Read Imbabura Highland Quichua JEREMÍAS 25 Bible Online

JEREMÍAS 25 - Imbabura Highland Quichua bible

JEREMÍAS 25

¹Josías shuti runapaj churi Joacim runa, Judá llactata ña chuscu huatata mandajujpimi, jatun mandaj Nabucodonosor runaca, Babilonia llactata mandai callarirca. Chai huatapimi Mandaj Diosca, Judá llactapi tucui causajcuna imalla tucunataca, Jeremiasman villarca.

²Chai shimicunataca, profeta Jeremiasca, Judá llactapi causanajuj tucui gentecunamambash, Jerusalenbi tucui causajcunamambashmi, cashna nishpa villajurca:

³“Amón shuti runapaj churi Josías shuti runa, Judá llactata ña chunga quimsa huatata mandajui punllamandapacha cunan punllacamanmi, Mandaj Diosca cai shimicunata villajuhuarca. Ñami chaica, ishcai chunga quimsa huata tucun. Chai shimicunataca, pundamandapachami na shaijushpa villajurcanilla. Ashtahuangarin cangunaca, na uyanayachishpami causarcanguichi.

⁴Mandaj Diosca, pai ima nishcata villashpa paita tucui servijcunataca, pundamandapachami cangunapajman na shaijushpa cachamujurcalla. Ashtahuangarin cangunaca na uyashpami causarcanguichi. Chaita uyangapaca, cangunapaj rinritapash na mañachishpami causarcanguichi.

⁵Paicunaca cashnami villanajun carca: ‘Cunanga, nali causaita, nalita ruranacunata saquishpa, Diospajman tigrarichi. Shina tigrarishpaca, cangunamambash, cangunapaj ñaupa taitacunamambash, Mandaj Dios carashca cai llactapica causaitami causanguichi.

⁶Shuj dioscunataca, na catinachu canguichi. Chai dioscunataca, na servishpa alicachinachu canguichi. Cangunapaj maquihuanllata rurashca dioscunahuambash, na ninanda fiñachinachu cahuanguichi. Na fiñachijpica, ñucapash cangunataca na ima llaquita rurashachu’ ninmi nishpami, villanajun carca.

⁷‘Shina villajpipash, na uyangapaj munashpami causarcanguichi. Ashtahuangarin cangunallata llaquichi tucungapajmi, cangunapaj maquihuan rurashca dioscunahuan, ñucata ninanda fiñachircanguichi’ ninmi Mandaj Diosca.

⁸Shinamandami tucuita Mandaj Diosca, cashnatapash nin: ‘Ñuca rimashcataca, na uyanayachishpami causarcanguichi.

⁹Ricuichi cunanga, jahua lado llactapi causanajuj, tucui aillucunatapash, Babilonia llactata jatun mandaj, ñucata servij Nabucodonosor shuti runatapash pushamuchunmi cachagrini. Paicunataca, cai llactatapash, caipi tucui causajcunatapash, cai muyundi tucui llactacunatapash, llaquichinajuchunmi pushamusha. Shina tucuchishpami, na cazushpa asi tucuchun, asishpa ricui tucuchun, tucui causaipi llaquinayaita tucuchi tucushca causachun saquisha. Mandaj Dios ñucami, chashna nini.

¹⁰Paicuna puramandaca, ninanda cushijushpa candanatapash, cushijuihuan caparinatapash, cazarajcuna candanatapashmi chingachisha. Shinallata cutana rumi huacashcapash, na uyaringachu. Maipi micha punchayachijllapash, na ricuringachu.

¹¹Tucui cai llactami, manllanayaita tucuchi tucunga. Cai llactapi causajcunaca, canchis chunga huatatami, Babilonia llactata jatun mandajtaca servishpa causanajunga.

¹²Mandaj Dios ñucallatami, cashnatapash nini: Chai canchis chunga huata pactajpimi, Babilonia llactata jatun mandajtaca llaquichisha. Paicuna nalita rurashcamandami, chai llactapi causajcunatapash llaquichisha. Caldeocunapaj llactataca, causaita causaicaman jichushca tiachunmi saquisha.

¹³Chai llactaman llaquicunata cachanata tucuita villashcashnallatami, chai llactaman llaquita cachamusha. Tucui shuj llactacunatapash, ñuca llaquichinata Jeremías villashcata cai libropi tucuita escribishca tiajushcashnallatami cachamusha.

¹⁴Paicunatapash, shuj ashtaca llactacuna ashtaca jatun mandajcunami mishashpa mandanajunga. Shinami paicunataca, paicuna nalita rurashcashnallata, paicunapaj maquihuan imatalla rurashcashnallata, cuna cashcataca cushpa llaquichisha’ ninmi” nijurcami.

¹⁵Israelcunata Mandaj Taita Diosca, cashnami nihuarca: “Ñuca ninandapacha fiñarishca vino copata ñuca maquimanda japi. Chai vinotaca, canda ñuca cachashca tucui llactacunapi causajcuna ufiachun cungui.

¹⁶Chaita ufiashpaca, espadahuan llaquichi tucunata, paicunapaj llactaman ñuca cachajpimi, chujchushpa loco tucunajunga” nihuarcami.

¹⁷Shina nijpimi, Mandaj Diospaj maquimanda chai copata japishpa, Mandaj Dios cachashca tucui llactacunapi ufiachun curcani.

¹⁸Jerusalenbipash, Judá llactapi tiaj tucui caishuj pueblocunapipash, jatun mandajcunaman, caishuj mandajcunamambashmi ufiachun curcani. Cunambishnallata, na cazushpa asi tucunapi, asishpa ricui tucunapi, ima llaquipash japishpaca alichari canman ni tucunapi churangapajmi chashna curcani.

¹⁹Shinallata Egipto llactata jatun mandaj Faraón runamambash, pai churashca mandajcunamambash, paita servijcunamambash, paipaj tucui gentecunamambashmi ufiachun curcani.

²⁰Shuj llactacunamanda chapurishca gentecunamambash, Uz shuti llactata tucui jatun mandajcunamambash, Filistea llactapi tiaj Ascalón, Gaza, Ecrón shuti pueblocunata tucui jatun mandajcunamambash, Asdod shuti pueblopi huaquin puchushca gentecunamambashmi ufiachun curcani.

²¹Shinallata Edom, Moab, Amón shuti llactacunapi causajcunamambashmi ufiachircani.

²²Tiro shuti, Sidón shuti pueblocunata tucui jatun mandajcunamambash, mama cucha chai lado manñacunapi tiaj tucui llactacunata jatun mandajcunamambashmi ufiachun curcani.

²³Dedán, Tema, Buz shuti aillucunamambash, ñavi pata milmacunata ruturij runacunamambashmi ufiachun curcani.

²⁴Arabia llactata tucui jatun mandajcunamambash, jichushca pambapi causanajuj shican shican aillu runacunata tucui jatun mandajcunamambashmi ufiachun curcani.

²⁵Zimri, Elam, Media shuti llactacunata tucui jatun mandajcunamambashmi ufiachircani.

²⁶Jahua ladoman tiaj tucui llactacunata jatun mandajcunamambash, chai ladollapi causajcunamambash, carupi causajcunamambashmi ufiachun curcani. Tucui cai pacha llactacunapimi, caishujman chaishujman ufiachun curcani. Paicunapaj jipaca, Babilonia llactata jatun mandajmi ufianga.

²⁷“Paicunataca cashna ningui: Tucuita Mandaj, israelcunapaj Taita Diosca cashnami nin: ‘Caita ufiashpa machashpa, shungu tigrachishpa urmaichi. Canguna purata espadahuan llaquichinajuchun, ñuca cachashcamandami, na jataringuichi’ ninmi ningui.

²⁸Cambaj maquipi charijuj chai copamanda ufiangapaj na japingapaj munajpica, canga cashna ningui: Tucuita Mandaj Diosca, cashnami nin: ‘Ufianapachami canguichi.

²⁹Ricuichi, ñuca shutipi mañajuj pueblotarami, llaquichi callarircani. ¿Cangunarachu na llaquichi tucuna canguichi? Cai llaquimandaca, na quishpiri ushanachu canguichi. Tucui cai pachapi causajcunatami, espadahuan huañuchigrini’ ninmi tucuita Mandaj Diosca ningui.

³⁰Canga, ñuca tucui ima nishca shimitami cashna nishpa, paicunaman villana cangui: ‘Mandaj Diosca, jahuamandami leonshna huacamunga. Pai causajuj jucha illaj huasimandami shinllitapacha rimamunga. Pai causana huasita fiñashpami, ninandapacha leonshna huacamunga. Cai pachapi tucui causajcunatami, uvasta sarujcuna candanshna candashpa llaquichinga.

³¹Culun nijujca, cai pacha tucuri manñacunacamanmi uyaringa. Mandaj Diosca, tucui cai pachapi causajcunapaj Juez cashpami, tucui llactacunapi causajcuna imatalla rurashcata ricushpa llaquichinga. Paita na manllajcunataca, espadahuan huañuchijcunamanmi cunga’ ninmi Mandaj Diosca nishpami villana cangui” nihuarcami.

³²Tucuita Mandaj Diosca, cashnatapashmi nihuarca: “Ricuichi, llactan, llactanmi ninanda llaquichishpa ringa. Cai pacha tucuri manñacunamandami, ninan huairahuan tamia jataringa.

³³Chai punllapica, Mandaj Dios ñuca huañuchishcacunaca, tucui cai pachapimi shuj lado manñamanda caishuj ladocaman, shitashca sirinajunga. Chai huañushcacunamandaca, pipash na yarishpa yarishpa huacangachu. Paicunataca, pipash na tandachingachu, pipash na pambangachu. Huanushnami, alpa jahuapi shitashca sirinajunga.

³⁴Michijcunaca, ninanda caparishpa huacaichiyari. Llamagucunashna ashtaca gentecunata shinllita mandajcuna, llaquirishpa ñutu alpapi urmaichiyari. Cunan punllami, cangunapaj cungata muchuna punllapash, caita chaita cachana punlla pactamushca. Juyailla vasota faquishcashnami urmanguichi.

³⁵Chai punllapica, michij runacunapash na pacajui ushangachu. Llamagucunashna ashtaca gentecunata shinllita mandajcunaca, pipash na quishpiri ushangachu.

³⁶Mandaj Diosca, michina pambacunatapashmi tucuchinga. ¡Shinamandami michijcunaca, ninanda caparishpa huacanajunga! ¡Llamagucunashna ashtaca gentecunata shinllita mandajcunapashmi, ninanda huacanajunga!

³⁷Mandaj Diosca, ninandapacha fiñarishpami, michina juyailla pambacunataca tucuchinga.

³⁸Huahua león paipaj utujuta saquishpa rinshnami saquirca. Paicunata llaquichishpa charijcuna ninanda fiñarishpa shamushpami, paicunapaj llactataca llaquinayaita tucuchirca. Ninandapacha fiñarishpami tucuchirca” nijurcami.