Read Imbabura Highland Quichua LEVÍTICO 4 Bible Online

LEVÍTICO 4 - Imbabura Highland Quichua bible

LEVÍTICO 4

¹Mandaj Diosca, Moisestaca cashnami nijurca:

²“Israelcunaman, cashna nishpa villangui: ‘Caitaca na rurachun nishpa, Mandaj Dios mandashcacunamanda maijanda cashpapash na yachaimanda pandashpa, maijan cashpapash juchata rurashpaca, cashnami ruranga:

³Aceiteta talishpa javishca cura, shuj gentecunashnallata juchata rurashpaca, chai juchata rurashcamandami, Mandaj Diosman cunga. Juchamandaca, imapash na tucushca shicutami cunga.

⁴Chai shicutaca, Dioshuan tuparina jatun carpa pungumanmi, Mandaj Diospaj ñaupajman apamunga. Shina apamushpaca, chai shicupaj umapi maquita churashpami, Mandaj Diospaj ñaupajpi cungata muchushpa huañuchinga.

⁵Aceiteta talishpa javishca curallatami, chai shicupaj yahuarta japishpa, Dioshuan tuparina jatun carpaman apamunga.

⁶Chaipica, chai curallatami, paipaj maqui dedota yahuarpi mutiyachinga. Shina mutiyachishpami chai yahuartaca, Diospajlla ucupi tiaj tela ladoman, Mandaj Diospaj ñaupajpi canchiscaman tsirapachinga.

⁷Chai yahuartaca curallatami, mishquillagu ashnajuj inciensota cushnichina altar cachucunapi churanga. Chai altarca, Dioshuan tuparina carpa ucupimi, Mandaj Diospaj ñaupajpi tiajun. Chai shicupaj yahuar puchushcataca, Dioshuan tuparina jatun carpa pungu ñaupajpimi, animalcunata Diosman cushpa tucuillata rupachina altar chaquipi talinga.

⁸Juchamanda Diosman cushca shicupaj tucuilla virataca, chunllulicunata quilpashca viratapash, vijsa ucupi tiaj viratapashmi llujchinga.

⁹Shinallata ishcandi riñondapash, chaipi tiaj viratapash, lomocunapi tiaj viratapashmi llujchinga. Shinallata riñonhuanllatami, yana shungupi tiaj viratapash llujchinga.

¹⁰Dioshuan ali cangapaj cushpa huañuchishca huagrapaj virata llujchishcashnallatami llujchinga. Chai virataca curallatami, Diosman cushpa tucuillata rupachina altarpi churashpa rupachinga.

¹¹Chai shicupaj carataca, tucuilla aichandi, umandi, changacunandi, chunllulicunandi, huanundimi tandachinga.

¹²Shina tucuillata tandachishpami, uchufata shitana pushtuman, na mapayashca pushtuman, carpacunamanda caruman llujchishpa churanga. Chai jipaca, chai uchufata shitana pushtupimi, yamdata churashpa, ninata japichishpa rupachinga.

¹³Tucuilla tandanajushca israelcunami, na yachaimanda pandashca canga. Chai pandashpa imata rurashcatapash, tucuilla gentecunallata na yachangachu. Caitaca, na ruranachu nishpa, Mandaj Dios mandashcamanda, maijanda cashpapash na yachaimanda pandashpa juchata rurashpaca, nalita rurashcami canga.

¹⁴Chai juchata rurashcata jipamanra yachashpaca, tucuilla tandanajushcacunami chai juchamandaca, shujlla shicuta cunajunga. Chai shicutaca, Dioshuan tuparina carpa ñaupajmanmi apamunajunga.

¹⁵Chai tandanajushcacunata mandaj rucucunami shicupaj umapi, Mandaj Diospaj ñaupajpi paicunapaj maquita churanga. Chai jipami chai shicutaca, Mandaj Diospaj ñaupajpillata cungata muchushpa huañuchinga.

¹⁶Chai shicupaj yahuartaca, aceiteta talishpa javishca curallatami, Dioshuan tuparina carpa ucuman apanga.

¹⁷Chai jipaca chai curallatami, paipaj maqui dedota yahuarpi mutiyachinga. Shina mutiyachishpami chai yahuartaca, Diospaj huasi ucupi tiaj tela ladoman, Mandaj Diospaj ñaupajpi canchiscaman tsirapachinga.

¹⁸Chai yahuartaca, Dioshuan tuparina jatun carpa ucupi, Mandaj Diospaj ñaupajpi tiaj altar cachucunapimi churanga. Chai puchushca yahuartaca, Dioshuan tuparina jatun carpa pungu ñaupajpimi, animalcunata Diosman cushpa tucuillata rupachina altar chaquipi talinga.

¹⁹Animalpaj virata tucuillata llujchishpami, altarpi rupachijunga.

²⁰Chai shicutaca, juchamanda cushca shicuta imashna rurashcashnallatami rupachinga. Tucui israelcunapaj juchacunamandaca, curami chashna ruranga. Shina rurajpimi, chai juchataca Diosca cunganga.

²¹Shicutaca, carpacunamanda canllaman llujchishpami, punda shicuta rupachishcashnallata rupachinga. Chaica, tandanajushca israelcunapaj juchamanda cushcami.

²²Israelcunata maijan mandaj cashpapash, caitaca na ruranachu nishpa, paita Mandaj Taita Dios mandashcamanda, maijanda cashpapash na yachaimanda pandashpa rurashpaca, juchatami ruran.

²³Juchata rurashcata jipamanra yachashpaca, chai juchamandaca imapash na tucushca jari chivotami cunga.

²⁴Chai chivopaj umapi maquita churashpami, chai chivotaca tucuillata rupachina animalta, cungata muchushpa huañuchina pushtupillata, Mandaj Diospaj ñaupajpi cungata muchushpa huañuchinga. Chaica, juchamanda cushcami canga.

²⁵Chai jipaca curallatami, juchamanda cushca animalpaj yahuarpi paipaj maqui dedota mutiyachishpa, Diosman cushpa tucuillata rupachina altar cachucunapi javinga. Chai puchushca yahuartaca, animalta cushpa tucuillata rupachina altar chaquipimi talinga.

²⁶Tucuilla viratami, Dioshuan ali cangapaj, cushca viratashnallata altarpi rupachinga. Chashnami, chai runapaj juchamandaca, curallata rupachinga. Chashna rurajpimi, juchata cunganga.

²⁷Shinallata Israel puracunamanda maijan cashpapash, caitaca na ruranachu nishpa, Mandaj Dios mandashcacunamanda maijanda cashpapash, na yachaimanda pandashpa rurashpaca, juchatami ruran.

²⁸Juchata rurashcata jipamanra yachashpaca, shuj huarmi chivotami apamunga. Chai juchata rurashcamandaca, imapash na tucushca huarmi chivotami apamunga.

²⁹Juchamanda cushca chai animalpaj umapi maquita churashpami, chai animaltaca tucuillata rupachina animalta huañuchina pushtupillata, cungata muchushpa huañuchinga.

³⁰Chai jipaca curallatami, paipaj maqui dedota yahuarpi mutiyachishpa, Diosman cushpa tucuillata rupachina altar cachucunapi javinga. Chai puchushca yahuartaca, chai altar chaquipimi talinga.

³¹Chai animalpaj virataca, Dioshuan ali cangapaj cushca animalpaj virata anchuchishcashnallatami tucuillata anchuchinga. Curami chai virataca, Mandaj Diospaj mishquillagu ashnajuchun, altarpi rupachinga. Chashnami chai runapaj juchamandaca, curallata rupachijunga. Chashna rurajpimi, juchataca cunganga.

³²Juchamanda Diosman cungapaj maltun llamata apamushpaca, imapash na tucushca huarmi llamata apamuchun.

³³Juchamanda cushca chai animalpaj umapi maquita churashpami chai animaltaca, Diosman cushpa tucuillata rupachina animalta, cungata muchushpa huañuchina pushtupillata, cungata muchushpa huañuchinga.

³⁴Chai jipaca curallatami, juchamanda cushca animalpaj yahuarpi paipaj maqui dedota mutiyachishpa, Diosman cushpa tucuillata rupachina altar cachucunapi javinga. Chai puchushca yahuartaca, chai altar chaquipimi talinga.

³⁵Chai animalpaj virataca, Dioshuan ali cangapaj cushca animalpaj viratashnallatami, tucuillata anchuchinga. Curami chai virataca, Mandaj Diosman cushpa altarpi rupachinga. Chashnami chai runapaj juchamandaca, curallata rupachijunga. Shina rurajpimi, juchataca cunganga.