Read Imbabura Highland Quichua LEVÍTICO 26 Bible Online

LEVÍTICO 26 - Imbabura Highland Quichua bible

LEVÍTICO 26

¹Canguna charingapaca, yanga dioscunatapash, labrashca diostapash na ruranachu canguichi. Rumi diostapash, na shayachinachu canguichi. Chaicunata ama rurai cumuringapaca cangunapaj llactapica, pintashca rumitapash na churanachu canguichi. Ñucami, cangunata Mandaj Taita Dios cani.

²Ñuca samana punllacunataca, pactachinami canguichi. Ñucapajlla huasitapash, manllaihuan aliguta charinguichi. Ñucami, Mandaj Dios cani.

³Imata rurachun ñuca mandashcacunata rurashpa causashpa, ñuca mandashca shimicunatapash yariashpa pactachinguichi.

⁴Shina pactachijpica, ñucami tamiachina punllapillata tamiachimusha. Chaimandami cangunapaj alpacunapica, granocuna fucunga. Shinallata pambacunapi shayanajuj quirucunapipashmi, granocuna fucunga.

⁵Trigota trillanapash nara tucurijpillatami, uvasta pallanapash chayamunga. Uvastapash nara tucuilla pallajpillatami, tarpuna punllacunapash chayamunga. Shinamandami cangunapaj tandataca, na ushangacaman micushpa causanguichi. Cangunapaj llactapica, imatapash na manllashpami aliguta causanguichi.

⁶Ñucaca cangunapaj llactapica, casilla ali causaitami carasha. Chaimandami imatapash na manllashpa puñunguichi, cangunataca pipash na manllachingachu. Cangunapaj llactamandaca, millai animalcunatapashmi anchuchisha. Cangunapaj llactapica, espadahuan macanajuipash na tiangachu.

⁷Cangunata fiñajcunata catishpa, espadahuan canguna huañuchijpimi, cangunapaj ñaupajpi urmanajunga.

⁸Canguna puramandaca, picha purallami, patsaj runacunata catishpa huañuchinguichi. Canguna puramandaca patsaj purallami, chunga huaranga runacunata catishpa huañuchinguichi. Shinami cangunata fiñajcunaca, espadahuan canguna huañuchijpi, cangunapaj ñaupajpi urmanajunga.

⁹Ñucaca, cangunapajman cutin tigramushpami, ashtacata ninandapacha mirachisha. Shinallata cangunahuan ñuca ari nijushcatapash, shinllitapachami churasha.

¹⁰Punda huatacuna alichishca granocunatami micunguichi. Alichishca granocunata llujchishpami, mushuj granocunata alichinguichi.

¹¹Ñuca causanataca, cangunapaj chaupipimi churasha. Cangunataca, ñuca shungupica na millanayachishachu.

¹²Cangunahuanmi purijusha, ñucami cangunapaj Taita Dios casha. Cangunapash, ñuca agllashcacunami canguichi.

¹³Ñucami, cangunata Egipto llactamanda llujchimuj, cangunata Mandaj Taita Dios cani. Chai llactapi causajcunata ama servishpa causanajuchunmi, paicuna yugushpa huatashcatapash fitircani. Shinami cangunataca, ñavitapash vichai alsashpa jarilla purinajuchun saquircani.

¹⁴Ashtahuangarin tucui cai ñuca mandashcacunata na uyashpami, na pactachinguichi.

¹⁵Imata rurachun ñuca mandashcacunata na munashpa, pactachinajuchun cushca shimicunatapash, tucui almahuan yangapi churashpa, ñuca tucuilla mandashcacunata na pactachishpami, ñucahuan ari ninajushcatapash yangapi churanguichi.

¹⁶Shina rurajpica ñucapashmi, cangunataca, cashna llaquichisha: Cangunapaj jahuapica, ñavita tucuchijuchun, almata llaquichijuchunmi, ninan manllaita, punguichij ung:uita, calentura ung:uita cachamusha. Cangunapaj muyucunatapash, yangallatami tarpunguichi. Fucushca granocunataca, cangunata fiñajcunami micunajunga.

¹⁷Ñucapash, cangunataca fiñashpa ricujpimi, cangunata fiñajcunapaj ñaupajpi chugrichi tucunguichi. Cangunata na ricunayachijcunami, cangunataca mandashpa charinga. Cangunaca, pipash na catijujpitami, pacajushpa calpanguichi.

¹⁸Shina llaquichijujpipash, canguna ñucata na uyajpica, ashtahuan canchis llaquicunata mirachishpami, cangunapaj juchacunamandaca cutin llaquichisha.

¹⁹Shinallata canguna jariyashpa, jatun tucushpa purinajushcataca llaquichishami. Jahua pachatapash, jirrutashnami rurasha. Cangunapaj alpatapash, broncetashnami rurasha.

²⁰Canguna imata rurashcapash, yangallatami tucuringa. Cangunapaj alpapica, imapash na fucungachu. Cangunapaj yuracunapipash, imapash na fucungachu.

²¹Canguna ñucata fiñashpa purinajushpa ñucata na uyanayachijpica, huañuchij llaquicunata canchiscaman mirachishpami, canguna juchacunata rurashcashnallata cachamusha.

²²Cangunata llaquichinajuchunga, millai animalcunatami, cangunapaj huahuacunatapash, micuchun cangunapaj animalcunatapash tucuchinajuchun cachamusha. Chai animalcuna micujpi huaquinlla puchunajuchun, cangunapaj ñangunapash jichushca sirichunmi, chashna cachamusha.

²³Shina llaquichijujpipash, na ali tucushpami, ashtahuangarin ñucata fiñashpa puringuichi.

²⁴Shinamandami, ñucapash cangunata llaquichisha. Cangunapaj juchacunamandaca, canchiscaman mirachishpami llaquichisha.

²⁵Ñucahuan ari ninajushcata faquishpa ñucata llaquichijpica, ñucapash chashnallatami cangunataca, espadahuan llaquichisha. Shina llaquichijujpi, cangunapaj pueblocunapi pacajunajujpipash, jatun ung:uicunatami cangunapajman cachamusha. Shina cachamushpami cangunataca, fiñajcunapaj maquipi churasha.

²⁶Micushpa shinlli tucuna tandata ñuca chingachijpica, chunga huarmicunami shuj jornopilla tandata cusanga. Chaitapash pezashpami, cangunaman tigrachinga. Cangunaca micushpapash, na vijsa pactashpallatami quedanguichi.

²⁷Shina llaquichijujpipash ñucata na uyashpami, ashtahuangarin ñucata fiñashpa ringuichi.

²⁸Shina rurajpica ñucapash, cangunataca ninanda fiñashpami llaquichisha. Cangunapaj juchacunamandaca, canchiscaman mirachishpami llaquichisha.

²⁹Shina llaquichijujpimi, cangunapaj quiquin churicunatallata, ushicunatallata micunguichi.

³⁰Lomacunapi tiaj cangunapaj altarcunatapash tucuchishami. Imamambash rijchaj dioscunatapash urmachishpami, canguna huañushca cuerpotapash, huañushca yanga dioscunapaj jahuapi churasha. Shina rurashpami cangunataca, ñuca shungupi millanayachisha.

³¹Cangunapaj pueblocunatapash, jichushca pambatami saquisha. Cangunapaj dioscunapaj huasicunatapash, llaquinayaitami tucuchisha. Mishquilla juyailla ashnajuj cangunapaj jambitapash, na ashnachishachu.

³²Llactatapash llaquinayaitami tucuchisha. Chaita ricushpami, cangunata fiñajcuna chai llactapi causangapaj shamushpapash, ricunman quedanajunga.

³³Cangunataca, shuj llactacunaman caita chaita cachashpami, espadata llujchishpa ninanda llaquichishpa catiriasha. Chaimandami, canguna causanajushca llactaca llaquinayaita tucuchi tucunga. Canguna causanajushca pueblocunapash, jichushca pambashnami siringa

³⁴Shina rurajpimi cangunapaj chai llactaca, llaquinayaita tucuchi tucushca chai punllacunapica, cushijushpa samanga. Cangunata fiñajcunapaj llactapi canguna causangacamanmi, chashna samanga. Shinami chai llactaca, pai samana punllacuna cajpi, ninanda cushijushpa samanga.

³⁵Chai llactapi canguna causanajujpi, samana punllacunapi na samashcamandami, llaquinayaita tucuchi tucushca chai huatacunapi, chashna samanga.

³⁶Canguna puramanda huaquin puchushcacunapaj shungupica, jatun manllaitami churasha. Paicunata fiñajcunapaj llactapica, shuj fanga tsal nijpillatami, pipash catijpishna calpanajunga. Espadahuan catijujpishnami, ninanda manllarishpa pacajungapaj calpanajunga. Pipash na catishpa huañuchijpitami urmanajunga.

³⁷Cangunaca, pipash na catijpitami, espadahuan huañuchingapaj catijpishna, canguna purallata caishuj chaishuj huactarinajunguichi. Chaimandami cangunata fiñajcunahuanga, napacha macanajui ushanguichi.

³⁸Cangunaca, shuj llactapi causajcunapaj chaupipimi tucuringuichi. Cangunata fiñajcunapaj llactami, cangunataca tucuchinga.

³⁹Canguna puramanda huaquin puchushcacunaca, paicuna nalita rurashcamandami, paicunata fiñajcunapaj llactapi huañushpa urmanajunga. Paicunapaj taitacuna nalita rurashcamandapashmi, chashna urmanajunga.

⁴⁰Shinamandami, paicuna nalita rurashcatapash, paicunapaj taitacuna nalita rurashcatapash, yachashpata ñucata na cazushcatapash ñucaman villanajunga. Shinallata imashpa ñucata na cazushpa purinajushcatapashmi villanajunga.

⁴¹Ñucapash paicunahuan fiñarishpami, paicunata fiñajcunapaj llactaman cachasha. Shinamandami paicunapaj shungupi circuncisión nishcata na rurashcacunaca, pingai tucushpa urai cumurishpa, paicunapaj juchatapash villanajunga.

⁴²Shina rurajpimi ñucapash, Jacobo, Isaac, Abraham shuti taitacunahuan ari nijushcata yarisha. Shinallata cangunaman carashca llactatapashmi yarisha.

⁴³Shina cajpipash paicunapaj jahuami, llactaca jichushca siringa. Paicunapaj jahuallata, jichushca pambashna sirijushca chai punllacunapimi, cushijushpa samajunga. Ñuca mandashcacunata yangapi churashpami, pactachinajuchun cushca shimicunatapash na ricunayachinajurca. Shinamandami, paicunallata nalita rurashcamandaca, jatun llaquipi churai tucunga.

⁴⁴Chashna rurashpapash, paicunata fiñajcunapaj llactapi llaquinayaita causanajujpipash, na jichushachu. Ñuca paicunahuan ari nijushcata na yangapi churashpa paicunata tucuchingapaca, paicunataca na millanayachishachu. Mandaj Dios ñucami, paicunapaj Taita Dios cani.

⁴⁵Ashtahuangarin ñucaca, paicunapaj Taita Dios cangapaj paicunataca, shuj llactacunapi causajcuna ricujta, Egipto llactamanda llujchimushcatami yarisha. Chaipi, paicunahuan ari nijushcatapashmi yarisha. Ñucami, Mandaj Dios cani’ nishpa villai” nijurcami.

⁴⁶Pactachinajuchun cushca shimicunata, mandashcacunata, mandashca shimicunata, Mandaj Dios cushcacunaca chaicunami. Chaicunataca, paimandallatapash israelcunamandapashmi, Moisespaj maquipi Sinaí urcupi curca.