu. Shinallata cusa jichushca huarmihuambash, na cazarangachu. Curacunaca, Taita Diospajlla shicanyachishcacuna cashpami, na chashna ruranga.

⁸Curacunataca, Taita Diosman carashca tandata Diosman cunajuj cashcamanda, Diospajlla cachun shicanyachingui. Ñucaca, jucha illaj causachun, cangunata shicanyachij Mandaj Dios cajpimi, cangunapaj ñaupajpica curacunapash jucha illaj canga.

⁹Shuj curapaj ushi, jaricunahuanlla causai callarishpaca, paipaj taita alicachi tucushcatami huaglichin. Chaimandami, chai ushica rupachi tucunga.

¹⁰Paipaj huauqui cura puracunapi mandaj curataca, talishpa javina aceiteta, paipaj umapi talishpami javishca. Shinallata Diospajta rurangapaj churajunata churajuchunmi shicanyachishca. Shina cashcamanda paica, paipaj umapi churajushcatapash na llujchingachu, pai churajushcacunatapash na liquingachu.

¹¹Huañushca sirijuj ucumambash, na yaicungachu. Paipaj taitapacha, mamapacha huañujpipash na mapayangachu.

¹²Diospajlla huasimandapash, na llujshingachu. Paipaj Taita Diospaj huasitaca, na yangapi churangachu. Paitaca, Taita Diospajlla tucuna aceiteta talishpa javishpami, Diospajlla cachun shicanyachishca. Ñucami, Mandaj Dios cani.

¹³Paica, jarihuan nara tacarishca cuitsagutami, paipaj huarmi cachun japinga.

¹⁴Paica, sapalla huarmita cusa jichushca huarmita, culquimanda huainayaj huarmitaca na cazarangachu. Ashtahuangarin paipaj llactamandallata, jarihuan nara tacarishca cuitsagutami, paipaj huarmi cachun japinga.

¹⁵Paipaj miraicuna paipaj gente puracunapi ama yangapi churai tucuchunmi, na chashna ruranga. Mandaj Dios ñucami, jucha illaj causachun shicanyachij Dios cani’ nishpa villai” nijurcami.

¹⁶Mandaj Diosca, Moisestaca cashnami nijurca:

¹⁷“Aaronman cashna nishpa villai: ‘Cambaj cati mirai puramanda maijan cashpapash, cuerpopi imapash huagli cashpaca, Taita Diosman tandata cungapaj na chayai ushangachu.

¹⁸Imapash huagli cashpaca, maijan runapash na Diospajman quimiri ushangachu. Ñausa runa, na cashpaca janga runa, na cashpaca paipaj cuerpomanda imatapash fiti tucushca runa, na cashpaca imapash huagli viñashca runapash na quimiri ushangachu.

¹⁹Na cashpaca chaqui faqui runa, na cashpaca maqui faqui runapash na quimiri ushangachu.

²⁰Na cashpaca, cunga tullu llujshishca runa, na cashpaca uchilla runa, na cashpaca ñavipi yuraj tiarishca runa, na cashpaca carachalla runa, na cashpaca chupushca runa, na cashpaca paipaj lulun llapirishca runa cashpapash, na quimirita ushangachu.

²¹Aarón curapaj miraicunamandaca, maijan cashpapash imapipash huagli cashpaca, Mandaj Diosman carashcata rupachishpa cungapapaj quimiritaca, na chayangachu. Paipica, huagli tiashcamandami na quimiri ushanga. Taita Diosman carashca tandata cungapajpash, na quimiri ushangachu.

²²Shina cashpapash, Taita Diospajlla shicanyachishpa, paipajlla cachun paiman rupachishpa carashca micunacunataca micui ushangami.

²³Ashtahuangarin paipi huagli tiashcamandami, telahuan quilpashca huashamambash, altarmambash na quimiri ushanga. Ñucapajlla huasita ama yangapi churangapajmi, na quimiri ushanga. Mandaj Dios ñucami, jucha illaj causachun shicanyachini’ nishpa villai” nijurcami.

²⁴Chaipimi Moisesca, Aaronmambash, paipaj churicunamambash, tucui israelcunamambash villajurca.