Read Imbabura Highland Quichua JEREMÍAS 29 Bible Online

JEREMÍAS 29 - Imbabura Highland Quichua bible

JEREMÍAS 29

¹Nabucodonosor shuti runaca, mandaj rucucunata, curacunata, profetacunata, tucui shuj gentecunatapashmi, Jerusalenmandaca Babiloniaman prezu aparca. Chai apai tucushcamanda puchushcacunamanmi, profeta Jeremiasca, Jerusalenmanda shuj cartata cacharca. Chai cartapi escribishca shimicunami, caipica tiajun.

²(Shinallata jatun mandaj Jeconías shuti runatapash, paipaj mama jatun mandajtapash, mandana huasipi causajcunatapash, Judá llactapi, Jerusalenbi mandajcunatapashmi prezu aparca. Shinallata ima juyaillacunata ruranata yachajcunatapash, imatalla ruranatapash alipacha yachajushca, Jerusalenmanda runacunatapashmi, prezu aparca).

³Chai cartataca, Safán shuti runapaj churi Elasa shuti runaman, Hilcías shuti runapaj churi Gemarías shuti runamanmi cushpa cacharca. Paicunatami, Judá llactata jatun mandaj Sedequías shuti runaca, Babilonia llactata jatun mandaj Nabucodonosor runapajman cacharca. Chai cartapica, cashnami nijurca:

⁴Tucuita Mandaj, israelcunapaj Taita Diosca, cashnami nin: “Jerusalenmanda Babiloniaman ñuca prezu cachashcacunataca, tucuicunatami cashna nini:

⁵‘Huasicunata shayachishpa, chaipi causai callarichilla. Huertacunapi tarpushpa, chaipi fucushcacunatapash micuichilla.

⁶Cangunaca cazarashpa, churicunata, ushicunata charichilla. Cangunapaj churicunatapash, ushicunatapash, chaipi cazarachinallami canguichi. Chashna cazarachijpimi, paicunapash huahuacunata charinga. Tucuringapaj randica, chai llactapica ashtahuan miraichilla.

⁷Cangunata ñuca prezu cachashca pueblopaca, casilla ali causaita mascaichi. Shinallata chai pueblota alita rurachunga, Mandaj Dios ñucata mañahuaichi. Chai puebloman ima llaquipash na shamujpimi, cangunapash casilla aliguta causanajunguichi’ ninimi” nircami.

⁸Tucuita Mandaj, israelcunapaj Taita Diosca, cashnatapashmi nin: “Cangunahuan causanajuj villajcuna, yachajcuna cangunata umachinajuchunga, na saquinachu canguichi. Cangunallata muscushcacunatapash, na yarinachu canguichi.

⁹Paicuna villachungaga, na cachamurcanichu. Llullashpami, ñuca shutipi villanajun” ninmi Mandaj Diosca.

¹⁰Mandaj Diosca, cashnatapashmi nin: “Babilonia llactapi canguna causanajushca ña canchis chunga huata pactajpica, cangunataca ricuj shamushami. Chaipica, cangunata cai llactaman tigrachimungapajmi, cangunaman rijchachinshna ñuca alita villashca shimicunataca pactachisha.

¹¹Cangunaman ñuca imatalla ruranata yarijushcataca, ñucami yachani. Casilla ali causaita caranatami yarijuni, llaquicunataca na cachashachu. Canguna shuyanajushcatami caragrini” ninmi Mandaj Diosca.

¹²“Shina rurajpimi, ñucata mañanguichi. Ñucapajman shamushpa mañajtaca, ñucapash uyajushami.

¹³Cangunaca, tucui shunguhuanmi ñucataca mascahuanguichi. Shina mascashpaca taringuichillami” ninmi.

¹⁴Mandaj Diosca, cashnatapashmi nin: “Cangunahuanga, tari tucushcami casha. Prezu apai tucushcacunataca tigrachimushpami, tucui llactacunamanda, maimanlla ñuca llujchishpa cachashca tucui pushtucunamanda tandachimusha. Maimanda ñuca llujchishpa cachashca cashpapash, chai pushtumanllatami tigrachimusha” ninmi Mandaj Diosca.

¹⁵Ashtahuangarin cangunaca: “Mandaj Diosca, Babilonia llactapipashmi, pai ima nishcata villajcunataca, ñucanchiman cushca” ninajunguichimi.

¹⁶Shina cajpipash Mandaj Diosca, David mandashpa tiarinapi tiajuj jatun mandajmandapash, cangunahuan na prezu apai tucushpa, cai pueblopi puchushca causanajuj tucui canguna puramandapash, cashnami nin.

¹⁷Tucuita Mandaj Diosmi, cashna nin: “Ricuichi, paicunata fiñashpami espadata, yarjaita, jatun ung:uita cachamugrini. Micuitapash na ushanalla, yapata ismushca jigoscunatashnami ruragrini.

¹⁸Espadahuan, yarjaihuan, jatun ung:uihuanmi catiriashpa llaquichigrini. Tucui cai pachapi tiaj llactacunapica, na cazushpa asi tucuna, ima llaquipash japishpami ali canman ni tucuna, manllarina, asishpa ricui tucuna, rimajpi pingai tucuna cachunmi saquigrini. Shinallata maijan llactaman cashpapash, ñuca llujchishpa cachajpica tucuicunami, ima llaquipash japishpaca alichari canman ninajunga” ninmi.

¹⁹Mandaj Diosca, cashnatapashmi nin: “Cangunallatami, ñucata servij, ñuca ima nishcata villajcunahuan villachishca ñuca shimicunataca, na uyangapaj munarcanguichi. Pundamandapacha na shayajushpa villachijujpipash, na cazushpami causarcanguichi. Mandaj Dios ñucami, chashna nini.

²⁰Jerusalenmanda Babilonia llactaman ñuca prezu cachamushcacunaca, cangunata Mandaj Dios ñuca rimashcata uyaichi” ninmi.

²¹Tucuita Mandaj, israelcunapaj Taita Diosca, Colaías shuti runapaj churi Acab shuti runamandapash, Maasías shuti runapaj churi Sedequías shuti runamandapash cashnami nin: “Ricuichi, paicunaca llullashpallami, ñuca shutipi cangunaman villanajun. Paicunataca ñucaca, Babilonia llactata jatun mandaj Nabucodonosor runapaj maquipimi churani. Paicunataca, cangunapaj ñaupajpillatami huañuchinga.

²²Shina rurajpimi, Judá llactamanda Babilonia llactaman prezu apai tucushcacunaca, ima llaquipash japishpami ali canman nishpa, cashna ninajunga: ‘Mandaj Diosca candapash, Sedequías shuti runatashna, Acab shuti runatashna rurashpami ali canman. Babilonia llactata jatun mandajca, chai ishcai runacunataca, ninapimi cusarca’ ninajungami.

²³Paicunaca, Israel puracunapica, jatun nalitami ruranajurca. Paicunaca, cazarashca jahuami paicunapaj cumbacunapaj huarmicunahuanllata causanajurca. Shina cashpapash napash ñuca villachun cachamujpitami, llullashpalla ñuca shutipi villanajurca. Chaitaca, tucuitami yachani, ñucami chaitaca ricuchigrini” ninmi Mandaj Diosca nishpami, escribishpa cacharca.

²⁴Diosmi, Jeremiastaca cashna nijurca: “Nehelam shuti pueblomanda Semaías shuti runaman, cashna rimashpa escribi:

²⁵Tucuita Mandaj, israelcunapaj Taita Diosca, cashnami nin: ‘Canga, tucui cai Jerusalenbi causajcunaman, Maasías shuti runapaj churi Sofonías shuti curaman, tucui caishuj curacunamanmi, cambaj shutipi escribishca cartacunata cachamurcangui. Chai cartacunapica, cashnami nircangui:

²⁶Mandaj Diosmi candaca, Joiada shuti curapaj randi, paipaj huasipi tucuita ricuj cura cachun churarca. Maijan muspa runa, profeta tucushpa, imata villai callarijpica japishpami, caspita utushcapi chaquita canichishpa, prezu churana cangui.

²⁷Shina cashcamanda cunanga, ¿imamandata Anatot shuti pueblomanda Jeremías cangunaman imatalla villajujpica, rimashpa na jarcanguiyari?

²⁸Ashtahuangarin paimi, Babiloniapi causanajujpi ñucanchiman, cashna nishpa cachamurca: Chai llactapica, unai huatacunatami prezu causagringuichi. Huasicunata shayachishpa tiarichilla. Huertacunata rurashpa, chaipi fucushcacunatapash micuichilla nishpami cachamurca’ nishpa escribi” nijurcami.

²⁹Sofonías shuti curapash, profeta Jeremías uyajujpillatami, chai cartataca leyishca carca.

³⁰Chaimandami Mandaj Diosca, Jeremiastaca cashna nijurca:

³¹“Tucui chaiman prezu apai tucushcacunaman, cashna nishpa escribi: Mandaj Diosca, Nehelam shuti pueblomanda Semaías shuti runataca, cashnami nin: ‘Semaías shuti runataca, na ñuca villachun cachamurcanichu. Llullashpami, cangunaman ñuca shutipi villajurca. Pai llullashcata canguna yariajlla causanajuchunmi, chashna villajurca.

³²Chashna rurashcamandami Mandaj Dios ñucaca, cashna nini: Ricuichi, Nehela shuti runamanda Semaías shuti runataca, paipaj miraicunandimi llaquichigrini. Paica, cai gente puracunapica, paipaj maijan churipash na causangachu. Ñuca agllashcacunaman ñuca ima alita rurajtaca, paipash na ricungachu. Paimi, Mandaj Dios ñucata na cazunajuchun villajurca’ ninmi Mandaj Diosca, nishpa escribi” nijurcami.