Read Imbabura Highland Quichua LEVÍTICO 25 Bible Online

LEVÍTICO 25 - Imbabura Highland Quichua bible

LEVÍTICO 25

¹Mandaj Diosca, Sinaí urcupimi Moisestaca cashna nijurca:

²“Israelcunaman, cashna nishpa villai: ‘Cangunaman ñuca carashca llactaman ña yaicushpaca, alpacunapi na tarpushpa, Mandaj Dios ñucata alicachingapaj samachinguichi.

³Sucta huatacaman cambaj alpapi tarpungui. Yapalla viñashca uvas malquicunatapash sucta huatacaman fitishpa, uvas fucushcatapash pallangui.

⁴Ashtahuangarin canchis huatapica, cambaj alpataca, Mandaj Dios ñucapaj samana punlla cachun samachingui. Cambaj alpapica, na tarpunachu cangui. Uvas malquicunatapash, na fitinachu cangui.

⁵Cozechashca alpapi paimanda viñashpa fucushcatapash, ama cozechanguichu. Cambaj uvas chagrapi uvastapash, ama pallajunguichu. Chai huataca, alpacunata samachina huatami canga.

⁶Ashtahuangarin alpacunata samachijui huatapi fucushcacunami, cambash, canda servij jaripash, canda servij huarmipash, culquipaj servijpash, shuj llactamanda shamushpa cambaj llactapi causajuj runapash micungapaj canga.

⁷Cambaj animalpash, cambaj llactapi tiaj animalpash micuchunmi, chai huatapi fucushca tucui granocunaca canga.

⁸Shuj huatapica, canchis semanata cuentanguichi. Canchis huatataca, canchis viajecaman cuentanguichi. Shina cuentajpica, chai canachis semana punllacunaca, chuscu chunga iscun huatami tucunga.

⁹Shina cuentashpami, canchis quillapaj chunga punllapica, trompetata shinllita huacachishpa uyachijuchun mandana cangui. Juchamanda Diosman cuna punllapimi, cangunapaj tucui llactapi chashna huacachijuchun mandana cangui.

¹⁰Ña picha chunga huata tucujpimi, chai huatataca Diospajlla cachun shicanyachina canguichi. Shinallata Israel llactapi causajcunapaca, tucui imamandapash cacharirina huatami nishpami, chai llactapi villana canguichi. Chai huatapica, cutin tigrachina huatami. Shinamandami, tucuicuna cangunapaj alpacunaman tigranguichi. Shinallata tucuicunami, paicunapaj familiacunapajman tigranajunga.

¹¹Picha chunga huatapica, cutin tigrachina huatami canga. Chai huataca, na tarpunachu canguichi. Paimanda fucushca granocunatapash, na cozechanachu canguichi. Cangunapaj uvas chagrapi, uvastapash na pallajunachu canguichi.

¹²Chai huataca, cutin tigrachina huata cashcamandaca, cangunapaca Diospajlla shicanyachishca huatami canga. Alpapi paimanda fucushcacunatami micunguichi.

¹³Cutin tigrachina chai huatapimi, tucuicuna cangunapaj alpacunaman tigranguichi.

¹⁴Cangunapaj cumba runaguman alpata jatushpa, na cashpaca paipaj alpata randishpapash, pipash paipaj huauquitallataca, na umachinachu canguichi.

¹⁵Cutin tigrachina huata yalishca jipamanda mashna huata tiajpipash, chaita ricushpa randingui. Shinallata jatuj runapash, mashna huatata tarpushpa fucuna cajpipash, cuentashpa ricushpami canman jatunga.

¹⁶Tauca huatata tarpuna cajpica, ashtaca culquita mañangui. Ashalla huatata tarpuna cajpica, ashalla culquita mañangui. Mashna huatata cozechana cajpipash ricushpami, jatuj runapash canman jatunga.

¹⁷Cangunapaj cumba runagutaca, pipash na umachinachu canguichi. Ashtahuangarin cangunapaj Taita Dios ñucatami, manllana canguichi. Ñucami, cangunata Mandaj Taita Dios cani.

¹⁸Pactachinajuchun ñuca cushca shimicunata pactachishpa, ñuca mandashcacunatapash yariashpa ruranguichi. Shina rurashpami, llactapica imatapash na manllashpa, aliguta causanguichi.

¹⁹Llactapica, aligutami granocunaca fucunga. Chai fucushcatami na munangacaman micushpa, chai llactapica imatapash na manllashpa, aliguta causanguichi.

²⁰Cangunaca cashnami ninguichi: Ricuichi, imatapash na tarpuna, ima granotapash na cozechana cashpaca, samana canchis huatapica, ¿imatashi micushunchi? ninguichimi.

²¹Shinamandami ñucaca, sucta huatapica ninanda bendiciamusha. Chai bendiciashcami, granocunataca quimsa huatacaman fucuchinga.

²²Ña pusaj huatapi tarpushpami, chai huatapi fucushca granotaca, cati iscun huatacaman alichishpa micunguichi. Iscun huatapi tarpushca granocuna fucungacamanmi, chai granocunata alichishpa micunguichi.

²³Alpaca ñucapaj cashcamanda, na tucui causaipaj jatunachu. Cangunaca ñucapaca, shuj llactamanda purij runashna, caru llactamanda shamushca runashnami canguichi.

²⁴Shinamandami, alpata maijanda randishca cashpapash, chai jatuj runallata tigrashpa randichun saquina canguichi.

²⁵Cambaj huauqui purallatami, imagupash illaj tucushpa, paipaj alpata ashaguta jatunga. Shina jatujpica, chai jatuj runapaj ashtahuan ladolla familia purami, paipaj huauqui purallata jatushca alpamandaca, alpata randij runaman culquita tigrachishpa japinga.

²⁶Alpata jatushca runaca, paipaj randi culquita tigrachishpa ayudaj familiata na charingachu. Shina cashcamanda chai alpamanda tigrachi pactanata culquita tandachishpaca,

²⁷chai alpata ima hora jatushca huatamandapachami cuentanga. Shinami, cutin tigrachina huatacaman cuentashpa mashnata cuna cajpipash, chaita cunga. Shina cushpaca, paipaj alpamanllatami tigranga.

²⁸Ashtahuangarin alpata jatuj runaca, randij runaman culquita tigrachingapaj na pactanata charishpa, na tigrachi ushajpica, alpaca cutin tigrachina huata chayangacamanmi randij runapajllata quedanga. Cutin tigrachina huata chayajpimi, paipaj alpamanllata tigranga.

²⁹Maijan cashpapash, muyundi pircashca pueblopi tiajuj huasita jatushpaca, jatushca punllamanda shuj huatacamanllami, chai huasimandaca, culquita tigrachishpa cutin japi ushanga. Shuj huatacamanllami, culquita cutin tigrachishpa japi ushanga.

³⁰Ashtahuangarin muyundi pircashca pueblopi charishca huasita jatuj runaca, shuj huata tucungacamambash, randij runaman culquita na tigrachi ushajpica, chai huasica randij runapaj, paipaj miraicunapajmi tucui causaipaj quedanga. Cutin tigrachina huata pactajpipash, na tigrachingachu.

³¹Ashtahuangarin muyundita na pircashca uchilla llactacunapi tiaj huasicunata jatushca cashpaca, chaicunaca alpacunata jatushcashnallatami canga. Chai huasicunataca cacharichi ushangami, cutin tigrachina huata chayajpipash tigrachi ushangami.

³²Ashtahuangarin levitacunapaj pueblocunapica, paicuna jatushca huasicunataca, paicunapaj huasicuna cashcamandaca, ima horapash cacharichi ushangallami.

³³Maijan cashpapash, levitacunapaj huasita randishca cashpaca, cutin tigrachina huata chayajpica, chai huasimandapash, na cashpaca paicunapaj cachun cushca pueblomandapash, Israel puracunapica chai pueblocunapi tiaj huasicuna levitacunapaj cachun cushcamandami, chashna llujshinata charin.

³⁴Ashtahuangarin levitacuna causanajuj pueblo muyundipi tiaj michina pambacunataca, na jatui ushangachu. Chaicunaca, paicunapaj tucui causaipi paicunapaj cachun cushcami.

³⁵Cambaj huauqui purallata imagupash illaj tucushpa, cambajman mingaringapaj shamujpica, can ayudangui. Paica, shuj llactamanda purij runashna, shuj llactamanda shamushca runatashnami canhuan causanga.

³⁶Mama culqui mirashcamanda yalishpapash, culquita mañachishcamanda mirachishpapash, na japinachu cangui. Ashtahuangarin cambaj Taita Diostami, manllana cangui. Cambaj huauquipura runaguca, canhuanmi causanga.

³⁷Culquita mañachishpaca, ama mama culqui mirashcamanda yalishpa japinguichu. Ima micunata mañachishpapash, na mirachishpa japinachu cangui.

³⁸Cangunata Mandaj Taita Dios ñucami, Canaán llactata cangunaman carangapaj cangunataca, Egipto llactamanda llujchimurcani. Cangunapaj Taita Dios cangapajmi llujchimurcani.

³⁹Cambaj huauqui purallata canhuan causajushpa, imagupash illaj tucushpa canman jaturijpica, ama gañandashna servichishpa charinguichu.

⁴⁰Paitaca, culquipaj trabajaj runagutashna, shuj llactamanda shamushca runagutashna canhuan charingui. Paica, cacharina huata chayangamanmi canda servishpa causajunga.

⁴¹Chai jipaca, cambaj huasimandaca cacharirishpa llujchingallami. Paipash, paipaj huahuacunapashmi, paipaj familiacunapajman tigranga. Paipaj taitapaj alpatallata cutin japishpami, chaipi causagringa.

⁴²Paicunaca, ñucata servijcunami. Paicunatami, Egipto llactamandaca llujchimurcani. Chaimanda paicunaca, gañanshnaca na jaturingachu.

⁴³Paicunataca, na llaquinayaita llaquichishpa, mandashpa charinachu cangui. Ashtahuangarin cambaj Taita Diostami manllana cangui.

⁴⁴Cambaj gañangunaca, jari cashpa, huarmi cashpapash, cangunapaj llacta muyundipi causanajuj gentecunami canga. Paicunatami, jari gañangunatapash, huarmi gañangunatapash randi ushanguichi.

⁴⁵Shinallata shuj llactamanda shamushpa cangunahuan causajcunapaj huahuacunatapashmi, gañan cachunga randi ushanguichi. Cangunapaj llactapi huacharishca paicunapaj familiacunatapash randinguichilla. Paicunatami, cangunapaj cachun chari ushanguichi.

⁴⁶Paicunataca, cangunapaj huahuacunamambash, paicunapaj cachun carashcatashna saqui ushanguichimi. Paicunataca, tucui causaipimi servichishpa chari ushanguichi. Ashtahuangarin cangunapaj huauqui purallata israelcunataca, pitapash na llaquinayaita llaquichishpa, mandashpa charinachu canguichi.

⁴⁷Shuj llactamanda purij runa, na cashpaca shuj llactamanda shamushpa, canhuan causajuj runa charij tucujpi, chai runapaj ladollapi causajuj cambaj huauquira imagupash illaj tucungapashchari. Shina tucushpaca, shuj llactamanda purij runaman, na cashpaca shuj llactamanda shamushpa canhuan causajuj runaman, na cashpaca shuj llactamanda shamushca runapaj familiaman cashpapash jaturingapashchari.

⁴⁸Shina jaturishca cajpipash, culquita cushpaca cacharichi ushanmi. Paipaj huauqui purallata shuj runami, paitaca cacharichi ushanga.

⁴⁹Paipaj tío cashpa, chai tiopaj churi cashpa, na cashpaca paipaj familia purallata maijan cashpapash cacharichi ushanmi. Na cashpaca paillata culquita tigrachi ushashpaca, paillata cachariri ushanmi.

⁵⁰Randij runahuanga, cashnami ruranga: Jaturishca punllamandapacha cuentashpa, cacharina huata chayangacaman mashna huata illajtami cuentanga. Mashnapaj jaturishcatapash, jaturishca punllamanda mashna huatata servijushcatami cuentanga. Mashna huatatapash servishcataca, cangunapaj llactapi culquipaj servij runaman, punllandi mashna culquita cuj cashcashnallatami cuentanga.

⁵¹Jaturij runapaca, ashtaca huatata servinara cajpica, randij runamanga, chai randishca tucuilla culquitallatami tigrachinga.

⁵²Cacharina huata chayangapaj ashalla tiajpica, chai huatacunamandalla mashnata tigrachina cajpipash, chaita ricushpallami tigrachinga.

⁵³Paitaca, huatandi culquita japingapaj ari nishca servij runatashnallata rurachun. Cambaj ñaupajpica, na manllanayaita llaquichishpa mandangachu.

⁵⁴Chai huatacunapillata culquita na tigrachi ushashpa na cacharichijpica, cacharina huata chayapimi, paipash, paipaj huahuacunapash llujshinga.

⁵⁵Israelcunaca, ñucata servijcuna cashcamandami, shina llujshinga. Paicunaca, Egipto llactamanda ñuca llujchimushca, ñucata servijcunami. Ñucami, cangunata Mandaj Taita Dios cani.