Read Imbabura Highland Quichua JEREMÍAS 23 Bible Online

JEREMÍAS 23 - Imbabura Highland Quichua bible

JEREMÍAS 23

¹Mandaj Diosca, cashnami nin: “Ñuca llamacunata, caita chaita cachashpa chingachij michijcunalla, ¡aij imachari tucunga!” ninmi.

²Shinamandami israelcunata Mandaj Taita Diosca, ñuca llactapura gentecunata michijcunataca, cashna nin: “Ñuca llamacunata cuidangapaj randica, manllachishpami caita chaita cacharcanguichi. Uyaichi, canguna nalita rurashcamandami llaquichigrini. Mandaj Dios ñucami, chashna nini.

³Shuj llactacunaman ñucallata cachashca llamacunamanda huaquin puchushcacunataca, ñucallatami cutin tandachisha. Shina tandachishpami, paicuna causanajushca pushtumanllata tigrachimusha. Chaipimi, ashtacacuna mirashpa ninandapacha jundanajunga.

⁴Paicunata michinajuchunga, michijcunatami churasha. Shina churajpica, na ashtahuan manllanajungachu. Na ninanda chujchunajungachu, na yangapi churai tucungachu” ninmi Mandaj Diosca.

⁵Mandaj Diosca, cashnatapashmi nin: “Ricuichi, shamui punllacunapica, Davidpaj mirai puramandami, imatapash cashcatapacha ruraj mandajta churasha. Paica, Jatun Mandanshnallatami mandajunga. Paica cushijushpami, cai pachapica imatapash aliguta ricushpa, imatapash cashcatapacha rurashpa mandajunga.

⁶Pai mandajui punllacunapimi, Judá llactapi causajcunaca, quishpichi tucunga. Israelcunapash, imatapash na manllashpami Diosta yariashpa causanajunga. Paipaj shutica, caimi canga. Chai shutipimi paitaca: ‘Ñucanchiman imatapash cashcatapacha ruraj Mandaj Diosmi’ ninajunga” ninmi.

⁷Mandaj Diosca, cashnatapashmi nin: “Ricuichi, cangunaca: ‘Israelcunata Egipto llactamanda vichai pushamuj Mandaj Diosca causajumbachami’ ninatami yachanguichi. Shina cajpipash, na ashtahuan chashna parlana punllacunami chayamugrin.

⁸Ashtahuangarin: ‘Israelcunapaj miraicunataca, jahua lado llactamanda llujchishpa cachai tucushca tucui llactacunamanda tigrachimuj Mandaj Diosca, causajumbachami’ ninajungami. Shina tigrachimujpimi, paicunapaj llactapillata causanajunga” ninmi.

⁹Llulla villajcunamandaca, shungu faquirishpami ninanda llaquirishpa, tucui ñuca tullucunacaman chujchujuni. Jucha illaj Mandaj Diospaj shimicunata uyashpaca, paipaj ñaupajpica yuyaipash chingajta shuj runa vinohuan machashcashnami tucuni.

¹⁰Cai llactapica, cazarashca jahuapash shujcunahuan causajcunalla jundami. Chashna cajpimi Dios nalicachijpi, alpapash jichushca pambashna chaquishca, michina pambacunapash tucuilla chaquishca. Paicunaca, imatapash nalitalla rurangapajmi calpanajurca. Shujcunata llaquichingapajllami, shinllicuna carca.

¹¹Mandaj Diosca, cashnatapashmi nin: “Ñucamanda villaj runapash, curapashmi ñucata na manllajcuna. Paicunatacarin ñuca huasipillatami, nalita rurajta ricurcani.

¹²Chaimandami paicunaca, lluchashpa urmanalla ñanda yana tutapi purinajunshna canga. Chaipica t'angashpa shitajpishnami, llaquipi urmanajunga. Ñucallatami, ninan llaqui huatata paicunaman apamusha” ninmi Mandaj Diosca.

¹³“Samaria llactapi villaj runacunataca, maitapash villanajujtami ricurcani. Paicunaca, Baal shuti diospaj shutipi villashpami, ñuca agllashca israelcunataca pandachinajurca.

¹⁴Shinallata Jerusalenbi villajcunatapash, na ricunayaicunata ruranajujtami ricurcani. Paicunaca, cazarashca jahuapash shujcunahuan causashpami, imatapash llullashpalla purinajurca. Chaimandami, ñucapajman pipash ama tigrarichun, nali causanatara ashtahuan shinllichinajurca. Tucui paicunapash, Jerusalenbi causajcunapash ñuca ñaupajpica, Sodoma shuti, Gomorra shuti pueblocunapi causajcunashnami” ninmi.

¹⁵Shinamandami tucuita Mandaj Diosca, chai villajcunata fiñashpa, cashna nin: “Ricuichi, paicunamanmi jayaj ajenjota micuchishpa, jayaj yacuta ufiachigrini. Jerusalenbi villaj runacunamandami, mishqui shimi jayaj shungu canaca, tucui llactaman llujshishca” ninmi.

¹⁶Tucuita Mandaj Diosca, cashnatapashmi nin: “Chai villajcuna villashca shimicunataca, na uyanachu canguichi. Canguna yanga shuyachunllami, micuchinshna villanajun. Paicunapaj shungu yarishcatallami, muscuipi ricushcatashna villanajun. Mandaj Dios villashcataca, na villanajunllu.

¹⁷Paicunaca jariyashpallami, ñucata fiñajcunataca cashna ninajun: Mandaj Diosca, cashnami nin: ‘Cangunapaca, casilla ali causaimi tianga ninmi’ ninajunmi. Shinallata paicunapaj shungu munashcata rurashpa purij runacunamambashmi: ‘Cangunapaca, ima llaquipash na shamungachu’ ninmi ninajun.

¹⁸Shina ningapaca, ¿pita Mandaj Dios imatalla rurangapaj munajujtaca yacharca? ¿Pita paipaj Shimitapash uyarca? ¿Pita pai ima nijtapash ali uyariajurca?

¹⁹Ricuichi, Mandaj Dios cachamushca ninan huairahuan tamiashna llaquica, ninandapacha fiñarishpami llujshimunga. Pai alichishpa charijuj ninan huairahuan tamiashna llaquica, nalicunapaj jahuapimi urmamunga.

²⁰Mandaj Dios ñuca ninandapacha fiñarishpa llaquichinataca, paipaj shungupi imashna yarijushcata rurashpa pactachingacaman napacha ali tucungachu. Jipa punllacunami, chaicunataca alipacha yachanguichi.

²¹Chai villajcunataca, na ñuca cacharcanichu. Paicunallatami calpanajurca. Paicunamanga, imatallapash na nircanichu. Ashtahuangarin llullashpallami villanajurca.

²²Ñuca imata rurangapaj munajushcata yachashca cashpaca, ñuca villashca shimicunatami, ñuca agllashcacunaman villanman carca. Shina villashpaca nali causajcunatapash, nalita rurajcunatapash, aliman tigrachinmanmi carca.

²³Ñucaca, ¿ladollapi cashpalla ricuj Taita Dioschu cani? ¿Nachu caru carupi cashpapash, tucuita ricuj Taita Dios cani?” ninmi Mandaj Diosca.

²⁴Mandaj Diosca, cashnatapashmi nin: “¿Pipash ñuca na ricunallapi pacajui ushangachu? ¿Nachu ñucaca, tucui jahua pachapipash, cai pachapipash junda cani? Mandaj Dios ñucami, chashna nini.

²⁵Ñucaca, chai villajcunataca: ‘Muscurcanimari, muscurcanimari’ nishpa, llullashpalla ñuca shutipi villanajujtami uyarcani.

²⁶Chai villajcunaca, ¿ima horascamanshi paicunapaj shungu yarishcatalla llullashpa villanajunga? Chai villajcunaca, paicunapaj shungu yarishcatallami umachishpa villanajun.

²⁷Paicuna muscushcataca tucuicunami, paicunapaj cumbacunamanllata parlashpa purinajun. Ñuca agllashcacuna ñuca shutita cungachun, chashna parlanajushcataca na yarinajunllu. Paicunapaj ñaupa taitacuna ñuca shutita cungashpa, Baal shuti diostara catishcashnami cunganajun.

²⁸Villaj runapash muscushpaca, chai muscushcatalla parlachun. Ñuca shimicunata chasquishpa villaj runapash, ñuca Shimi cashcatapacha na llullashpa villachun. Jupahuan trigohuanga, na chashnallatachu” ninmi Mandaj Diosca.

²⁹Mandaj Diosca, cashnatapashmi nin: “Ñuca villashca shimicunaca, ¿nachu ninashna? Shinallata ¿nachu rumita faquij martilloshna?

³⁰Shina cashcamandaca ricuichi, caishuj chaishuj shuhuashpa, ñuca shimita villanajunshna llulla villajcunataca, ñucami llaquichigrini” ninmi Mandaj Diosca.

³¹Mandaj Diosca, cashnatapashmi nin: “Ricuichi: ‘Diosmi villachun cachamuhuan’ nishpa, paicunapaj jallumanda llujchishpalla mishquilla villajcunataca, ñucami fiñashpa llaquichigrini” ninmi.

³²Mandaj Diosca, cashnatapashmi nin: “Ricuichi, llulla muscuicunatalla villashpa parlajcunahuanmi fiñarishca cani. Paicunaca, yanga llullacunata, uyanayai llulla shimicunata parlashpami, ñuca agllashcacunataca pandachinajurca. Ñucaca, na paicunata villachun cacharcanichu. Shinamandami cai gentecunapaca, ima alitapash na ruranajurca” ninmi Mandaj Diosca.

³³“Candaca, maijambash caipi causaj gentecunamanda cashpa, na cashpaca shuj villaj, na cashpaca shuj cura cashpapash: ‘¿Mandaj Diosca, imatata villan?’ nishpa tapujpica, cashna ningui: Mandaj Diosca, caitami villachun cachamuhuan: ‘Ñucaca, cangunataca jichugrinimi’ ninmi ningui.

³⁴Shinallata maijan villajpash, maijan curapash, na cashpaca caipi causaj gentecunamanda maijan cashpapash: ‘Mandaj Diosmi, cashna villan’ nijpica, paimambash, paipaj huasi ucu puramambashmi, ninan llaquita cachamusha.

³⁵Cangunaca, cangunapaj cumbata cashpa, cangunapaj huauquita cashpapash, cashna ninguichi: ‘¿Mandaj Diosca imatata tigrachirca, Mandaj Diosca imatata nirca?’ ninguichi.

³⁶Cunanga, ima horallapash: ‘Mandaj Dios villashcami’ ningapaca, na yarinachu canguichi. Tucuicuna villashca shimillatami, Dios villashcashna tucunga. Causaj Taita Diospaj, tucuita Mandaj, ñucanchi Taita Diospaj Shimita naliman tigrachishcamandami, chashna tucunga.

³⁷Chai villajtaca: ‘Mandaj Diosca, ¿imatata tigrachirca? Mandaj Diosca, ¿imatata nirca?’ nishpa tapungui.

³⁸Ashtahuangarin: ‘Mandaj Dios villashcami’ nijpimi, Mandaj Diosca cashna nin: Cai shimicunaca: ‘Mandaj Dios villashcami’ nircanguichimi. ‘Mandaj Dios villashcami’ nishpaca, na villanachu canguichi nichun cachashca jahuami, chashna nircanguichi.

³⁹‘Chaimandami, cangunataca cungashpa saquisha. Ricuichi. Shinamandami, cangunatapash ñuca ñaupajmanda anchuchisha. Shinallata cangunaman, cangunapaj ñaupa taitacunaman carashca pueblotapashmi, tucuillata urmachisha.

⁴⁰Shina rurashpami, cangunata umashpa pingaichijpi, causaita causaicaman pingai tucushpa causachun saquisha. Ima horapash na cunganalla, jatun pingaipimi causaita causaicaman saquisha’ nishpa villangui” nijurcami.