Read Imbabura Highland Quichua JEREMÍAS 20 Bible Online

JEREMÍAS 20 - Imbabura Highland Quichua bible

JEREMÍAS 20

¹Imer shuti runapaj churi Pasur shuti curami, Mandaj Diospaj huasipica, tucuita ricushpa mandajurca. Paipashmi, Dios ima nishcata Jeremías villajushca chai shimicunata uyarca.

²Chaita uyashpami Pasur shuti runaca, profeta Jeremiastaca astichirca. Chai jipami, Benjamín llacta ladoman llujshina jahua lado pungupi tiaj shuj caspi utujucunapi chaquita canichishpa, prezu churarca. Chai pungutallata yaicushpami, Mandaj Diospaj huasimambash rina carca.

³Chai cayandi punllami Pasur shuti runaca, chai caspipi Jeremiaspaj chaquita canichishcamandaca llujchirca. Chaimanda llujchijpimi Jeremiasca, Pasur shuti runataca cashna nirca: “Mandaj Diosca candaca, na Pasur nishcachu, Magor-misabib nishcami.

⁴Mandaj Diosca, cashnami nin: ‘Ricui canllatapash, cambaj tucuilla ali cumbacunapash, jatun manllarinatami ruragrini. Paicunata fiñajcuna, espadahuan huañuchinajujtaca, cambaj ñavihuambachami ricungui. Judá llactapi tucui causajcunatapash, Babilonia llactata jatun mandajpaj maquipimi churagrini. Paimi, Babilonia llactaman prezu apashpa, espadahuan huañuchinga.

⁵Shinallata cai pueblopi causajcuna tucui imatalla charishca juyaillacunata, imapash ninan valishcacunata, ima juyailla tucui charishcacunatapash, Judá llactata jatun mandajcuna tucui imapash ninan charishcacunatapashmi, paicunata fiñajcunaman cusha. Paicunami quichushpa, Babilonia llactaman apanajunga.

⁶Can Pasurpash, cambaj huasipi tucui causajcunapashmi, Babilonia llactaman prezu ringuichi. Cambash, can llullashpa villashcata uyaj cambaj tucui cumbacunapash chaipi huañushpami, chaipillata pambai tucunguichi’ ninmi” nircami. Jeremiasca, ninandami llaquirijushca

⁷Mandaj Dioslla, ñucataca umachihuashcanguimi. Ñucaca, canhuan umachi tucushcami causani. Ñucata yali shinlli cashpami, mishahuashcangui. Punllandimi na cazushpa, asishpa ricunajun.

⁸Shina cajpipash tauca viajetami: “Ninandapacha llaquichinipash, tucurinapash shamungami” nishpa caparishpa villajunilla. Ashtahuangarin Mandaj Dios, cambaj Shimita villashcamandaca punllandimi rimashpa, pingaichishpa, asishpa ricunajuhuan.

⁹Shinamandami: “Diostaca, na ashtahuan yarishachu. Paipaj shutipipash, na ashtahuan villashachu” nijurcani. Shina yarijujpipash, ucu tullucamanmi cambaj Shimica, nina rupajunshna ñucapica tiajurca. Ñuca shungupilla charisha yajushpapash, napacha usharcanichu.

¹⁰Tucui ladocunapimi ñucataca, fiñashpa nalicachishpa parlanajujta uyani. Paicunaca: “Villagrichi, jacuchi villashunchi” ninajunmi. Imapi pandajtapash tucui ñuca cumbacunallatami chapanajun. Paicunaca cashnami ninajun: “Imashnapash umachita ushashpaca, japishpami huañuchishpa mishashun. Ñucanchita imashna llaquichishcashnallata llaquichishun” ninajunmi.

¹¹Ashtahuangarin Mandaj Diosca, ninan shinlli, manllanayai jatun soldadoshnami ñucataca cuidajuhuan. Catiriashpa ñucata llaquichijcunaca, nitijanshna pandarishpami, na mishai ushanajunga. Imapash na ali llujshijpimi, ninandapacha pingai tucunajunga. Tucui causaipi paicuna pingai tucushcataca, ima horapash na cunganajungachu.

¹²Tucuita Mandaj Dioslla, canga imatapash cashcatapacha rurajcunataca ricuriajunguimi. Yuyaicunatapash, shungutapash callarishpami ricujungui. Shinamandami ñucata mitsachunga, canman mingarini. Ñucata llaquichishcamandaca paicunatapash, ñuca ricujta llaquichipairi.

¹³Mandaj Diosman candaichiyari, Mandaj Diostaca ninanda alicachinguichiyari. Paimi, imagutapash na charij runagupaj almagutaca, nalita ruraj runacunapaj maquimanda quishpichirca.

¹⁴Ñuca huacharishca punllapash, nalicachi tucushca cachun. Ñuca mama ñucata ungushca punllapash, ama alicachi tucushca cachun.

¹⁵“Canmanga, jari huahuagutami ungushca” nishpa, ñuca taitata ninanda cushichij runataca, ima llaquipash japishpami ali canman.

¹⁶Chai runaca, Mandaj Dios llaquinayaita tucuchishca pueblocunashna cachun. Chai pueblocunata llaquichishpaca, na llaquirircachu. Tutamandapash, ninan llaquihuan caparishca uyarichun. Chaupi punllapash, caparishca uyarichunlla.

¹⁷¿Imashpashi ñuca mamapaj vijsapillata na huañuchihuarca? Chaipi huañushca cashpaca, paipaj vijsapillatami pambashca caiman carcani. Ñucaca, paipaj vijsamandaca ima horapash na llujshimanllu carcani.

¹⁸Paipaj vijsamandaca, ¿imapajta llujshircani? Nalicachi tucushpa, rimajpi pingai tucushpa, llaquinayaita causangapajllami huacharishcani.