Read Imbabura Highland Quichua JEREMÍAS 2 Bible Online

JEREMÍAS 2 - Imbabura Highland Quichua bible

JEREMÍAS 2

¹Mandaj Diosca, cai shimicunatami cashna nishpa villahuarca:

²“Ri, Jerusalenbi causajcuna uyajta, cashna nishpa caparigri: Mandaj Diosca, cashnami nin: ‘Ñucaca canda yarinimi. Canga, huambrara cashpaca, ñucataca aligutami cazujurcangui. Ñucahuan chairalla cazarashshpaca, ñucata juyarcanguimi. Chaimandami, ima tarpushcapash na tiaj, jichushca pambapipash, ñucata catishpa purircangui.

³Israelcunaca, Mandaj Dios ñucapajlla shicanyachishcami carca. Chagrapi punda fucushca granocunata tandachishcashnami carca. Paicunata tucuchijcunaca, tucuicunami llaquita apanapacha carca. Jatun llaquicunami, paicunataca japina carca’ ninmi Mandaj Diosca nigri” nihuarcami.

⁴Jacobopaj mirai tucui Israel familiacunalla, Mandaj Dios imata nijushcatapash uyaichiyari.

⁵Mandaj Diosca, cashnami nirca: “Cangunapaj ñaupa taitacuna ñucamanda anchuringapaca, ¿ñucapica ima nalitata tarishcanga? Paicunaca, imatapash na rurai ushaj, yanga dioscunata catishpami, yangacuna tucunajurca.

⁶Paicunaca: ‘¿Egipto llactamanda ñucanchita llujchimuj Mandaj Diosca, maipitayari? Paica, jichushca, pipash na causaj pambacunata, huañui japinalla llandu, chaquishca pambacunata, pipash na purishca, chaipica pipash na causashca llactatami, ñucanchitaca pushamurca’ nitallapash na ninajurcachu.

⁷Ñucami cangunataca, ima alicunatapash charichun, chagracunapi fucuj juyailla granocunata micushpa causanajuchun, tucuipash tiaj cai llactaman pushamurcani. Ashtahuangarin canguna yaicushpami, ñuca llactataca mapayachircanguichi. Ñuca carashca alpatapash, millanayaitami rurarcanguichi.

⁸Curacunapash: ‘¿Mandaj Diosca maipitayari?’ nitallapash, na ninajurcachu. Ñuca mandashca shimita charijcunapash, ñucataca na rijsihuarcachu. Michijcunapash ñucataca fiñarcami. Ñucamanda villajcunapash, Baal shuti diospaj shutipimi villanajurca. Chashnashpami, imatapash na ayudaj dioscunatara catinajurca” nircami.

⁹Mandaj Diosca, cashnatapashmi nin: “Chaimandami, cangunahuanga fiñarishpa rimagrini. Cangunapaj miraicunapaj huahuacunahuambashmi rimarisha.

¹⁰Yacu manñapi tiaj Quitim shuti llactaman cangunallata rishpa ricuichiyari. Cedar shuti llactamambash, aliguta ricushpa tigramuchun cachaichiyari. Maipipash canguna rurashcashna ruranajunllu, ali ricuichiyari.

¹¹Shuj llactapi causajcunaca, paicuna rurashca dioscunata, na dios cajpipash, ¿chai dioscunata saquishpa, shuj dioscunatara catinajujta ricushcanguichichu? Ashtahuangarin ñuca agllashcacunaca, paicunata juyaillata ruraj Diosta saquishpami, imatapash na ayudaj dioscunapajman tigranajurca.

¹²Caita ricushpaca, jahua pachapash manllarishpa chujchuilla, llaquinayaita tucurilla. Mandaj Dios ñucallatami, chashna nini.

¹³Ñuca agllashcacunaca, ishcai jatun nalitami ruranajurca: Pundaca, causaita cuj yacu llujshijuj pugyushnalla, ñucatami jichuhuarca. Chai jipaca, yacupash na tandanajunalla, chijtarishca utujucunatami, yacu tandanajuchun allanajurca.

¹⁴Israelcunaca, ¿servijcunachu, na cashpaca gañangunachu? Shina cashpaca, ¿imamandashi prezu apai tucungapaj shamurca?

¹⁵Maltun leongunami, huacashpa shamunajurca. Paicunata llaquichingapaca shinllita huacashpami, llaquinayaita tucuchishpa chushaj llactata saquinajurca. Paicunapaj pueblopash rupashca cajpimi, pillapash chaipica na causanajun.

¹⁶Menfis shuti, Tafnes shuti pueblocunapi causajcunapashmi, cangunapaj umata faquinajurca.

¹⁷¿Nachu cai llaquicunaca, cangunata Mandaj Taita Dios ñanda pushamujujpi, canguna saquishpa anchurishcamanda, chashna japin?

¹⁸Cunanga, Nilo shuti jatun huaicumanda yacuta ufiangapaca, Egiptoman rina ñambica, ¿imatata charinguichi? Shinallata Asiria llactaman rishpapash, ¿imashpata Eufrates jatun yacumandara yacuta ufianguichi?

¹⁹Cangunapaj juchallatami llaquichinga. Ñucata na cazushca juchallatami, cangunataca ninanda llaquichinga. Aliguta yarishpa ricuichi. Cangunata Mandaj Taita Dios ñucamanda anchurinaca, ñucata na manllanaca, jatun llaquimari. Chaitapash, tucuita Mandaj Jatun Dios ñucallatami, chashna nini.

²⁰Cangunaca, pundamandapachami cangunapaj yugota faquircanguichi. Cangunata huatashcacunatapashmi fitircanguichi. Shina rurashpami: ‘Candaca, napacha servishachu’ nircanguichi. Shina rurashca jahuami tucui loma jahuacunapi, fanga junda tucui quiru ucucunapi, culquimanda huainayaj huarmishna sirirircanguichi.

²¹Ñucaca cangunataca, alipacha agllashca uvas muyumanda viñashca yuratashnami, tucuillata tarpurcani. ¿Imashpata sachacunapi viñashca, na rijsishca uvas yurashna tucurcanguichi?

²²Lejía nishcahuan armajpipash, ashtaca jabongunahuan armajpipash, cangunapaj jucha mapaca, ñuca ñaupajmandaca napacha anchuringachu. Ñuca ñavipica ricurijungallami. Mandaj Jatun Dios ñucallatami, chashna nini.

²³¿Imashpata cangunaca, cashna ninguichi? Cangunaca: ‘Imahuambash na mapayashcachu canchi. Baal shuti dioscunatapash, ima horapash na catishcanchichu’ ninguichimi. Pugru pambapi canguna imatalla rurashcatapash ricuichiyari. Imatallami rurashcanguichi, ali rijsichiyari. Cangunaca, ñanmanda llujshishpa maitapash calpaj dromedaria nishca huarmi animalshnami canguichi.

²⁴Jichushca urcupilla causajuj huarmi burro, jarita mascashpa, huairata mutijishpa maitapash calpanshnami canguichi. Chai huarmi burro ruparijujtaca, ¿pita chari ushangayari? Tucui paita mascaj jari burrocunapash napacha shaijushpa, ima horapash ruparijujtallami taringa.

²⁵“Lluchu chaquilla purinatapash, yacunayachishca cunga chaquishca purinatapash cuidarinami canguichi’ nircanimi. Ashtahuangarin cangunaca: ‘Imamandallapash na saqui ushashunllu. Ñucanchica shujcunatami juyanchi. Paicunatami catishpa rishun’ nircanguichimi.

²⁶Chai juchamandaca, israelcunaca imashnami shuhua japi tucushpa pingai tucun, chashnallatami pingai tucunga. Paicunapash, paicunata jatun mandajcunapash, paicuna churashca mandajcunapash, curacunapash, villajcunapashmi pingai tucunajunga.

²⁷Paicunaca yamda caspitarami: ‘Canmi, ñucanchi taita cangui’ ninajun. Shinallata rumitarami: ‘Canmi, ñucanchita unguj mama cangui’ ninajun. Paicunaca, ñucaman ñavita ricuchinapaj randica, huashatami ricuchinajun. Jatun llaqui japijpillami, ñucataca: ‘Quishpichingapaj jataripairi’ ninajuhuan.

²⁸¿Canguna rurashca dioscunaca maipitayari? Judá llactapi causajcunalla. Cangunapaj pueblocuna tiashcashnallatami, cangunapaj dioscunapash tian. Llaqui punllacuna cangunata japijpica, paicuna quishpichi ushashpaca, quishpichingapaj jatarichunlla.

²⁹¿Imashnata ñucataca, caita chaita nishpa juchachihuanguichi? Cangunaca, tucuicunami yachashpata na cazushpa, ñucata fiñarcanguichi. Mandaj Dios ñucallatami, chashna nini.

³⁰Cangunapaj huahuacunataca, yangallatami astishpapash llaquichishcani. Chashna astijpipash, napacha ali tucunajurcachu. Cangunapaj espadacunahuanmi, ñuca ima nishcata cangunaman villajcunatapash, millai leonshna tucuchircanguichi.

³¹¡Cunan miraicunalla! Cangunaca, Mandaj Dios ñuca rimashcata ali uyaichi: ¿Ñucaca, israelcunapaca jichushca pambashna, na cashpaca yana yana tutapi llactashnachu carcani? ¿Imamandata ñuca agllashcacuna cashpapash, cashna nircanguichi? Cangunaca: ‘Cunanga cacharirishcami canchi. Ima horallapash cutinga na cambajman tigrashunllu’ nircanguichimi.

³²¿Jarihuan nara tacarishca cuitsaca, juyaillaguta churajunacunataca cunganllu? ¿Cazarangapaj ña ari nishca cuitsapash, juyaillaguta alichirinataca cunganllu? Ashtahuangarin ñuca agllashcacunaca, na cuentai ushanalla punllacunatami ñucata cungashpa causanajun.

³³Cangunapaj juyashcata mascagringapaca, ¿imashpata cangunapaj ñandaca juyaillaguta alichinguichi? Cangunaca, nalita ruraj huarmicunamambashmi, canguna nalita rurashpa causashcataca yachachishcanguichi.

³⁴Cangunapaj churajunacunaca, imagutapash na charijcunapaj yahuarhuan, ima nalitapash na rurajcunapaj yahuarhuan javirishcami. Shina cajpipash paicunataca, ima nalita rurashcatapash na tarircanguichichu. Shina cashpapash, cashnami ninguichi:

³⁵‘Ñucanchica, ima nalitapash na rurajcunami canchi. Na llullashpami cashna ninchi: Diosca, ñucanchihuanga na fiñarircachu’ ninguichimi. Ricuichi: ‘Ima juchatapash, na rurashpami causarcanchi’ nijujpipash, ñucami canguna imata rurashcataca ricuchigrini.

³⁶¿Imapajta cangunaca, ñandapash caiman chaiman calparianajunguichi? Cangunataca, imashnami Asiria llactata jatun mandaj runa pingaichirca, chashnallatami Egipto llactata jatun mandajpash pingaichinga.

³⁷Egiptomandapash, maquihuan umata llapirishpami tigramunguichi. Mandaj Dios ñucallatami, canguna maijandalla yariajlla causashca runacunataca fiñashpa jichurcani. Chaimandami paicunamandaca, ima alitapash na japinguichi.