Read Imbabura Highland Quichua LEVÍTICO 23 Bible Online

LEVÍTICO 23 - Imbabura Highland Quichua bible

LEVÍTICO 23

¹Mandaj Diosca, Moisestaca cashnami nijurca:

²“Tucui israelcunaman, cashna nishpa villai: ‘Diospajlla tandanajuicunaman tucuicunata cayangapajmi, Mandaj Diospajlla jatun fiestacunata rurana canguichi. Chai fiestacunaca, caicunami:

³Sucta punllacamanmi, imatallapash na rurana canguichi. Ashtahuangarin canchis punllapica, Diospajlla tandanajuita rurangapaj, samana punllami canga. Chai punllapica, imatallapash na ruranachu canguichi. Canguna maipi causanajujpipash chai punllapica, Mandaj Diospaj samana punllami canga.

⁴Diospajlla tandanajuita rurangapaj, Mandaj Diospaj jatun fiestacunata ruranaca, caicunami: Chai tandanajuitaca, tandanajuita rurana punllacunallatami rurana canguichi:

⁵Quilla callari chunga chuscu punllapi ña amsayajujpica, Mandaj Diospaj pascua punllami canga.

⁶Chai quillapaj chunga picha punllapica, levadura illaj tandata micuna, Mandaj Diospaj jatun fiesta punllami canga. Chai canchis punllatami, levadura illaj tandata micunguichi.

⁷Fiesta callari punda punllapica, Diospajlla tandanajuimanmi cayana canguichi. Chai punllapica, servijcuna imatalla ruranatapash na ruranachu canguichi.

⁸Canchis punllacamanmi, Mandaj Diosman punllandi rupachishpa cuna canguichi. Canchis punllapica, Diospajlla tandanajuimi canga. Chai punllapica, servijcuna imatalla ruranatapash na ruranachu canguichi’ nishpa villai” nijurcami.

⁹Mandaj Diosca, Moisestaca cashnatapashmi nijurca:

¹⁰“Israelcunaman, cashna nishpa villai: ‘Cangunaman ñuca carashca llactaman yaicushpa, chaipi causanajushpaca, canguna tarpujpi fucushca granocunatami cozechanguichi. Shina cozechashpaca, punda fucushca granocunamanda ñucamanra cungapajmi, shuj gavillata curapajman apamunguichi.

¹¹Chai gavillata ñuca chasquichunga curami, samana punlla yalishca cayandi punllapi vichai cuyuchishpa, Mandaj Dios ñucaman cunga.

¹²Chai gavillata cujui punllallatami, shuj huatata charij, imapash na tucushca maltun llamatapash, Mandaj Dios ñucaman cushpa, tucuillata rupachina canguichi.

¹³Chuscu kilo chaupi ashtahuan ali jacutapashmi, aceitehuan masashpa cunga. Mandaj Dios ñucapaj mishquillagu ashnajuchun, ñucaman cushpa rupachishcami canga. Diosman cushpa talina vinotapash, shuj litro chaupitami apamunga.

¹⁴Cangunapaj Taita Dios ñucaman caranata nara carashpaca, tandata rurashpapash, trigota camllashpapash, trigo caspata jacushpapash, nara micunachu canguichi. Caitaca, canguna maipi causanajushpapash, canguna causanajushca tucui huatacunapi, tucui causaipi pactachinajuchun ñuca cushca shimicunami.

¹⁵Samana punlla cayandimanda, gavillata vichai cuyuchishpa cushca punllamanda cuentashpami, canchis semanatapacha cuentana canguichi.

¹⁶Ña canchis semana tucuri samana punlla cayandi punllacamanmi, picha chunga punllata cuentana canguichi. Chai punllapica, cutin shuj mushuj granocunatami, Mandaj Diosman cuna canguichi.

¹⁷Vichai cuyuchishpa Diosman cungapajmi, cangunapaj huasimanda ishcai tandata apamuna canguichi. Chai tandacunaca, chuscu kilo chaupi ashtahuan ali jacuta, levadurahuan rurashcami canga. Chaicunaca, punda fucushca granota, Mandaj Diosman cunashnallatami canga.

¹⁸Chai tandacunahuanga, shuj huatata charij, imapash na tucushca canchis maltun llamatapash, huarmi huagracunamanda shuj shicutapash, ishcai jari llamatapash cunguichi. Chai animalcunaca, chai tandacunahuambash, talishpa cuna vinomambash, Mandaj Diosman cushpa rupachingapajmi canga.

¹⁹Chai jahuapash juchamandaca, shuj chivota Diosman cunguichi. Dioshuan ali cangapajpash, shuj huatata charij, ishcai maltun llamata cushpa huañuchinguichi.

²⁰Chai llamacunataca curami, punda rurashca tandacunandi, ishcai maltun llamandi, Mandaj Diospaj ñaupajpi vichai cuyuchishpa cunshnallata cunga. Chaicunaca, Mandaj Dios ñucapajlla shicanyachishca cashcamanda, curapajmi canga.

²¹Chai punllapillatami, Diospajlla tandanajuita rurangapaj cayana canguichi. Chai punllapica, servijcuna imatalla ruranatapash na ruranachu canguichi. Caitaca, canguna maipi causanajushpapash, cangunapaj miraicunapash tucui causaipi pactachinajuchun, ñuca cushca shimicunami.

²²Cangunapaj alpapi cozechanajushpaca, alpa manñacunacaman llujchijtaca, na cozechanachu canguichi. Ña cozechashca jipapash, na pallajunachu canguichi. Chaicunataca imagutapash na charij runapash, shuj llactamanda shamushca runapash pallachun saquinguilla. Ñucami, cangunata Mandaj Taita Dios cani’ nishpa villai” nijurcami.

²³Mandaj Diosca, Moisestaca cashnami nijurca:

²⁴“Israelcunaman, cashna nishpa villai: ‘Canchis quillapaj chai callari punllapica, samana punllami canga. Chai punllapica, trompetacunata huacachishpa, Diosta yarina Diospajlla tandanajuita rurangapaj cayanami canga.

²⁵Chai punllapica, servijcuna imatalla ruranatapash na ruranachu canguichi. Chai punllapica, Mandaj Diosman rupachishpa cunguichi’ nishpa villai” nijurcami.

²⁶Mandaj Diosca, Moisestaca cashnatapashmi nijurca:

²⁷“Canchis quillapaj chunga punllapica, juchamanda Diosman animalta cuna punllami canga. Chai punllapica, tucui almahuan llaquirishpami, Diospajlla tandanajuita rurangapaj cayana canguichi. Chai punllapica, Mandaj Diosman cushpa rupachinguichi.

²⁸Chai punllapica, imatapash na ruranachu canguichi. Chai punllapica, cangunata Mandaj Taita Diospaj ñaupajpi, paihuan ali tucungapaj juchamanda animalta cunami canga.

²⁹Na micushpa Diosta mañana punllapillata, na mañaj tucui gentecunami, paicunapaj llacta puramanda anchuchi tucunga.

³⁰Maijan cashpapash chai punllapi ima ruranatapash rurajpica chai runataca, ñucallatami paipaj llacta puramanda tucuchisha.

³¹Chai punllapica, imatapash na ruranachu canguichi. Caitaca, canguna maipi causanajushpapash, cangunapaj miraicunapash, tucui causaipi pactachinajuchun ñuca cushca shimicunami.

³²Chai punllapica, canguna samana punllami canga. Chaitaca, canchis quillapaj iscun punlla chishipi callarishpami, tucui almahuan llaquirina canguichi. Chai samana punllataca, cayandi chishicamanmi pactachina canguichi” nijurcami.

³³Mandaj Diosca, Moisestaca cashnami nijurca:

³⁴“Israelcunaman, cashna nishpa villai: ‘Cai canchis quillapillata, chunga picha punllapica, chugllacunata rurashpa jatun fiestata rurana punllacunami canga. Canchis punllacamanmi, Mandaj Diospajlla fiesta punlla canga.

³⁵Fiesta callari punllapica, Diospajlla tandanajuita rurangapaj cayana punllami canga. Chai punllapica, servijcuna imatalla ruranatapash na ruranachu canguichi.

³⁶Canchis punllacamanmi, Mandaj Diosman cushpa rupachina canguichi. Pusaj punllapica, Diospajlla tandanajuita rurashpami, Mandaj Diosman cushpa rupachina canguichi. Chai punllacunaca fiesta punllacuna cashcamandami, servijcuna imatalla ruranatapash na rurana canguichi.

³⁷Mandaj Diospaj jatun fiesta punllacunaca, caicunami: Chai punllacunapimi, Mandaj Diosman cushpa rupachingapaj, Diosman animalta cushpa rupachingapaj, ashtahuan imagutapash carangapaj animalta cushpa tucuillata rupachingapaj, talina vinota cungapaj Diospajlla tandanajuita rurangapaj cayana canguichi. Tucui chaicunataca, ima punlla ruranapillatami rurana canguichi.

³⁸Samana punllacunapi, Mandaj Diosman cushca jahuami, chashna cuna canguichi. Paiman carashapachami nijushcata, cangunapaj tucui munaihuan, Mandaj Diosman imashna caranata yachanshnallata carashca jahuami, chashna cuna canguichi.

³⁹Ashtahuangarin canchis quillapaj chunga picha punllapi, cangunapaj pambacunapi fucushcata cozechashca jipaca, Mandaj Diosmanmi, canchis punllata fiestata rurana canguichi. Chai fiesta callari punllapica, samana punllami canga. Tucuri pusaj punllapipashmi, samana punlla canga.

⁴⁰Callari punllapica, juyailla granocuna fucushca malquicunata, palmera quiru malquicunata, fanga junda yura malquicunata, jatun larca ladopi tiaj sauce yura malquicunatapash tandachinguichi. Chashna rurashpaca, cangunata Mandaj Taita Diospaj ñaupajpi, canchis punllacaman cushijunguichi.

⁴¹Cangunaca, huatandimi canchis punllacaman, Mandaj Dios ñucaman fiestata rurana canguichi. Caitaca, cangunapaj miraicunapash, tucui causaipi pactachinajuchun ñuca cushca shimicunami. Canchis quillapimi, chashna rurana canguichi.

⁴²Canchis punllacaman chugllacunapilla tianajunguichi. Chai llactapillata huacharishca israelcunami, chugllacunapilla tianajunga.

⁴³Cangunata Egipto llactamanda ñuca llujchimushpa, chugllacunapilla causanajuchun churashcata cangunapaj miraicuna yachanajuchunmi, chashna rurana canguichi. Ñucami, cangunata Mandaj Dios cani’ nishpa villai” nijurcami.

⁴⁴Chashnami Moisesca, Mandaj Diosman jatun fiestata ruranacunata, israelcunaman villajurca.