Read Imbabura Highland Quichua JEREMÍAS 15 Bible Online

JEREMÍAS 15 - Imbabura Highland Quichua bible

JEREMÍAS 15

¹Mandaj Diosca, cashnami nihuarca: “Moiseshuan, Samuelhuan ñuca ñaupajpi shayarijpipash, cai gentecunahuanga ñuca shungupica, napacha ali cai ushaimanllu. Ñuca ñaupajmanda can llujshishpa cachajpica, paicunaca richunlla.

²‘¿Maimanda rishunyari?’ nijpica, cashna ningui: Mandaj Diosca, cashnami nin: ‘Huañunapachami nishcacunaca huañugrichunlla. Espadahuan huañuchi tucuna nishcapash, espadapi huañuchi tucuchunlla. Yarjaimanda huañuna nishcapash, yarjaimanda huañuchunlla. Prezu apai tucuna nishcapash, prezu apai tucuchunlla’ ninmi ningui” nihuarcami.

³Mandaj Diosca, cashnatapashmi nin: “Chuscu jatun llaquicunatami, paicunaman cachamugrini. Espadataca huañuchijuchun, alcucunataca caiman chaiman fitishpa micuchunmi cachamusha. Shinallata jahuata rij alasyu animalcunata, sacha animalcunatapashmi langashpa tucuchinajuchun cachamusha.

⁴Shinallata tucui shuj llactacunapi mandajcuna ricushpa manllarinajuchunmi, jatun llaquipi churagrini. Paicunaca, Ezequías shuti runapaj churi Manasés shuti runa, Judá llactata jatun mandaj cashpa, Jerusalenbi nalita rurashpa causashcamandami, chashna tucunga.

⁵Jerusalenbi causajcunalla, ¿pita cangunataca llaquingayari? Llaquita canguna apajujpica, ¿pita ninanda llaquiringayari, na cashpaca alillachu canguichi ningapajllapash, pita shamungayari?” ninmi.

⁶Mandaj Diosca, cashnatapashmi nin: “Cangunami, ñucata jichushpa, huashaman tigrarcanguichi. Chaimandami, ñuca maquita chutashpa tucuchigrini. Na llaquichishpa charijushpapash, ña shaijunimi.

⁷Ñuca agllashcacunaca, huairachinahuan huairachishpa llactamanda llujshijta caita chaita cachajpipash, huahuacuna illajta saquijpipash, tucuillata tucuchijpipash, nalita ruranataca napacha saquinllu.

⁸Mama cucha manñapi tiaj t'iyu alpatapash yalimi ashtaca huarmicuna, cusa illaj tucunajurca. Huañuchij runacunataca, chaupi punllapi apamushpami, mamacunatapash, huahuacunatapash huañuchinajuchun mandarcani. Chai pueblopica, cungashcapi jatun manllarinacuna urmachunmi saquircani.

⁹Canchis churicunata charij huarmipash, tucui almahuan llaquirishpami, huañungashna tucurca. Indica, jahuapi cajpillatami, paipica ña tutayashcashna carca. Pingai tucushpami, ninanda pandarijurca. Paipaj huahuacunamanda huaquin puchushcacunatapash, paicunata fiñajcunapaj ñaupajpi espadahuan huañuchi tucunajuchunmi saquisha” ninmi Mandaj Diosca.

¹⁰¡Aij, ñucalla, ñuca mamitalla! Ñucataca, tucui cai llactapi causajcunahuan fiñanajuchun, rimanajuchunllami unguhuashcangui. Ñucaca, pimanllapash culquitaca na mañachircanichu. Mañaitapash na pitapash mañarcanichu. Ashtahuangarin ñucataca tucuicunami, ima llaquipash japishpachari ali canman ninajuhuan.

¹¹¡Mandaj Dioslla, ñucata fiñajcunata llaqui japijpi, paicuna ninan llaqui purijui huatacunapimi, paicunata ayudachun canda mañarcani! ¡Paicunamanda na chashna mañashca cajpica, paicuna ñucata llaqui japichun nishcashna pactachunlla!

¹²“Jahua lado llactapi tiaj jirruta, broncetaca, ¿pipash faqui ushangachu?

¹³Cangunapaj tucui juchacunamandaca, cangunapaj tucui llactapi imalla tiashcacunata, ima juyailla charishcacunataca, shuhuacunapaj maquipimi, paicuna imata na cujpipash, yanga apachun saquisha.

¹⁴Cangunataca, na rijsishca llactapi cangunata fiñajcunata servishpa causanajuchunmi cachagrini. Cangunahuanga, nina japirinshnami ninandapacha fiñarircani. Chai ninami, cangunataca tucuchinga” ninmi.

¹⁵Mandaj Dioslla, ñucataca yarishpa ricuj shamuhuayari. Ñucaca canda juyaimandami, llaquinayaita pingai tucushca causajuni. Chaitaca, canllata yachanguimi. Ñucata fiñajcunataca, ñucata llaquichishcashnallata llaquichipairi. Ama ashtahuan ashtahuan fiñashpa jichuhuaichu.

¹⁶Cambaj Shimita ñucaman cujpica, ñucaca micurcanimi. Cambaj Shimica, ñuca shungupi ninandapacha cushichingapajmi carca. Tucuita Mandaj Dioslla, cambaj shutita ñucamanda alicachinajujpi, chashna carca.

¹⁷Asishpa ricujcunahuanga, na tandanajushpa tiarinllu carcani. Can ima nishcata villaj cashcamandapash, na jariyarcanichu. Can fiñashcata ñuca shungupi jundachijpimi, ñucalla tiajurcani.

¹⁸¿Imashpata ñuca nanaica, ñuca tucui causaipi tiarca? ¿Imamandata na ali tucunalla ñuca chugrica, ima jambihuambash na ali tucun? ¿Ñucapaca, imapash ricurishcandi chinganshna, llujshishcandi chaquijlla yacushnachu cagringui? nircanimi.

¹⁹Shina nijpimi Mandaj Diosca, cashna nihuarca: “Can ñucapajman tigrarijpica, ñucaca candaca cutin alichishami. Shina rurajpica, ñuca ñaupajpimi causangui. Imapajpash na valij parlocunata saquishpa, ali shimicunatalla parlashpaca, ñuca ima nishcatapash cutin villanguimi. Canga, na paicunapajman tigrarinachu cangui. Ashtahuangarin paicunami, cambajman tigraringa.

²⁰Shina rurajpica, cai gentecunapaj ñaupajpica, jatun bronce patatashnami candaca churasha. Canhuan macanajungapaj shayarishpapash, napacha mishai ushangachu. Canda cuidangapaj, mitsangapaca ñucallatami canhuan casha. Mandaj Dios ñucallatami, chashna nini.

²¹Ninan shinlli, nalita ruraj runacunapaj maquimandapash quishpichishpa huacaichishallami” nihuarcami.