Read Imbabura Highland Quichua JEREMÍAS 19 Bible Online

JEREMÍAS 19 - Imbabura Highland Quichua bible

JEREMÍAS 19

¹Mandaj Diosca, cashnami nihuarca: “Alpa mangata rurajpajman rishpa, shuj mangata randigri. Shinallata Jerusalenbi causaj mandaj rucucunatapash, curacunata mandaj rucucunatapash pushangui.

²Chai jipaca, indi llujshimuj ladopi tiaj pungu yaicuna ladoman, Hinom shuti runapaj churipaj pugru pambaman pushangui. Chaipica, ñuca imatalla villachun mandashcacunata caparishpa villangui.

³Paicunata cashna ningui: ‘Judá llactata jatun mandajcunapash, Jerusalenbi causajcunapash, Mandaj Dios rimashcata uyaichi. Tucuita Mandaj, israelcunapaj Taita Diosca, cashnami nin: Ricuichi, ñucami cai llactaman ninan llaquita apamugrini. Chai llaqui shamunata uyajcunaca, rinritami nanachinajunga.

⁴Paicunaca, ñucamanda anchurishpami, cai llactatapash shujpaj maquipi churanajurca. Paicunapash, paicunapaj taitacunapash, Judá llactata jatun mandajcunapash na rijsishca, shuj dioscunamanmi inciensota carashpa cushnichinajurca. Shinallata ima nalita rurashcapash na ricurij runacunata huañuchishpami, caipica yahuarta jichanajurca.

⁵Shinallata Baal shuti dioscunaman, paicunapaj churicunata cushpa, tucuillata rupachingapaj altarcunata ruranajurca. Chaicunata rurachunga, na mandarcanichu, imatallapash na nircanichu. Chaitaca, yaritallapash na yarircanichu.

⁶Chaimandami Mandaj Diosca, cashna nin: Cai pushtutaca, Tofet shuti pugru pamba, Hinom shuti runapaj churipaj pugru pamba nishpallapash, na rimana punllacunami chayamunga. Ashtahuangarin Huañuchina Pambami ninajungami.

⁷Judá llactapi causajcuna, Jerusalenbi causajcuna, cai pambapi imata yarinajushcatapash yangapimi churasha. Paicunata huañuchingapaj munaj runacunapaj maquipi churashpami, chai fiñajcunapaj ñaupajpi espadahuan huañuchi tucunajuchun saquisha. Chai huañushcacunataca, jahuata rij alasyu animalcunaman, sachapi causaj animalcunamanmi carasha.

⁸Cai pueblotaca, tucuicuna manllarichun, asishpa ricuchunmi rurasha. Pipash caita yalijushpa, cai pueblo tucuchi tucushcata ricushpaca manllarishpa, asishpami ricunga.

⁹Caipi causajcunataca, paicunapaj churicunapaj, ushicunapaj aichatallatami micuchisha. Paicunata huañuchingapaj munaj, paicunata fiñaj runacuna shamushpa, cai pueblo muyundipi chapashpa quichijimujpimi, imatapash na rurai ushanajushpa, paicunapaj cumbacunatallata micunajunga.

¹⁰Chai jipaca, canhuan rishca rucucuna ricujta chai mangataca faquinguilla.

¹¹Shinallata paicunataca cashna ningui: Tucuita Mandaj Diosca, cashnami nin: Caipi causajcunatapash, cai pueblotapash, chashnallatami yapushpa ñutugrini. Alpa mangata maijambash faquijpi, cutinga na alichita ushanatashnami saquigrini. Huañushcacunatapash maipi pambana pushtullapash na tiajpimi, chai Tofet shuti pambapillata pambanajunga.

¹²Ñucaca cai pueblotaca, Tofet shuti pambatashna rurashpami, caipi causajcunataca chashna llaquichigrini.

¹³Jerusalenbi tiaj huasi jahua patiocunapipash, Judá llactata jatun mandajcunapaj huasi jahua patiocunapipashmi, jahua pachapi tiaj tucui luzerocunaman inciensota carashpa cushnichinajurca. Chashnallata shuj dioscunamambash, vinota carashpami talinajurca. Chaimandami chai tucui huasicunaca, ñuca ñaupajpica, Tofet shuti pambashnallata mapayashca’ ninmi ningui” nihuarcami.

¹⁴Dios villashcata, Tofet shuti pambapi villachun, Mandaj Dios mandashcata villashca jipaca Jeremiasca, Mandaj Diospaj huasimanmi tigrarca. Chai huasi canlla patiopi shayarishpami, chaipi tucui tandanajushcacunataca cashna nirca:

¹⁵“Tucuita Mandaj, israelcunapaj Taita Diosca cashnami nin: ‘Ricuichi ñucaca, cai pueblopajpash, uchilla pueblocunapajpash, tucui jatun llaquitami apamusha nishcataca, ñami apamugrini. Paicuna ninanda shinlliyashcacunapacha tucushpa, ñuca rimashca shimicunata napacha uyashcamandami, chashna llaquichigrini’ ninmi” nircami.