Read Imbabura Highland Quichua JEREMÍAS 12 Bible Online

JEREMÍAS 12 - Imbabura Highland Quichua bible

JEREMÍAS 12

¹Mandaj Dioslla, canga ñuca imata nijujpipash, cashcatapachami tigrachingui. Ashtahuangarin caigutallami tapungapaj munapani: ¿Imashpata canda na manllajcuna cashpapash, tucuipi ali llujshinlla? Canda na cazujcunapash, tucuicunami aliguta causanajun.

²Can tarpujpica, ucuman sapiyashpa viñashpami granoca fucurca. Candaca, shimi jahuallami charin. Ashtahuangarin paicunapaj shungumandaca, carupimi cangui.

³Mandaj Dioslla, ashtahuangarin ñucataca rijsihuanguimi. Cambaj ñaupajpi ñuca shungu ali cajtapash, canllata ricushpa yachahuanguimi. Paicunataca, llamacunata cungata muchungapaj apanshna llaquiman apairi. Paicunata huañuchina punllata ricuchiyari.

⁴¿Ima punllacamanshi ñucanchi llactapash jichushca pambashna, tucuilla pambacunapi jihuacunapash chaquishca siringa? Cai llactapi causajcuna nalita rurashcamandami animalcunapash, alasyu animalcunapash huañushpa tucurirca. Paicunaca: “Taita Diosca, ñucanchi causaitaca na ricungachu” nishpami, chashna ruranajurca.

⁵“Candaca, chaquilla calpajcunahuan calpajpillatami, yapata shaijuchirca. Caballopi tiarishpa calpajcunahuangarin, ¿maitashi ushangui? Cai llactapi casilla ali causai tiajpipash, manllashpami purijurcangui. Jordán yacu manña sachapi cashpacarin, ¿imatashi rurangui?

⁶Cambaj huauquicunallata, cambaj taitapaj huasi ucu purallatami, canda huañuchingapaj jatarinajurca. Paicunallatami, canda japingapaj caparishpa catinajurca. Imata cashpapash, paicuna aliguta rimajpilla ama chasquinguillachu.

⁷Ñuca huasi ucu purashna gentecunataca saquircanimi. Ñucapaj cachun ñuca agllashcacunatapash jichurcanimi. Tucui almahuan ñuca juyashcacunataca, paicunata fiñajcunapaj maquipimi churarcani.

⁸Ñucapaj cachun ñuca agllashcacunaca, sachapi causajuj leonshnami, ñucataca jariyanajun. Ñucata fiñashpami, leonshna huacanajurca. Chaimandami, paicunataca na millanayachini.

⁹Ñucapaj cachun ñuca agllashcacunaca ñucapaca, tauca color plumata charij millai angashnami. ¿Nachu paita huañuchishpa micuj millai angacunaca muyunajun? Sachapi causaj millai animalcunaca, paicunata langanshna tucuchingapaj, tucuilla tandanajushpa shamuichi.

¹⁰Ashtaca michijcunami, ñucapaj uvas chagrataca tucuchishca. Ñucapaj alpatapashmi, sarushpa saquinajurca. Ñucapaj juyailla alpacunatapashmi, llaquinayaita tucuilla tucuchishpa, chunlunlla pushtutashna saquinajurca.

¹¹Aliguta rurashpa causanataca shuj runallapash na yarijpimi, tucui llactata llaquinayaita tucuchircani. Llaquinayaita tucuchinajuchun saquijpimi, ñuca jichushcacunaca huacanajurca.

¹²Jichushca pambapi tiaj tucui lomacunamandami, tucuchij runacunaca shamunajurca. Mandaj Dios ñucami, cai llactapi causajcunataca, caishuj ladomanda callarishpa, chaishuj ladocaman ñuca espadahuan langanshna tucuchigrini. Chaipica, pipajpash casilla ali causaica na tiangachu.

¹³Trigota tarpushpapash, cashatallami tandachinajurca. Paicunaman carashca ali alpagupi causanajushpapash, ima alitapash na japinajurcachu. Mandaj Dios ñuca ninandapacha fiñarijpica, paicuna ima nalita rurashcamandami, pingai tucunajunga.

¹⁴Ñuca agllashca israelcunaman carashca llactatami, ñuca ladolla llactacunapi causanajuj, nalita ruraj runacunaca quichunajun. Chaimandami Mandaj Dios ñucaca, paicunataca cashna nini: Ricuichi, paicunapaj llactamandaca llujchishpami cachasha. Shinallata Judá llactapi causajcunatapash, paicunapaj chaupimandami llujchisha.

¹⁵Paicunata llujchishpa cachashca jipami, ñucallata cutin paicunataca llaquisha. Shina llaquishpami paicunapaj alpaman, paicunapaj llactaman tigrachimusha.

¹⁶Ñuca agllashca gentecuna imatalla rurashpa causashcata aliguta yachajushpaca: ‘Mandaj Diosca causajumbachami’ nishpa, ñuca shutipi juramentunatami yachajunga. Ñuca agllashca gentecunaman, Baal shuti diospaj shutipi juramentuchun yachachishcashnallatami yachajunga. Chashnami paicunaca, ñuca agllashca gentecunapaj chaupipica, tucuipi ali llujshinga.

¹⁷Ashtahuangarin ñucata na cazujpica, chai gentecunataca sapimanda llujchinshnami tucuchisha” ninmi Mandaj Diosca.