Read Imbabura Highland Quichua JEREMÍAS 28 Bible Online

JEREMÍAS 28 - Imbabura Highland Quichua bible

JEREMÍAS 28

¹Judá llactata jatun mandaj Sedequías shuti runa mandai callari huatapimi, cashna tucurca: Paica, chuscu huata picha quillata mandajujpimi, Gabaón shuti pueblopi causajuj Azur shuti runapaj churi Hananías shuti villaj runaca, ñucata rimahuarca. Paimi, Mandaj Diospaj huasipi, curacunapaj ñaupajpi, tucui gentecunapaj ñaupajpi, cashna nihuarca:

²—Tucuita Mandaj, israelcunapaj Taita Diosca, cashna nishpami rimarca: ‘Babilonia llactata jatun mandajpaj yugotaca faquircanimi.

³Mandaj Dios ñuca huasipi tucui ima charishcacunata, Babilonia llactata jatun mandaj Nabucodonosor runa, Babilonia llactaman japishpa apashcacunataca, cunanmanda ishcai huatapimi, cai pushtumanllata tigrachimugrini.

⁴Shinallata Judá llactata jatun mandaj, Joacim shuti runapaj churi Jeconías shuti runatapash, Judá llactamanda Babilonia llactaman prezu apai tucushca caishujcunatapashmi, cai pushtumanllata tigrachimugrini. Ñucallatami, Babilonia llactata jatun mandaj churashca yugota faquisha’ ninmi Mandaj Diosca— nihuarcami.

⁵Shina nijpimi, profeta Jeremiasca, Mandaj Diospaj huasipi tandanajushca curacunapaj ñaupajpi, tucui gentecunapaj ñaupajpi, villaj Hananías shuti runata rimarca.

⁶Profeta Jeremiasca, cashnami nijurca: —Chashna cachun. Mandaj Diosca, chashna rurachunlla. ‘Mandaj Diospaj huasipi imalla tiashcacunata apashcatapash, tucui prezu apai tucushcacunatapash, Babilonia llactamandaca cai pushtumanllata tigrachimungami’ nishpami villarcangui. Shina nishpa can villashcata, Mandaj Dios pactachishpaca alimi canga.

⁷Shina cajpipash cunanga, cambash uyajta, tucui gentecunapash uyajta, ñuca rimashcataca ali uyahuai.

⁸Punda huatacunapica, cambash, ñucapash nara tiajpillatami, shuj villajcuna tiashca. Paicunaca, ashtaca llactacunapi, jatun llactacunapi jatun macanajuicuna, ninan llaquicuna, jatun ung:uicuna tianatami villanajushca.

⁹Maijan villajpash, casilla ali causai tianata villajpica, pai nishcashna pactajpillami, Mandaj Dios na llullashpa villachun cachamushca cajtaca ricunguichi— nijurcami.

¹⁰Shina nijpimi, Hananías shuti villaj runaca, profeta Jeremiaspaj cunga tullumandaca, yugota quichushpa faquirca.

¹¹Chai jipaca Hananías shuti runaca, tucui gentecunapaj ñaupajpimi, cashna nirca: —Mandaj Diosca, cashnami nin: ‘Babilonia llactata jatun mandaj Nabucodonosor runa, tucui llactacunapi causajcunapaj cunga tullupi churashca yugotaca, cunanmanda ishcai huatapica, chashnallatami faquigrini’ ninmi— nijpica, Jeremiasca catishpa rircallami.

¹²Profeta Jeremiaspaj cunga tullumanda yugota japishpa, villaj Hananías shuti runa faquishca jipallami, Mandaj Diosca Jeremiastaca cashna nijurca:

¹³“Hananiastaca, cashna ningapaj ri: Mandaj Diosca, cashnami nin: ‘Caspi yugocunataca faquircanguimi. Cunanga, chaicunapaj randica jirru yugocunata rurangui’ ninmi.

¹⁴Tucuita Mandaj, israelcunapaj Taita Diosca, cashnatapashmi nin: ‘Babilonia llactata jatun mandaj Nabucodonosor runata servishpa causanajuchunga, tucui cai llactacunapaj cunga tullupimi, jirru yugota churarcani. Tucuicunami, paita servishpa causanajunga. Sacha animalcunatapashmi, pai munashcata rurachun paipaj maquipi churarcani’ ninmi nigri” nijurcami.

¹⁵Shinamandami profeta Jeremiasca, villaj Hananías runataca cashna nijurca: —Cunanga uyai, Hananías. Candaca, Mandaj Diosca na villachun cachamushcachu. Canga, cai gentecunataca, canda yariajlla causanajuchunllami, yangata llullarcangui.

¹⁶Shinamandami Mandaj Diosca, cashna nin: ‘Ricui, canga Mandaj Dios ñucata na cazushpa jariyanajuchunmi, paicunaman parlajurcangui. Shinamandami candaca, cai pachamandaca anchuchigrini. Cai huatallatami huañungui’ ninmi— nijurcami.

¹⁷Villaj Hananías runaca, chai huatallatami chai huatapaj canchis quillapi huañurca.