Read Imbabura Highland Quichua JEREMÍAS 1 Bible Online

JEREMÍAS 1 - Imbabura Highland Quichua bible

JEREMÍAS 1

¹Cai shimicunaca, Hilcías shuti curapaj churi Jeremías villashca shimicunami. Hilcías shuti runaca, Benjamín aillupaj llactapi tiaj, Anatot shuti pueblopi causanajushca cura purami carca.

²Amón shuti runapaj churi jatun mandaj Josiasca, Judá llactataca chunga quimsa huatatami mandajurca. Chai punllacunapimi Mandaj Diosca, Jeremiasman cai shimicunata villarca.

³Josías shuti runapaj churi, Judá llactata jatun mandaj Joacim shuti runa mandajui huatacunapipash, Josías runapajllata churi, Judá llactata jatun mandaj Sedequías shuti runa mandajui chunga shuj huatacamanmi, Jeremiasman rimajurca. Chai huatapaj picha quillapi, Jerusalenbi causajcunata prezu apai tucungacamanmi rimajurca.

⁴Mandaj Diosca, cai shimicunatami cashna nishpa villahuarca:

⁵“Candaca, cambaj mamapaj vijsapi nara tiajpillatami, ña rijsircani. Nara huacharijpillatami candaca, ñucapajlla causachun shicanyachircani. Candaca, ñuca ima nishcata llactacunapai villachunmi churarcani” nihuarcami.

⁶Shina nijpimi, cashna nircani: “¡Aij, aij, Mandaj Jatun Dioslla! Ricui, ñucaca chairalla huambrami capani, rimanatapash nara ali yachanichu” nircanimi.

⁷Shina nijpimi Mandaj Diosca, cashna nihuarca: “Canga ama: ‘Chairalla huambrami capani’ nijuichu. Maiman ñuca cachajpipash, rinallami cangui. Ñuca imata villagrichun mandajpipash, villagrinallami cangui.

⁸Paicunapaj ñaupajpi shayarinataca, na manllanachu cangui. Ñucami candaca, ima llaquimanda quishpichingapajpash, canhuan cani” nishpami, Mandaj Diosca villahuarca.

⁹Shina nishpallami Mandaj Diosca, paipaj maquita chutashpa, ñuca shimipi tacarishpa, Mandaj Diosca cashna nihuarca: “Ricui, ñuca shimicunata villachunmi, cambaj shimipi churani.

¹⁰Ricui, cunan punllamandami candaca, shuj llactacunapi causajcuna, llactacunata jatun mandajcuna ima tucunata villachun churani. Shinallata sapimanda llujchishpa tucuchijuchun, llaquichishpa urmachijuchun, cutin shayachijuchun, tarpunshna alichijuchumbashmi churani” nihuarcami.

¹¹Mandaj Diosca cai shimicunatami, cashna nishpa tapuhuarca: “Jeremías, canga ¿imatata ricujungui?” nijpimi: “Almendro nishca shuj yura malquitami ricujuni” nircani.

¹²Shina nijpimi Mandaj Diosca: “Alipachami ricushcangui. Ñuca imata villashcataca, uchami pactachigrini” nihuarca.

¹³Mandaj Diosca, cutinllatami cai shimicunata cashna nishpa tapuhuarca: “¿Imatata canga ricujungui?” nijpimi: “Shuj manga timbushpa, jahua ladomanda talirimujujtami ricujuni” nircani.

¹⁴Shina nijpimi Mandaj Diosca, cashna nihuarca: “Jahua lado llactamandami, tucui cai llactapi causajcunapajman, jatun llaqui talirimugrin.

¹⁵Ricui, Mandaj Dios ñucami, jahua lado llactacunapi causanajuj tucui familiacunata jatun mandajcuna tandanajuchun cayagrini. Paicuna shamushpami, Jerusalenman yaicuna pungu ñaupajpi, tucui pirca muyundicunapipash, carpacunata shayachinajunga. Shinallata Judá llactapi tiaj tucui pueblo muyundicunapipashmi shayachinajunga.

¹⁶Chai tucui nalicunata rurashpa, paicunallata ñucata saquishcamandami, ninanda llaquichigrini. Paicunaca, na rijsishca shuj dioscunamanmi, inciensota carashpa cushnichinajurca. Paicunapaj maquihuanllata rurashca dioscunatami, ninanda alicachinajurca.

¹⁷Canga, alipacha chumbilishpa shayari. Chai jipaca, paicunaman tucuita ñuca imata rimachun mandashcata rimagrilla. Paicunapaj ñaupajpi shayarinataca, ama manllanguichu. Paicunapaj ñaupajpi candalla saquishpa, ñucapash ama llaquichijuchunmi, chashna shayarina cangui.

¹⁸Ricui, cunan punllallatami, candaca muyundi jatun pircata charij puebloshna, jirru pilarshna, bronce patashna cachun churani. Shinallata Judá llactapi causajcunapaj, jatun mandajcunapaj, caishuj mandajcunapaj, curacunapaj, cai llactapi causajcunapajpash, chashnallata cachunmi churani.

¹⁹Canhuan macanajushpapash, candaca napacha paicunaca mishangachu. Canda quishpichingapaca, ñucami canhuan cani” nihuarcami Mandaj Diosca.