Read Imbabura Highland Quichua JEREMÍAS 16 Bible Online

JEREMÍAS 16 - Imbabura Highland Quichua bible

JEREMÍAS 16

¹Mandaj Diosca, cai shimicunatami cashna nishpa villahuarca:

²“Canga, cai llactapica ama cazaranguichu. Churicunata, ushicunatapash ama charinguichu.

³Cai llactapi huacharishca churicunamanda, ushicunamanda, paicunata unguj mamacunamanda, cai llactapi paicunapaj taitacunamandaca, Mandaj Dios ñucami, cashna nini:

⁴Ninanda nanachij ung:uicunahuanmi huañunajunga. Paicunamandaca, pipash na caparishpa huacangachu. Paicunataca, pipash na pambangachu, huanushnami alpapi sirinajunga. Paicunaca espadahuan, yarjaihuanmi tucuchi tucunga. Paicunapaj cuerpocunaca, jahuata rij alasyu animalcunapaj, sacha animalcunapaj micunami canga” nihuarcami.

⁵Mandaj Diosca, cashnatapashmi nihuarca: “Huañushca cajpi, yanata churajushca tianajuj huasipica, ama yaicunguichu. Chaipi huacangapajpash, huacanajujpi cushichingapajpash ama yaicunguichu. Cai gentecunamandaca, ñuca cushca casilla ali causaitapash, llaquinatapash, juyanatapash ñucallatami anchuchircani. Mandaj Dios ñucami, cashna nini.

⁶Cai llactapica jatungunapash, uchillacunapashmi huañunga. Paicunataca, pipash na pambangachu, paicunamandaca pipash na caparishpa huacaj shamungachu. Paicunamandaca, pipash na churajunata liquingachu, uma ajchatapash na ruturingachu.

⁷Huañushcamanda llaquilla cajpi cushichingapaca, ima micunatallapash pipash na carangachu. Taita huañujpi, na cashpaca mama huañujpi cushichingapaca, pipash na ima ufianatallapash carangachu.

⁸Shinallata maijan huasipi jatun micui tiajpipash, chaiman paicunahuan tiarishpa micungapaj, ufiangapaca ama yaicunguichu” nihuarcami.

⁹Tucuita Mandaj, israelcunapaj Taita Diosllatami, cashnatapash nin: “Ricuichi, canguna causajui punllacunapica, cai llactamandaca tucui cushijuihuan candanatapash, ninan cushijuihuan caparinatapash, cusayu tucushpa, huarmiyu tucushpa, cushijushpa tucui candanatapash, cangunapaj ñaupajmandaca chingachishami.

¹⁰Cai gentecunaman tucui caicunata can villajpica, cashnami ninajunga: ‘Mandaj Diosca, ¿imashpata ñucanchitaca, chashna jatun llaquihuan llaquichisha nishpa villachijunyari? Ñucanchica, ¿ima nalitata rurashcanchiyari? Na cashpaca, ¿ima juchata rurashpata, ñucanchita Mandaj Taita Diostaca fiñachishcanchiyari?’ ninajungami.

¹¹Shina nijpica, cashna ningui: Mandaj Diosca, cashnami nin: ‘Cangunapaj taitacunami, ñucata saquishpa, shuj dioscunatara catishpa servinajurca. Paicunapaj ñaupajpi cungurishpami, ñucata saquishpa, ñuca mandashcataca na pactachinajurca.

¹²Cangunacarin, cangunapaj ñaupa taitacunatapash ashtahuan yali nalicunatami rurarcanguichi. Ricuichi cangunaca, ñucata na uyanayachishpami, cangunapaj nali shungu munashcata rurashpa, tucuicuna causanajunguichi.

¹³Shinamandami ñucaca, cangunapash, cangunapaj ñaupa taitacunapash na rijsishca llactaman llujchishpa cachagrini. Chai llactapimi tutapash, punllapash shuj dioscunata servishpa causanguichi. Cangunataca napacha llaquishachu’ ninmi ningui” nihuarcami.

¹⁴Mandaj Diosllatami, cashnatapash nin: “Ricuichi, ashtahuangarin: ‘Israelcunata, Egipto llactamanda llujchimuj Mandaj Diosca causajumbachami’ ninatami yachanguichi. Shina cajpipash, chashna nina punllacunaca na ashtahuan chayamungachu.

¹⁵Ashtahuangarin cangunapaj ñaupa taitacunaman carashca llactaman ñuca tigrachimujpica, cashnami ninajunga: ‘Jahua lado llactamandapash, tucui shuj llactacunaman cachashcamanda, israelcunata cutin tigrachimuj Mandaj Diosca causajumbachami’ ninajungami” ninmi.

¹⁶Mandaj Diosca, cashnatapashmi nin: “Ricuichi, pijita japinshna japichunmi, ashtaca runacunata cachamugrini. Chai jipaca, tucui urcucunamanda, tucui lomacunamanda, jaca ucu utujucunamandapash, sacha animalcunatashna, ashtaca runacunata japinga.

¹⁷Ñucaca, paicuna imatalla rurashpa causanajujtapash, tucuitami ricujuni. Ñucamandaca, imallapash na pacalla tiai ushanllu. Paicuna nalita rurashcacunapash, ñuca ñavimandaca napacha pacalla tiai ushanllu.

¹⁸Ashtahuangarin pundaca, paicuna jatun nali juchata ruranajushcamandaca, chai rurashcatapash ashtahuan yalitami cusha. Paicunapaj huañushca, yanga dioscunahuanmi, ñuca alpataca mapayachinajurca. Ñuca carashca llactapimi, chai millanayaicunata jundachinajurca” ninmi.

¹⁹Mandaj Dioslla, canmi ñucapaj shinlli torreshna ñucaman ushaita caraj cangui. Llaqui japijui huatacunapipash, canmi ñucata pacaj cangui. Cai pacha tucuri manña llactacunamandami cambajman shamushpa, cashna ninajunga: “Ñucanchi taitacunaca, imapash llullacunata, yanga dioscunatallami charishca. Chaicunaca, yangallatami. Paicunamandaca, ima alipash na shamushcachu.

²⁰¿Runaca, paipaj dioscuna cachun rurai ushangachu? Ashtahuangarin chaicunaca, na dioscunachu” ninajungami.

²¹“Ricuichi, shinamandaca cunanmi, ñuca maquitapash, ñuca ushaitapash, paicunaman rijsichigrini. Shina rurajpimi ñucataca, Mandaj Dios shuti cajta yachanajunga” ninmi.