Read Imbabura Highland Quichua LEVÍTICO 5 Bible Online

LEVÍTICO 5 - Imbabura Highland Quichua bible

LEVÍTICO 5

¹Maijambash imatapash ricushca cajpi, uyashca cajpi chaita villachun cayajpica, ricushca cashpata, uyashca cashpata na villashpaca, chai juchamandami llaquichi tucunga.

²Shinallata maijan cashpapash, mapami nishca imapipash tacarishca cashpaca, mapayashcami canga. Sachapi tiaj mapa animal huañushcapi, na cashpaca charina mapa animal huañushcapi, na cashpaca alpata llucashpa purij mapa animal huañushcapi, na cashpaca na micuna mapa animal huañushcapi tacarishca cashpaca, mapayashcami canga. Chashna rurashca cashpaca, juchata rurashcami canga.

³Na cashpaca, maijambash imamandapash mapayashcapi imapash mapayachinallapi tacarishpami mapayashca canga. Shina mapayashcata jipamanra yachashpaca, nalita rurashcami canga.

⁴Na cashpaca maijan cashpapash, nali yarishpata juramentushpami, alita cashpa nalita cashpapash rurashapachami nishpa, quiquin shimihuan juramentunga. Chashna juramentushpapash, pai na yachashca cashpa, jipamanra yuyaita japishpaca, tucui chai rurashcamandaca, nalita rurashcami canga.

⁵Cai nishcacunamanda maijambipash juchata rurashca cashpaca, chai juchata rurashcataca villanami.

⁶Chai juchamanda Mandaj Diosman cungapaca, paipaj llamacunamanda shuj malta huarmi llamatami apamunga. Na cashpaca shuj malta huarmi chivotami, chai juchamanda apamunga. Curami chai animaltaca, chai juchamanda Diosman cunga.

⁷Maltun jari llamata na charishpaca, juchamanda Mandaj Diosman cungapaca, ishcai urpita, na cashpaca ishcai palomatami apamunga. Shujtaca, juchamanda Diosman cungapaj, caishujtaca Diosman cushpa tucuillata rupachingapajmi apamunga.

⁸Chaicunataca, curamanmi apamunga. Paimi, juchamanda cunatara punda Diosman cunga. Chai animaltaca, cungata cuchushpami huañuchinga. Ashtahuangarin cungataca, na tucuillata fitingachu.

⁹Chai animalpaj yahuartaca, altar quinrai patapimi javinga. Chai puchushca yahuartaca, chai altar chaquipillatami capinga. Chaica, juchamanda cushcami canga.

¹⁰Caishuj animaltaca, imashna rurachun mandashcashnallatami, Diosman cushpa tucuillata rupachinga. Shinami, chai runa juchata rurashcamandaca curallata, Diosman cunga. Chashna rurajpimi, juchataca cunganga.

¹¹Ashtahuangarin ishcai urpita, na cashpaca ishcai palomata na charishpaca, juchata ruraj chai runaca, ishcai kilo yali ashtahuan ali jacutami juchamanda cungapaj apamunga. Juchamanda Diosman cuna jacu cashcamanda, chaipica aceitetapash, inciensotapash na churangachu.

¹²Chai jacutaca, curamanmi apamunga. Chai jacutaca, chai apamuj runata yarichunmi curallata, paipaj maqui jundata japishpa, Mandaj Diosman cushpa rupachijuj altarpi churashpa rupachinga. Chaica, juchamanda cushcami canga.

¹³Juchata maijan rurashca cajpipash, juchamanda cushpa cura rupachijpimi, chai juchataca anchuchinga. Puchushca jacuca, ima micunata Diosman cujpi puchucashnallata curapajmi canga’ ningui” nijurcami.

¹⁴Cashnatapashmi Mandaj Diosca, Moisesman cashna nishpa villajurca:

¹⁵“Maijan cashpapash Mandaj Diosman shicanyachishpa cuna cashcata, pandaimanda na cushpaca, nalitami ruranga. Chai nalita rurashcamandaca, Mandaj Diosman cungapajmi, llamacunamanda imapash na tucushca shuj jari llamata apamunga. Chai jari llamataca, juchamanda Diosman cungapajmi, Diospajlla huasipi culquita pezashcashnallata, can ricushpa mashnata valichishcashnallatami apamunga.

¹⁶Diosman shicanyachishpa cunata na cushca cashpaca, cunapachami. Shina na cushcamandaca, pichacaman ashtahuan mirachishpami, curaman cunga. Ña cujpica curami, chai runamandaca, juchamanda cushpa huañuchishca jari llamata Diosman cushpa rupachijunga. Shina rurajpimi, chai juchataca cunganga.

¹⁷Shinallata maijan cashpapash, caitaca na ruranachu nishpa, Mandaj Dios mandashcamanda maijanda cashpapash na yachaimanda pandashpa rurashpaca, nalitami ruran. Chai juchamandaca, paimi llaquichi tucunga.

¹⁸Chai juchamandaca, can ricushpa mashnata valichishcatami, llamacunamanda imapash na tucushca jari llamata, curaman cungapaj apamunga. Na yachaimanda pandashpa rurashca juchamandaca chai curallatami, Diosman cunga. Shina rurajpimi, chai juchataca cunganga.

¹⁹Mandaj Diosta fiñashpa nalita rurashpaca, juchatapachami rurashca” nijurcami.