Read Imbabura Highland Quichua JEREMÍAS 10 Bible Online

JEREMÍAS 10 - Imbabura Highland Quichua bible

JEREMÍAS 10

¹Israelcunalla, Mandaj Dios imatalla cangunaman rimashcata uyaichi.

²Mandaj Diosca, cashnami nin: “Shuj llactapi causajcuna rurashcataca, na yachajunachu canguichi. Jahua pachapi imatapash rurashpa ricuchijpi, shuj llactacunapi causajcuna manllarinajujpipash, cangunaca na manllarinachu canguichi.

³Chai gentecunaca, chashnallata rurashpa causajcuna cashpami, yangacunata rurashpa causanajun. Bosquemanda quiruta cuchushpami, ali yachajushca runapaj maquihuan, shuj escopulohuan shuj diosta rurachinajun.

⁴Chai jipaca, aliguta ricurichunmi culquihuan, orohuan jahualla quilpanajun. Ama cuyurichumbash clavohuan, martillohuanmi ali shinllitapacha shayachinajun.

⁵Maipi churajpipash, palmera quirushna na rimashpa upalla shayajunllami. Na purij ushajpimi, maiman cashpapash huandushpa apanajun. Chaicunataca, na manllanachu canguichi. Chaicunaca, ima llaquita ruraitapash na ushanllu. Alita rurangapajpash, na ushaita charinllu” ninmi.

⁶Mandaj Dioslla, canshnalla shujca pipash na tianllu. Canllami jatun cangui, ninan ushaita charij shutimi cangui.

⁷Tucui llactacunata Jatun Mandajlla, ¿candaca pita na manllangayari? Candallami manllanata charinchi. Tucui llactacunapi causanajuj alipacha yachajushca purapipash, tucui jatun mandaj purapipash, canshnalla jatun Diosca na tianllu.

⁸Tucui paicunami, imatapash na rurai ushashpa muspa tucunajunga. Paicunapaj chai yamda caspica, imapajpash nali yangacunatallami yachachijun.

⁹Paicunaca, Tarsis shuti pueblomandaca tacashca culquita, Ufaz shuti llactamandaca, orotami apamunga. Shina apamujpimi, ali yachajushca runapash, yacuyachishpa imatalla ruraj runapash, paipaj maquihuan shuj diosta ruranga. Chaicunamanmi azul, yana puca churajunacunata churachinajunga. Tucui chaicunaca, ali yachajushca runacuna rurashcallami.

¹⁰Ashtahuangarin Mandaj Diosca, na llullaj Taita Diosmi. Paica, causajuj Taita Diosmi, causaita causaicaman Jatun Mandajmi. Ninanda pai fiñarijpica, alpapash chujchunllami, shuj llactacunapi causajcunapash, na causai ushanllu.

¹¹Paicunataca, cashnami nina canguichi: “Jahua pachata, cai pachata na ruraj dioscunaca, cai pacha llactacunamanda chingachun” ninami canguichi.

¹²Cai pachataca Diosmi, paipaj ushaihuan rurarca. Cai pachataca, alipacha yachaihuanmi aliguta jilapi churarca. Alipacha yachaihuanmi, jahua pachatapash churarca.

¹³Pai rimajpillami, jahua pachamandaca ashtaca tamia urmamun. Paillatami, fuyutapash cai pacha juchucunamanda vichai apan. Paica, punchapamba shitamushpami tamiachin. Paillatami huairatapash, huaira tiaj pushtucunamanda llujchin.

¹⁴Tucui gentecunami, yuyai illaj yachai illajcuna tucun. Shuj yanga diosta rurangapaj culquita yacuyachij tucui runacunapash, pingai tucunmi. Imatapash yacuyachishpa paicuna rurashca dioscunaca yangalla llullacunami. Paipica, samaipash na tianllu.

¹⁵Chaicunaca, imapajpash na valij yangallatami. Dios llaquichijui punllacunapica tucuringallami.

¹⁶Ashtahuangarin tucui imatapash Jacoboman caraj Diosca, na chashnachu. Paica, tucui ima tiajtapash Ruraj Diosmi. Israelcunaca, paipajlla varashna cachun agllashcacunami. Paipaj shutica, tucuita Mandaj Diosmi.

¹⁷—Muyundita pircashca pueblopi causajcuna, cai llactapi randishpa jatujcuna imatalla charishcacunata tandachishpa llujshichilla.

¹⁸Mandaj Diosmi, cashna nin: ‘Ricuichi, cunanga, cai llactapi causajcunataca, huaracahuan caruta shitanshnami, ninanda llaquichigrini’ ninmi— nircanimi.

¹⁹—¡Aij ñucalla, ninan llaquihuanmi cani. Ñuca chugritaca, ninandapachami nanajun. Ashtahuangarin ñucaca: ‘Cai ung:uica, ñucataca japinallatami cashcanga. Cai ung:uitaca, apanallami cani’ yajurcanimi.

²⁰Ñuca carpapash, tucuilla urmashcami sirijun. Ñuca huascacunapash, tucuillami fitirishca. Ñuca huahuacunapashmi jichuhuarca, paicunaca ñami huañushpa tucurirca. Ñuca carpata cutin shayachingapaca, pipash na tianllu. Cortinacunata huarcungapajpash, pipash na tianllu.

²¹Michij runacunapash, juizu illaj tucushpami, Mandaj Diostaca na mascanajurca. Chaimandami, ima alita ruraitapash na usharca. Paicunapaj tucui animalcunapash, caita chaitami rinajurca.

²²Ricuichi, Judá llactapi tiaj tucui pueblocunata jichushcata saquingapajmi, jahua lado llactamandaca manllanayaita, ninanda caparishpa shamunajun. Chai pueblocunataca, chunlunlla pushtucunapi causanajuj chacal nishca animalcuna causachunllami saquinajunga— nircanimi.

²³Mandaj Dioslla, runapaj causaica na paipajchu. Pipash quiquin causaitaca, na mandai ushanllu. Chaitaca yachapanimi.

²⁴Shina cashcamandaca Mandaj Dioslla, llaquichihuailla. Ashtahuangarin ama tucuilla tucuchingapaca, ama ninandapacha fiñarishpa, ricushpalla llaquichihuangui.

²⁵Canda na rijsij gentecunata, cambaj shutipi na mañaj llactacunataca, can fiñashcata talimunshna llaquichipairi. Paicunami, Jacobopaj miraicunataca micushpa, langashpa huañuchishpa tucuchinajun. Paicuna causana huasitapash, llaquinayaita tucuchishpami saquinajun.