Read Imbabura Highland Quichua JEREMÍAS 22 Bible Online

JEREMÍAS 22 - Imbabura Highland Quichua bible

JEREMÍAS 22

¹Mandaj Diosca, ñucataca cashnami nihuarca: “Judá llactata jatun mandajpaj huasiman urai rishpa, cai shimita parlagri.

²Chaipica, cashna nigri: ‘Davidpaj jatun tiarinapi tiarishpa, Judá llactata mandajuj jatun mandajlla. Cambash, canda servijcunapash, cai pungucunata yaicunajuj gentecunapash, Mandaj Dios rimashcata uyaichi.

³Mandaj Diosca, cashnami nin: Aliguta ricushpa, imatapash cashcatapacha rurashpa mandaichi. Llaquichi tucuj runataca, llaquichij runapaj maquimanda cacharichinguichi. Shuj llactamanda shamujtapash, taita mama illaj huahuagutapash, sapalla mamagutapash, na umashpa imatapash shuhuanachu canguichi. Cai pushtupica, ima nalita rurashcapash na ricurij runapaj yahuartaca, na jichanachu canguichi.

⁴Cashna ñuca mandashca shimita alipacha cazujpica, David tiarinapi paipaj randi tiarij jatun mandajcunaca, cai huasiman yaicuna pungucunatami carretacunapi, caballocunapi tiarishpa yaicumunajunga. Paicunapash, paicunata servijcunapash, paipaj gentecunapashmi yaicumunajunga.

⁵Ashtahuangarin cai shimicunata na uyajpica: Cai huasitaca, jichushcatami saquisha nishpa, ñucamandallata juramentushcataca rurashapachami’ ninmi Mandaj Diosca” nijurcami.

⁶Mandaj Diosca, Judá llactata jatun mandajpaj huasi ucu purataca, cashnami nin: “Canga ñucapaca, Galaad shuti urcushnami cangui. Líbano shuti jatun urcu pundashnami cangui. Shina cajpipash chulunlla pushtumanmi tigrachigrini, pipash na causaj pueblocunatashnami saquigrini.

⁷Canda llaquichinajuchunga, tucuchij runacunatami, paicunapaj macanajunacunata charij tucuilla runacunata tandachisha. Paicunami, cambaj ashtahuan ali cedro quirucunataca, fitishpa rupachinajunga.

⁸Ashtaca gentecunami, cai pueblotaca tandanajushca yalinajunga. Paicunaca, tucuicunami paicunapaj cumbataca: ‘Cai jatun pueblotaca, ¿imashpashi Mandaj Diosca, cashna llaquichirca?’ ninajunga.

⁹Shina nijpica, cashna nishpami tigrachinajunga: ‘Caipi causajcunami, paicunata Mandaj Taita Dioshuan ari ninajushcata saquinajurca. Chai jipaca, shuj dioscunata ninanda alicachishpami servinajurca’ ninajungami” ninmi.

¹⁰Huañushca mandajmandaca, na huacanachu canguichi, llaquiritallapash na llaquirinachu canguichi. Ashtahuangarin shuj llactaman prezu apai tucujmandami, ninanda llaquirishpa huacana canguichi. Paimi, ima horapash cutinga na tigramunga. Pai huacharishca llactatallapash, cutinga na ricungachu.

¹¹Josías runapaj churi, Judá llactata mandaj Salum shuti runaca, paipaj taita Josías huañujpimi, paipaj randi mandajurca. Mandaj Diosca, cai llactamanda apai tucuj Salum shuti runamandaca, cashnami nin: “Paica, caimanga na cutin tigramungachu.

¹²Ashtahuangarin pai prezu apai tucushca llactapimi huañunga. Chaimandami cai llactataca, cutinga na ricunga.

¹³Imatapash cashcatapacha na rurashpa, ima alitapash na rurashpa, juyailla ucucunata charij huasita shayachij runaca, ¡aij imachari tucunga! Paica, paipaj cumba runaguta yanga trabajachishpami, trabajashcamandapash imatallapash na cushpa chashna ruran.

¹⁴Paica, cashnami nijun: ‘Ñucapaca, jatun ucucunata charij juyailla huasita shayachishpami, jatun ventanacunata churachisha. Ucucunatapash, cedro tablacunahuan rurachishpami, pucallaguta rurachisha’ nijunmi.

¹⁵¿Cedro caspicunahuan huasita rurachishpaca, mandajushallami yanguichu? Cambaj taitapash ali micushpa, ali ufiashpami causajurca. ¿Nachu aliguta ricushpa mandashpa, imatapash cashcatapacha rurajushpa, tucuipi ali llujshijurca?

¹⁶Paica, llaquichi tucuj runagumandapash, imagupash illaj runagumandapash shayarishpa aliguta mandajushpami, aliguta causajurca. ¿Nachu ñucata rijsishpaca, chashna causana?” ninmi Mandaj Diosca.

¹⁷“Ashtahuangarin cambaj ñavipash, cambaj shungupash ninanda charijyangapajllami munanajun. Shinallata ima nalita rurashcapash na ricurij runagupaj yahuarta jichashpa, pitapash llaquichishpalla charingapajmi munanajun” ninmi.

¹⁸Shinamandami Josías runapaj churi, Judá llactata jatun mandaj Joacim shuti runamandaca, Mandaj Diosca cashna nin: “Pai huañujpica: ‘¡Aij ñuca huauquigulla, aij ñuca panigulla!’ nishpaca, na pipash huacangachu. ‘¡Aij ñuca taitalla! ¡Aij, ñuca jatun mandajlla!’ nishpallapash, na llaquiringachu.

¹⁹Aisashpa apashpami, Jerusalén pungucunamandaca canllaman shitanajunga. Burro huañushcata shitana utujupimi pambanajunga” ninmi.

²⁰“Cunanga, Líbano shuti urcuman vichai rishpa, Basán shuti urcuman llujshishpa, tucui ladota ricushpa ninanda capari. Shina caparijpipash, pipash na uyangachu. Cambaj tucui juyashcacunapash tucurircami.

²¹Ñucaca, can tucuipi ali causajujpillatami rimarcani. Ashtahuangarin canga: ‘Napacha uyashachu’ nircanguimi. Canga, chashnami chaira viñaimandapacha ñuca rimashcata napacha uyanayachishpa causarcangui.

²²Canda tucui michijcunataca, huairami michijunga. Canda juyashcacunapash, prezumi apai tucunajunga. Shina tucujpimi, can tucui nalita rurashpa causashcamandaca, ninanda pingai tucushpa pandaringui.

²³Líbano shuti urcu caspicunahuan shayachishca huasipimi, cedro caspicunapi tazinda rurashcashna causajurcangui. ¡Ungungapaj nanachijuj huarmitashna, ninan llaqui japijpica, llaquinayaitami caparijungui!” ninmi.

²⁴Mandaj Dios ñucaca, causajunipachami ninmi. Paimi cashna nin: “Joacim shuti runapaj churi, Judá llactata jatun mandaj Conías shuti runaca candaca, ñuca ali lado maquipi surtijas cajpipash, chaimandapash llujchishpami shitaiman.

²⁵Candaca, huañuchingapaj munajcunapaj maquipimi churagrini. Paicuna japijpimi, paicunapaj ñaupajpi manllashpa chujchujungui. Babilonia llactata jatun mandaj Nabucodonosor runapaj maquipi, caldeo soldadocunapaj maquipipachami, candaca churagrini.

²⁶Candapash, canda unguj mamatapash, canguna na huacharishca shuj llactaman runacuna prezu apachunmi saquisha. Cangunaca chaipimi huañunguichi.

²⁷Paicunaca, quiquin llactaman tigranataca, tucui almahuanmi munanajunga. Shina cashpapash, napacha tigramui ushangachu” ninmi.

²⁸Cai Conías shuti runachu, ¿pipash na munashca, faquirishca alpa mangashna? ¿Pipash na munashca platoshnachu? ¿Imamandata paipash, paipaj miraicunapash, na rijsishca llactaman llujchishpa cachai tucurca?

²⁹¡Cai pachalla, cai pachalla, cai pachalla, Mandaj Diospaj Shimita uyayari!

³⁰Mandaj Diosca, cashnami nin: “Cai runa imashna tucunata escribichi. Paica, paipaj tucui causaipica shuj huahuatallapash na charingachu. Paica, imapipash na ali llujshingachu. Paipaj miraicunaca, David mandashpa tiajushca tiarinapica, pipash na tiaringachu. Judá llactatapash, na mandangachu” ninmi.