Read Imbabura Highland Quichua JEREMÍAS 30 Bible Online

JEREMÍAS 30 - Imbabura Highland Quichua bible

JEREMÍAS 30

¹Mandaj Diosca, cai shimicunatami Jeremiasman cashna nishpa villarca:

²Israelcunata Mandaj Taita Diosca, cashna nishpami rimarca: “Ñuca canman rimashca tucui shimicunataca, tucuillata shuj libropi escribi.

³Mandaj Dios ñucami, cashna nini: Ricui, ñuca agllashca Israel puramanda, Judá llactapi causaj puramanda, prezu apai tucushcacunata tigrachimuna punllami chayamujun. Paicunapaj ñaupa taitacunaman ñuca carashca cai llactamanmi pushamusha. Caipimi aligutapacha causanajunga” nircami Mandaj Diosca.

⁴Caicunami Israel llactapi, Judá llactapi causajcunamanda, Mandaj Dios rimashca shimicuna.

⁵Mandaj Diosca, cashnami nijurca: “Paicunaca: ‘Casilla ali causaimi tianga nishpa caparijtaca na uyashpami, ninanda manllarishpa chujchushpa caparinajujta uyarcanchi’ ninajunmi.

⁶¿Shuj jari runaca, huahuata ungunllachu? Cunanga, chaita tapushpa yachaichi. Ñucaca, tucui jaricunatami unguna nanaihuan huarmishna, cinturasta llapirinajujta ricurcani. Tucuicunami, ñavipash quillu quillu tucunajurca.

⁷¡Aij chai punllacunapica, jatun llaquimari cagrin! Ima horapash na tiashca, ninan llaqui punllami chayamugrin. Jacobopaj miraicunapaca, ninan llaqui huatacunami canga. Ashtahuangarin paicunaca, chai llaquimandaca cacharichi tucungami.

⁸Tucuita Mandaj Diosca, cashnatapashmi nin: Chai punllapica, ñucami cangunapaj cunga tullupi tiajuj yugota faquisha. Cangunata yugushpa huatashcatapashmi fitisha. Chashna rurajpimi, shuj llactapi causajcunaca, na ashtahuan gañanda rurashpa charinga.

⁹Ashtahuangarin paicunata Mandaj Taita Diosta, paicunata jatun mandaj Davidtapashmi servinajunga. Paitami, mandaj cachun churasha” nijurcami.

¹⁰Mandaj Diosca, cashnatapashmi nin: “Ñucata servij Jacobopaj miraicunalla, na manllanachu canguichi. Can israelcunaca, ashallatapash na manllarinachu canguichi. Ricuichi, ñucami cangunataca cangunapaj miraicunandi, prezu causanajuj caru llactamanda quishpichimusha. Shinami Jacobopaj miraicunaca, aliguta samashpa causanga. Paicunataca, pipash na manllachingachu.

¹¹Ñucaca, cangunata quishpichingapaca cangunahuanmi cani. Ñucami cangunataca, caiman chaiman shuj llactacunaman cacharcani. Chai tucui llactacunatami tucuchisha. Ashtahuangarin cangunataca, na tucuchishachu. Imashna llaquichina cashcatallami llaquichisha. Cangunata llaquichinataca, napacha saquishachu” ninmi Mandaj Diosca.

¹²Mandaj Diosca, cashnatapashmi nin: “Cambaj jatun llaquica, na alichi ushanallami. Cambaj chugrica, ninanda nanachij chugrimi.

¹³Cambaj llaquita ricushpa alichingapaj mandajca, pipash na tianllu. Cambaca, ima jambi chayanapash na tianllu.

¹⁴Canda tucui juyajcunapash cungarcami. Candaca, pipash na mascanllu. Candaca, fiñaj runashnami chugrichircani. Canllata, yapa jatun nalita rurashcamanda, ashtaca juchacunata rurashcamandami, na llaquishpa ninanda fiñaj runashna astircani.

¹⁵Canda ninanda llaquichishcamandaca, ¿imashpata ninanda caparijungui? Cambaj nanaica, na jambinallachu. Canllata yapa jatun nalita rurashcamanda, ashtaca juchacunata rurashcamandami, chashna llaquichircani.

¹⁶Shina cajpipash canda tucuchijcunaca, tucuillami tucuchi tucunga. Canda tucui fiñajcunami, tucuilla prezu rinajunga. Canda sarujcunapashmi, sarui tucunajunga. Imatalla can charishcacunata tucui quichujcunatapash, shujcuna quichunajuchunmi saquisha.

¹⁷Ashtahuangarin can ali tucunata ñucallata cachamushpami, cambaj chugricunataca alichisha. Candaca, shitashcami sirin nishpami: ‘Cai Sion shuti pueblotaca, pipash na yarinllu’ ninajun” ninmi Mandaj Diosca.

¹⁸Mandaj Diosca, cashnatapashmi nin: “Ricuichi, Jacobopaj carpacunamanda prezu apai tucushcacunataca tigrachimushpami, paicunapaj carpacunataca llaquisha. Lomapi tiashca pueblopash, chai lomapillatami shayachi tucunga. Ñuca huasipash, punda imashna cashcashnallatami shayachi tucunga.

¹⁹Paicuna pashi ninajushcapash, ninanda cushijushca gentecuna caparinajujmi uyaringa. Paicunataca, ashtacatami mirachisha. Shinamandami, huaquinllapash na huañuchi tucunga. Paicunataca, ñuca mirachishcamanda na yangapi churai tucungachu.

²⁰Paicunapaj huahuacunaca, pundashnallatami canga. Paicuna tandanajushcapash, ñuca ñaupajpica shinllipachami canga. Paicunata llaquichishpa charijcunataca, tucuillatami llaquichisha” ninmi.

²¹Mandaj Diosca, cashnatapashmi nin: “Paicuna puramandallatami, paicunata mandajca llujshinga. Paicunata mandajca, paicunapaj chaupimandallatami llujshinga. Paitaca, ñucapajman quimirichun saquijpimi, ñucapajman quimirimunga. Ñucapajman quimirimuitaca, pipash na ushanllu.

²²Cangunaca, ñuca agllashcacunami canguichi. Ñucapash, cangunapaj Taita Diosmi casha” ninmi.

²³Ricuichi, Mandaj Dios cachamushca ninan huairahuan tamiashna llaquica, ninanda fiñarishpami llujshimunga. Pai alichishca charijuj ninan huairahuan tamiashna llaquica, paita na manllajcunapaj jahuapimi urmamunga.

²⁴Mandaj Dios ninanda fiñarishpa llaquichinataca, paipaj shungupi imashna yarijushcata rurashpa pactachingacaman, napacha ali tucungachu. Tucurimui punllacunapimi, chaitaca yachanguichi.