Read Imbabura Highland Quichua LEVÍTICO 22 Bible Online

LEVÍTICO 22 - Imbabura Highland Quichua bible

LEVÍTICO 22

¹Mandaj Diosca, Moisestaca cashnami nijurca:

²“Aaronmambash, paipaj churicunamambash, cashna nishpa villai: ‘Ñucaman carangapaj israelcuna shicanyachishcunataca, aliguta ricurianguichi. Shinallata jucha illaj ñuca shutitapash, na yangapi churanachu canguichi. Ñucami, Mandaj Dios cani’ nishpa villai.

³Cashnatapash paicunaman villangui: ‘Cangunapaj cati mirai puramanda maijan runa cashpapash, israelcuna ñucaman carangapaj shicanyachishpa apamushcacunata, chai runa imapipash mapayashca cashpata, Mandaj Dios ñucaman cungapaj quimirishpaca, ñuca ñaupajmanda anchuchi tucungami. Ñucami, Mandaj Dios cani.

⁴Aaronbaj mirai curamanda maijan runa cashpapash, lepra ung:uihuan, na cashpaca yuraj yacu shamujuj cashpapash, pai ñuca ñaupajpi mapa illaj tucungacaman ñucapajlla shicanyachishcataca, na micui ushangachu. Shinallata huañushcapi tacarishca cashpa, na cashpaca yuraj yacu paimanda llujshijuj runapash, na micui ushangachu.

⁵Na cashpaca llucashpa purij animalpi tacarishpa, na cashpaca mapayashca runata tacarishpami mapayanga. Imapi tacarishpa mapayaj cashcashnallata mapayashca cashpaca, na micui ushangachu.

⁶Shina mapacunapi tacarij runaca, tutayangacamanmi mapa canga. Shina mapayashca cashpapash, pai nara armashca cashpaca, ñucapajlla shicanyachishcataca, na micui ushangachu.

⁷Indi huashajushca jipaca, paica mapa illajmi canga. Chai jipami, ñucaman shicanyachishpa carashcacunataca micui ushanga. Ñucaman carashcacunaca, pai micushpa causanallatami.

⁸Yangamanda huañushca animaltapash, sacha animal canishpa huañuchishca animaltapash na micui ushangachu. Chaicunata micushpaca mapayangami. Ñucami, Mandaj Dios cani.

⁹Ñuca mandashcacunata na cazushpa ama juchata rurangapaca, chai mandashcacunata cazunami canguichi. Chai mandashcacunata yangapi churashpara huañunguichiman. Mandaj Dios ñucami, jucha illaj causachun shicanyachini.

¹⁰Ñucapajlla shicanyachishcataca, na rijsishca maijan runapash na micui ushangachu. Curapaj huasipi mingarij shamushca cashpapash, shujpi shujpi trabajaj runa cashpapash, ñucapajlla shicanyachishca micunataca na micui ushangachu.

¹¹Ashtahuangarin curallata, culquihuan randishca gañan runaca, chai shicanyachishcataca micungallami. Shinallata curapaj huasipi huacharishca cashpapash, chai micunataca micungallami.

¹²Curapaj ushi cashpapash, na rijsishca shuj jarihuan cazarashpaca, ñucaman shicanyachishpa carashcacunataca, na micui ushangachu.

¹³Curapaj ushica sapalla cashpa, na cashpaca cusa jichushca cashpa, huahuacunatapash nara charishpa, paipaj taitapaj huasiman tigrashpaca, cuitsa cashpa micun cashcashnallata, taitapaj micunacunata micuchunlla. Ashtahuangarin ñucaman shicanyachishcataca, na rijsishcacunaca pipash na micui ushangachu.

¹⁴Ñucapajlla cachun shicanyachishpa carashcacunata pandaimanda maijambash micushpaca, ashtahuan shuj pichata mirachishpa, ñucapajlla cachun shicanyachishcahuan tandachishpa, curaman cuchun.

¹⁵Ñucapajlla cachun shicanyachishpa, israelcuna ñucaman carashcacunataca, na yangapi churanachu canguichi. Chaicunataca, Mandaj Dios ñucaman shicanyachishcami.

¹⁶Ñucapajlla cachun shicanyachishcacunata, curacunaman ñuca carashcata pipash micujpica, curacunallatami nalita rurashpa, juchata rurachun saquinga. Mandaj Dios ñucami, jucha illaj causachun shicanyachini’ nishpa villai” nijurcami.

¹⁷Mandaj Diosca, Moisestaca cashnatapashmi nijurca:

¹⁸“Aaronmambash, paipaj churicunamambash, tucui israelcunamambash, cashna nishpa villai: ‘Israel puramanda maijan runa cashpa, na cashpaca shuj llactamanda shamushpa, Israel llactapi causanajuj runacuna cashpapash, ñucaman carashapachami nishcata pactachishpami caranga. Na cashpaca, paipaj munaillata ñucaman carasha nishcatami, tucuillata rupachishpa, Mandaj Dios ñucaman caranga.

¹⁹Chai carashcata ñuca chasquingapaca, animalcunamanda imapash na tucushca jari huagrata, maltun llamacunamanda shuj llamata, chivocunamanda shuj chivota ñucaman cunguichilla.

²⁰Imapash tucushca huagli animalcunataca, maijandapash na apamunachu canguichi. Shina animalcunata cangunamanda cushcataca, na chasquishachu.

²¹Shinallata Mandaj Dios ñucahuan ali cangapaj carashapachami nijushcata pactachingapajmi, animalta ñucaman carashpa huañuchinga. Na cashpaca, paipaj munaillata imagutapash carashami nishcata pactachingapajmi, huarmi huagracunamanda, llamacunamanda cashpapash caranga. Chaicunata ñuca chasquingapaca, imapash na tucushca animalcunami canga.

²²Ñausa cajpi, ima faquirishca cajpi, imatapash muchushca cajpi, grano llujshishca cajpi, carachashca cajpi, shijshi ung:uihuan animal cajpica, chaicunataca Mandaj Dios ñucaman na caranachu canguichi. Chaicunata ñucaman carashpa, Mandaj Dios ñuca altarpi na rupachinachu canguichi.

²³Huagrata cashpa, na cashpaca jari llamata cashpapash, cangunapaj munaillata ñucaman carangapaj apamushpaca, asha nali cajpipash carai ushanguichimi. Ashtahuangarin ñucaman carashapachami nishcata pactachingapaj chashnata cujpica, na chasquishachu.

²⁴Mandaj Dios ñucaman carangapaca, maijan animaltapash chugrishca, llapirishca, na cashpaca aspirishca, na cashpaca fitishca lulun cajpica, na apamunachu canguichi. Chashna animalcunataca, cangunapaj llactapi cashpapash, na cunachu canguichi.

²⁵Cangunapaj Taita Dios ñucaman carashca tandatashna carangapaca, shuj llactamanda shamushca runacunapaj maquimandapash, chashna animalcunata na chasquinachu canguichi. Chaicunapica, huagli tiashcamandami ismunapash tian. Shinamandami chaicunataca, na chasquina’ nishpa villai” nijurcami.

²⁶Mandaj Diosca, cashna nishpami Moisesman villajurca:

²⁷“Shuj shicuta cashpa, maltun llamata cashpa, huarmi chivota cashpapash, ñucaman carashpa huañuchingapaj munashpaca huacharishca punllamanda, canchis punllacaman chuchuchijuchun saquinguichi. Ashtahuangarin ña pusaj punllamandaca, ima punlla cashpapash, Mandaj Dios ñucaman cushpa huañuchishpa rupachijpica chasquishallami.

²⁸Huarmi huagrata cashpa, llamata cashpapash, na chai punllallata paipaj huahuandi, cungata muchushpa huañuchinallachu canguichi.

²⁹Mandaj Dios ñucata pashi nishpa, animalta ñucaman cushpa huañuchishpaca, ña chasquinallatami apamunga.

³⁰Chai carashcataca, chai punllallatami micuna canguichi. Cayandi punllapaca, na saquinachu canguichi. Ñucami, Mandaj Dios cani.

³¹Ñuca mandashcacunataca, yariashpami pactachina canguichi. Ñucami, Mandaj Dios cani.

³²Jucha illaj ñuca shutitapash, na yangapi churanachu canguichi. Israelcunapaj chaupipi jucha illaj ñuca cajta ricuchingapajmi, na shina rurana canguichi. Mandaj Dios ñucami cangunataca, jucha illaj causachun shicanyachini.

³³Cangunapaj Taita Dios cangapajmi, cangunataca Egipto llactamanda llujchimurcani. Ñucami, Mandaj Dios cani” nijurcami.