Read Imbabura Highland Quichua LEVÍTICO 7 Bible Online

LEVÍTICO 7 - Imbabura Highland Quichua bible

LEVÍTICO 7

¹Shinallata nalita rurashcamanda, Diosman cushpa huañuchina animalca, Diospajlla shicanyachishcami. Chaitaca cashnami mandashca:

²Nalita rurashcamanda Diosman cushca animaltaca, Diosman cushpa tucuillata rupachina animalta, cungata muchushpa huañuchina pushtupillatami, cungata muchushpa huañuchinga. Chai animalpaj yahuartaca, altar jahua muyundipimi tsirapachinga.

³Chai animalpaj tucuilla viratapash, chupatapash, chunllulicunapi tiaj viratapashmi rupachinga.

⁴Shinallata ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungupi tiaj viratapash anchuchinga.

⁵Chaicunataca curami, altarpi rupachinga. Chaica, Mandaj Diosman cushpa rupachishcami canga. Chaica, nalita rurashcamanda Diosman cushcami canga.

⁶Chai aichataca, cura puramanda tucui jaricunami micunga. Diospajlla shicanyachishca pushtupimi micunga. Chaica, Diospajlla shicanyachishcami canga.

⁷Juchamanda cushca animalpash, nalita rurashcamanda cushca animalshnallatami. Chaita rurangapajpash, shujlla mandashcatami charinga. Chai aichaca, juchamanda Diosman cushpa rupachij curapajmi canga.

⁸Maijan apamujpipash, Diosman cushpa tucuillata rupachijuj curami, Diosman cushpa tucuillata rupachina animalpaj carataca japinga.

⁹Shinallata tucui imatalla carashcata jornopi cusashcapash, tucui imatalla sartenbi, na cashpaca uchilla pailapi aliguta yanushcapash, Diosman cushpa rupachij curapajllatami canga.

¹⁰Jacuta aceitehuan chapushca cashpa, na chapushca cashpapash, Diosman cushcacunaca, Aaronbaj tucuilla churicunapajmi canga. Caishujpajpash, chaishujpash, tucuicunapajllatami canga.

¹¹Mandaj Dioshuan ali cangapaj animalta cushpa huañuchinajuchun mandashca shimicunaca, caicunami:

¹²Diosta pashi nishpa cujushpaca, Diosta pashi nishpa Diosman animalta cushpa huañuchina animalpaj randica, aceitehuanlla rurashca levadura illaj, mishqui tandatami cunga. Shinallata aceitetalla jahualla javishpa, levadura illajta rurashca tortillatapash, ashtahuan ali jacuta camllashpa, aceitehuan masashpa rurashca mishqui tandatapashmi cunga.

¹³Dioshuan ali cangapaj Diosta pashi nishpa, animalta huañuchishpa carajushpaca, levadurahuan rurashca mishqui tandacunandimi cunga.

¹⁴Tucui carashcacunamanda shuj ashata japishpami, Mandaj Diosman vichai ricuchishpa cunshnallata cunga. Chaicunaca, Dioshuan ali cangapaj Diosman animalta cushpa huañuchishca animalpaj yahuarta tsirapachij curapajmi canga.

¹⁵Dioshuan ali cangapaj Diosta pashi nishpa, Diosman animalta cushpa huañuchishpaca, chai cushca punllallatami micunga. Chaitaca cayandi punllapaca, ashatallapash na saquinachu.

¹⁶Ashtahuangarin Diosman cushpa huañuchina animalta carashapachami nijushcata pactachishca cajpi, na cashpaca paipaj munai Diosman carashca cajpica, animalta Diosman cushpa huañuchishca punllallatami micunga. Chai puchushcataca, cayandi punllami micunga.

¹⁷Diosman cushpa huañuchishca animalpaj aicha quimsa punllacaman na tucurijpica, chai aichataca rupachinami.

¹⁸Dioshuan ali cangapaj carashpa huañuchishca animalpaj aichata, quimsa punllacaman alichishpa micujpica, maijan chaita carajtaca Diosca na chasquingachu. Chaitaca yangapimi churanga. Chai aichaca, millanayaimi canga. Maijambash chai aichata micushpaca, paipaj juchamandami llaquita apanga.

¹⁹Diosman cushca animalpaj aicha, imapash mapa nishcacunapi tacarijpica, chai aichataca na micunachu. Chaitaca ninapimi rupachina. Diosman cushca aichataca, imapipash na mapayashca tucui gentecunami micunga.

²⁰Ashtahuangarin Dioshuan ali cangapaj carashpa huañuchishca animalpaj aichata maijan cashpapash mapa cashpata micushpaca, Israel puracunamandaca anchuchi tucungami. Chai aichaca, Mandaj Diospajmi.

²¹Shinallata maijan cashpapash imapash mapapi, gentepaj mapapi, na cashpaca animalpaj mapapi, na cashpaca imapash millanayai mapapimi tacarishca canga. Shina cashpata, Dioshuan ali cangapaj carashpa huañuchishca animalpaj aichata micushpaca, Israel puracunamandaca anchuchi tucungami. Chai aichaca, Mandaj Diospajmi’ nishpa villangui” nijurcami.

²²Mandaj Diosca, Moisestaca cashnatapashmi nijurca:

²³“Israelcunaman, cashna nishpa villangui: ‘Cangunaca, huagra viratapash, jari llamapaj viratapash, chivo viratapash na micunachu canguichi.

²⁴Huañushca animalpaj viratapash, sacha animalcuna micushpa fitishca animalpaj viratapash, na micunachu canguichi. Chai virataca, imatapash shuj ruranacunapi rurashpa, ashtahuangarin chaitaca na micunachu canguichi.

²⁵Ashtahuangarin Mandaj Diosman cushpa rupachina animalpaj virata maijambash micushpaca, chai micuj runaca Israel puracunamandaca anchuchi tucungami.

²⁶Shinallata maipi causajushca maijan pushtupipash, ima yahuartallapash na micunachu canguichi. Alasyu animalcunapajta cashpa, shuj animalcunapajta cashpapash, na micunachu canguichi.

²⁷Maijan cashpapash, maijan animalpaj yahuarta micushpapash, chai micuj runaca Israel puracunamandaca anchuchi tucungami’ nishpa villangui” nijurcami.

²⁸Mandaj Diosca, Moisestaca cashnatapashmi nijurca:

²⁹“Israelcunaman, cashna nishpa villangui: ‘Mandaj Dioshuan ali cangapaj animalta carashpa huañuchingapaj apamushpaca, Dioshuan ali cangapaj Diosman carashpa huañuchina animaltaca, Mandaj Diospaj ñaupajman apamuchun.

³⁰Mandaj Diospaj ñaupajpi rupachingapaj caranacunataca, paicunapaj maquihuanllatami apamunga. Paicunaca viratapash, pecho aichandimi apamunga. Chai pecho aichataca, Diosman animalta cushpa huañuchishca aichata, Mandaj Diospaj ñaupajpi vichai cuyuchishpa cunshnallata vichai cuyuchishpa cungapajmi apamunga.

³¹Virataca curami, altarpi rupachinga. Ashtahuangarin pecho aichaca, Aaronbajpash, paipaj churicunapajpashmi canga.

³²Dioshuan ali cangapaj canguna carashpa huañuchishca animalcunapaj ali lado rigra aichataca, vichai ricuchishpa carachun, curaman cunguichi.

³³Aaronbaj churi puramanda maijan cashpapash, Dioshuan ali cangapaj carashpa huañuchishca animalcunapaj yahuarta, chai animalpaj virata Diosman cujushpaca, ali lado rigra aichataca, pai micungapajmi japinga.

³⁴Ashtahuangarin Dioshuan ali cangapaj israelcuna carashca animalcunata huañuchishca pecho aichata vichai cuyuchishpa cushcatapash, rigra aichata vichai ricuchishpa cushcatapash japircanimi. Chaicunataca, Aarón curaman, paipaj churicunamanmi curcani. Chaitaca, tucui causaipi pactachina shimicuna cachunmi, israelcunaman curcani’ nishpa villangui” nijurcami.

³⁵Mandaj Diosman cushpa rupachinamanda Aaronbash, paipaj miraicunapash micuchun cushcacunaca, chaicunami. Mandaj Diosllata, paipajta ruraj curacuna cachun shicanyachishpa churai punllamandapachami chaicunataca, paicuna micuchun curca.

³⁶Mandaj Diosca, Israel puracunamanda agllashpa, curacuna cachun aceiteta talichishpa javishca punllamandapachami, aichacunata paicunaman cuchun mandarca. Caica, paicunapaj tucui miraicunapash, tucui causaipi pactachinajuchun cushca shimicunami.

³⁷Diosman animalta cushpa tucuillata rupachinajuchun, Diosman imatalla caranajuchun, juchamanda animalta cushpa huañuchinajuchun, nalita rurashcamanda animalta cushpa huañuchinajuchun, Diospajlla shicanyachingapaj imashna cunajuchun, Dioshuan ali cangapaj animalta cushpa huañuchinajuchun mandashcacunaca, chaicunami.

³⁸Chai mandashcacunataca, israelcuna Sinaí urcu lado jichushca pambapi cajpimi Mandaj Diosca, Moisesman curca. Mandaj Diosman imagutapash israelcuna carachun mandajui punllapimi cai mandashcataca, Sinaí shuti jichushca pambapi curca.