Read Imbabura Highland Quichua LEVÍTICO 3 Bible Online

LEVÍTICO 3 - Imbabura Highland Quichua bible

LEVÍTICO 3

¹Dioshuan ali cangapaj cushpa huañuchina animalta apamushpaca, huagra puracunamanda imapash na tucushca jari huagrata, na cashpaca huarmi huagrata, Mandaj Diospaj ñaupajman apamuchun.

²Chai carashca huagrapaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churi curacunami, altar jahua muyundipi tsirapachinajunga.

³Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinshnallata rupachinga. Chunllulicunata quilpashca viratapash, vijsa ucupi tiaj tucui viratapash chashnallatami ruranga.

⁴Ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj chunllulicunapaj viratapash llujchinga.

⁵Chaicunataca, Aaronbaj churicunami altarpi rupachinajunga. Chaitaca, Diosman cushpa tucuillata rupachingapaj, yamda jahuapi churashca tiajuj animalpaj jahuapi churashpami rupachinajunga. Chaica, Mandaj Diospaj mishquillagu ashnajuchun, rupachishcami canga.

⁶Ashtahuangarin Mandaj Dioshuan ali cangapaj, llama puracunamanda huañuchina animalta cushpaca, imapash na tucushca jari llamata, na cashpaca huarmi llamata cuchun.

⁷Maltun llamata cushpaca, Mandaj Diospaj ñaupajpimi cunga.

⁸Chai llamapaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churicunami altar jahua muyundipi tsirapachinajunga.

⁹Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinshnallata rupachinga. Chupataca, lomomandapacha tucuillata fitishpami, chunllulicunata quilpashca viratapash, vijsa ucupi tiaj tucui viratapash, shashnallata rupachinga.

¹⁰Shinallata ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj viratapash llujchinga.

¹¹Chaitaca curami, altar jahuapi rupachinga. Shina micunayaita carashpa rupachishcami, Mandaj Diosman carashpa rupachishca canga.

¹²Chivota cushpaca, Mandaj Diospaj ñaupajpimi cunga.

¹³Chai chivopaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churicunami altar jahua muyundipi tsirapachinajunga.

¹⁴Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinga. Chunllulicunata quilpashca viratapash, vijsa ucupi tucui viratapashmi chashnallata rupachinga.

¹⁵Ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj viratapash llujchinga.

¹⁶Chaitaca curami, altar jahuapi rupachinga. Shina micunayaita carashpa rupachishcami, Mandaj Diospaca mishquillagu ashnajunga. Tucuilla virami, Mandaj Diospaj canga.

¹⁷Cangunaca, maipi causanajushpapash virata, yahuartaca na micunachu canguichi. Tucui causaipi pactachinajuchun cushca shimicunaca, canguna causanajui huatacunapi pactachinajuchun cushcami canga’ nishpa villangui” nijurcami.