Read Imbabura Highland Quichua JEREMÍAS 14 Bible Online

JEREMÍAS 14 - Imbabura Highland Quichua bible

JEREMÍAS 14

¹Na tamiajpimi Mandaj Diosca, cai shimicunata cashna nishpa Jeremiasman villajurca:

²“Judá llactaca, yanata churajushcashnami tucurca. Pueblo pungucunapica, maijan gentellapash na ricurijpimi, chaipi causajcunaca ninanda llaquirishpa alpapi tiarinajurca. Jerusalenmanda paicuna caparishcapash, jahuacamanmi uyarirca.

³Alicachi tucushcacunaca, paicunata servijcunatami yacuman cachanajurca. Paicunaca, cuchaman shamushpapash yacutaca na tarishpami, chushaj funducunahuan tigranajurca. Shinamandami, ninanda pingai tucushpa, musparishpa umata quilparinajurca.

⁴Chai llactapi na tamiajpi, alpa chijtarijta chaquijpimi, alpata trabajajcunaca ninanda musparishpa, umata quilparishpa purinajurca.

⁵Jihua chaquishcamandami tarugacunapash, pambapi huahuata huachashpaca, chai pushtupillata saquishpa rinajurca.

⁶Sacha burrocunapash, jichushca pamba lomacunaman vichai rishpami, chacal nishca animalcunashna, huairatalla japinajurca. Jihua illajpimi, ñavipash amsajyashpa urmanajurca” nijurcami.

⁷Mandaj Dioslla, ñucanchi juchacunallatami ñucanchi nali cajtaca ricuchijun. Shina cajpipash cambaj shutita juyaimandalla quishpichihuayari. Ñucanchi na cazushpa juchata rurashcacunaca, ashtahuanmi mirarca. Canda fiñashpami, juchatalla rurashcanchi.

⁸Israelcuna yariajlla causana Dioslla. Paicunata llaqui japijpipash, canmi huacaichin carcangui. ¿Imashpata cunanga, caru llactamanda shamuj runashna, shuj tutalla pacarishpa llujshijlla runashna tucurcangui?

⁹¿Imashpata manllarishpa musparij runashna cangui? ¿Imashpata ninan shinlli runa cashpapash, na mitsai ushanshna cangui? Shina cashpapash Mandaj Dioslla, canga ñucanchihuanmi cangui. Ñucanchimandami, cambaj shutigupica mañapan. Ñucanchitaca, ama jichushpa saquihuaichu.

¹⁰Mandaj Diosca, cai gentecunamandaca cashnami nirca: “Paicunaca caiman, chaiman yanga purinatallami munan. Paicunapaj chaquitapash, na samachircachu. Chaimandami Mandaj Dios ñucaca, paicunahuanga na cushijuni. Cunanga, paicuna rurashca juchacunata yarishpami llaquichigrini” nircami.

¹¹Mandaj Diosca, cashnatapashmi nihuarca: “Ñucataca, cai gentecunaman alita rurapai nishpaca, ama mañajuhuaillachu.

¹²Paicuna na micushpa caparishpa mañanajujpipash, ñucaca napacha uyashachu. Ñucaman animalcunata cushpa tucuillata rupachijpipash, imata carajpipash napacha chasquishachu. Ashtahuangarin espadahuan, yarjaihuan, jatun ung:uihuanmi tucuchisha” nihuarcami.

¹³Shina nijpimi, ñucaca cashna nircani: “¡Aij, aij, Mandaj Jatun Dioslla! Ricui, canmanda villajcunaca, cashnami ninajun: ‘Espadahuan huañuchi tucunapash, na tiangachu. Canguna purapica, yarjaipash na tiangachu. Ashtahuangarin cai llactapica, na llullashpami casilla ali causaita Diosca caranga’ nishpami villanajun” nircanimi.

¹⁴Shina nijpimi, Mandaj Diosca cashna nihuarca: “Chai villajcunaca llullashpallami, ñuca shutipi villanajun. Paicunataca, imatallapash na nishpa cacharcanichu. Muscuipishnapash na ricushpatami, llullashpalla paicunapaj shungupi yanga yarishcatalla umachishpa villanajun.

¹⁵Ñuca na cachamujpitami: ‘Cai llactapica, espadahuan huañuchi tucunapash, yarjaipash na tiangachu’ nishpa, llullashpalla ñuca shutipi villanajun. Shinamandami Mandaj Dios ñucaca, paicunataca cashna nini: Chai villajcunaca espadahuan, yarjaihuanllatami huañushpa tucurinajunga.

¹⁶Paicuna villashcata uyajcunapash, Jerusalén ñangunapimi shitai tucunajunga. Yarjaimanda huañushca cajpipash, espadahuan huañuchi tucushca cajpipash, paicunataca pipash na pambangachu. Shinallata paicunapaj huarmicuna, churicuna, ushicuna huañujpipash, pipash na pambangachu. Paicuna nalita rurashcamandami, paicunapaj jahuapillata llaquita talinshna cachamusha.

¹⁷Paicunataca, cashna nigri: ‘Ñuca llactapi causajcunapaca, jarihuan nara tacarishca cuitsashna cajpipash, ninan llaquimi chayamurca. Yapa jatun nanaimi japirca. Cunanga tutapash, punllapash huacajushallami. Ñuca ñavimanda viquica talirijungallami.

¹⁸Pambaman llujshishpapash, espadahuan huañuchi tucushcacunatallami ricuni. Puebloman yaicushpapash, yarjaimanda ungushcacunatallami ricuni. Villajcunapash, curacunapashmi, ima tucunatapash na yachashpa, cai llactapica yangata purinajurca’ nishpa villai” nihuarcami.

¹⁹Judá llactapi causajcunataca, ¿tucuicunatachu jichurcangui? ¿Sion shuti pueblotapash, tucui almahuanllu millanayachircangui? ¿Imashpata imahuambash na jambiri ushanallata ñucanchitaca chugrichircangui? Casilla ali causaita shuyanajujpipash, ima alipash na tiarcachu. Nanaimanda jambirina punllacunatami shuyanajurcanchi. Ricuichi, ashtahuangarin musparinallami tian.

²⁰Mandaj Dioslla, ñucanchipash, ñucanchi taitacunapash, canda na manllashpa jatun nalita rurashcamandaca, ninandami llaquiripanchi. Canda fiñashpami, juchata rurapashcanchi.

²¹Cambaj shutita juyaimanda, ñucanchitaca ama jichuichu. Can mandashpa tiajuj, punchapamba tiarinatapash ama nalicachipaichu. Ñucanchihuan ari ninajushcatapash yaripairi. Chaitaca, ama yangapi churapaichu.

²²¿Shuj llactapi causajcunapaj yanga dios puracunapica, pipash tamiachi ushanllu imashi? ¿Jahua pachapash, tamiataca caramui ushangachu? ¿Nachu canga, ñucanchita Mandaj Taita Dios cangui? Cai tucui imalla tiajcunataca, canmi rurarcangui. Shinamandami candalla shuyanajunchi.