Read Imbabura Highland Quichua JEREMÍAS 31 Bible Online

JEREMÍAS 31 - Imbabura Highland Quichua bible

JEREMÍAS 31

¹Mandaj Diosca, cashnami nin: “Chai huatacunapica, ñucaca tucui Israel familiacunapaj Taita Diosmi casha. Paicunaca, ñuca agllashca gentecunami canga.

²Espadapi huañunamanda pacajushpa calpaj gentecunaca, jichushca pambapimi cushijuita tarirca. Israelcunaca, samanata mascangapaj rinajushpami, chashna tarirca” ninmi Mandaj Diosca.

³Mandaj Diosca, punda huatacunallatami, cashna nishpa villahuarca: “Candaca, causaita causana juyaihuanmi juyajuni. Chaimandami candaca, ashtahuan llaquijunilla.

⁴Jarihuan nara tacarishca cuitsashna israelcunalla, cangunataca llactata rurashpa cutin shayachisharami. Cangunaca, cutin juyaillaguta alichirishpami, panderota huactashpa, cushijushpa danzashpa llujshinguichi.

⁵Samaria urcu sachacunapipash, uvas yuracunata tarpunguichirami. Tarpunata yachajcuna tarpushpami, chaipi fucushcacunata micushpa cushijunajunga.

⁶Efraín urcupi cuidajcunapash: ‘Ñucanchita Mandaj Taita Diospajman, jatarishpa jacuchi. Sion shuti urcuman vichai rishunchi’ nishpa, ninanda caparina punllapash chayangami” nihuarcami.

⁷Mandaj Diosca, cashnami nin: “Jacobopaj miraicunamandaca, ninanda cushijushpa caparichiyari. Tucui llactacunapaj umashna llactataca, jatun cushijuihuan candaichiyari. Tucuicuna uyajta alicachishpa, cashna nichiyari: ‘Mandaj Dioslla, can agllashca puramanda huaquin puchushca israelcunata quishpichipairi’ nichiyari.

⁸Ricuichi, ñucami paicunataca, jahua lado llactamandaca tigrachimusha. Cai pacha tucuri llactacunamandami tandachimusha. Paicuna purapica, ñausacuna, suchucuna, vijsayu huarmicuna, huahuata ungushca huarmicunapash, ashtacapacha tandanajushcacunami caiman tigramunga.

⁹Paicunaca, huacashpami rinajunga. Ashtahuangarin, ninanda llaquishpami tigrachimusha. Jatun larca yacu ladocunata pushamushpami, ima nitijanapash illaj, ali ñanda pushamusha. Ñucami, israelcunapaca taita cani. Efrainga, ñuca punda churimi” ninmi.

¹⁰Llactacunapi causajcunalla, Mandaj Dios rimashcata uyaichi. Chaita uyashpaca, mama cucha manñacunapi tiaj, ashtahuan caru llactacunapipash, cashna nishpa villaichiyari: “Israelcunata llujchishpa, caita chaita cachaj Diosca, cutinmi tandachimunga. Shina tandachimushpaca, llamata michij runa, paipaj llamacunata cuidanshnami cuidanga” nichiyari.

¹¹Mandaj Diosmi, Jacobopaj huahuacunata quishpichirca. Paicunata yali, ninan shinlli runapaj maquimandami llujchirca.

¹²“Paicunaca, ninanda cushijushpa caparishpa candashpami, Sion shuti urcuman vichai shamunajunga. Mandaj Dios carashca alicunata japingapajmi calpanajunga. Micunata, vinota, aceiteta, llamacunata, huagracunatami japinajunga. Punllandi yacuta jichashca huertashnami, paicunapaj shungupica cushilla causanajunga. Ima horapash ima llaquitapash, cutinga na charingachu.

¹³Shinamandami, jarihuan nara tacarishca cuitsaca, danzashpa cushijunga. Chairalla viñaicunapash, rucucunapash tandanajushpami cushijunajunga. Paicuna huacanajushcataca, cushijuimanmi tigrachisha. Jatun llaquihuan causashcamandaca, samachishpami cushichisha.

¹⁴Ashtahuan ali micunacunata carashpami, curapaj shungutapash cushichisha. Chashna carajpimi ñuca agllashcacunaca, ñuca carashca alicunataca na munajta micunajunga” ninmi Mandaj Diosca.

¹⁵Mandaj Diosca, cashnatapashmi nin: “Ramá shuti pueblopica, ninanda caparishpa, ninan llaquihuan huacajushcami uyarirca. Raquel shuti huarmiguca, paipaj huahuacunamandami huacajun. Ama yapa huacaichu nijpipash, paipaj huahuacuna huañushcamandaca huacajurcallami” ninmi.

¹⁶Mandaj Diosllatami, paitaca cashna nin: “Ama ashtahuan huacaichu. Cambaj ñavimanda, viquitaca ficharilla. Cashna llaquita can apajushcamandaca, alitami cusha. Fiñaj runapaj llactamandaca tigramungami” ninmi Mandaj Diosca.

¹⁷Mandaj Diosca, cashnatapashmi nin: “Cambaca, jipa punllata shuyana tianrami. Cambaj huahuacunaca, quiquin llactamambachami tigramunga.

¹⁸Efraín llactataca, cashna caparishpa huacajtami uyarcani: ‘Canmi, ñucataca astihuarcangui. Millai huagrashna cashcamandami, llaquichi tucurcani. Cambajman cutin tigrachihuayari, ñucaca cambajman tigrarishallami. Canmi, ñucata Mandaj Taita Dios cangui.

¹⁹Canmanda anchurishca jipami, ninanda llaquirircani. Ñucallata nalita rurashcata yarishpami, ñuca changatapash chugrirircani. Napacha cunganallatami, ninanda pingai tucurcani. Chairalla viñajushpa juchata rurashcamandami, chashna pingai tucushpa musparijurcani’ nijujtami uyarcani.

²⁰Efraín llactaca, ¿ñucapaca nachu juyailla huahuagushna capan? ¿Nachu ñuca cushijuna huahua capan? Ima hora paimanda rimashcamandapacha, paitaca yarijurcanillami. Ñuca paita yarijushpaca, vijsa ucutapash nanajtami llaquirircani. Paitaca llaquishapachami, ninmi Mandaj Diosca.

²¹Can maita rishpapash, ricuchina jatun rumicunata churashpa ringui. Maijan ñanda rijushpapash, aliguta yariangui. Jarihuan nara tacarishca cuitsashna israelcunalla, canguna maita rishca ñandallatami, cangunapaj cai pueblocunamanllata cutin tigramunguichi.

²²Shinlli shungupacha tucushca ushilla, ¿ima horascamanda urai, vichai chashna purijugringuilla? Mandaj Dios ñucami cai llactapica, mushujta rurasha. Huarmica, cusapaj ladopimi canga” ninmi.

²³Tucuita Mandaj, israelcunapaj Taita Diosmi, cashna nin: “Prezu apai tucushcacunata ñuca tigrachimujpica, Judá llactapipash, chai llactapi tiaj pueblocunapipash, cashnatapash ninajungarami: ‘Imatapash cashcatapacha rurashpa causana pueblolla, Diospajlla urculla, candaca Mandaj Dios bendiciachun’ ninajungarami.

²⁴Chaipica, Judá llacta gentecunami causanajunga. Tucui chai pueblocunapica tarpujcuna, michijcunapashmi causanajunga.

²⁵Shaijushcacunapaj shungutapash samachishami. Llaquilla causajcunapaj almatapashmi cushichisha” ninmi.

²⁶Shina nijta uyashpaca, rijcharishpa ricurcanillami. Ñuca puñushcapash, aligupachami carca.

²⁷Mandaj Diosca, cashnami nin: “Ricuichi, shamui punllacunapica, Israel llactapipash, Judá llactapipash gentecunata, animalcunata mirachishpami jundachisha.

²⁸Imashnami paicunataca, fitishpa shitanata, tucuilla urmachinata, ninan llaquita ruranata, tucui ima tiajta chingachinata, llaquichinata yariajlla carcani, chashnallatami, cutin shayachishpa tarpunatapash yariajlla casha” ninmi Mandaj Diosca.

²⁹“Chai punllacunapica: ‘Jayaj uvasta taitacuna micushcamandami, huahuacunaca quirucunata nanachinshna canga’ nitaca, na ashtahuan ushangachu.

³⁰Ashtahuangarin juchata pai rurashcamandaca, paillatami huañunga. Maijambash jayaj uvasta micushpaca, paicunallatami quirucunataca nanachinshna canga” ninmi.

³¹Mandaj Diosca, cashnatapashmi nin: “Ricuichi, Israel llactapi, Judá llactapi causajcunahuan mushujta rurangapaj, ari ninajuna punllacunami chayamugrin.

³²Paicunapaj taitacunata maquimanda japishpa, Egipto llactamanda llujchimui punllapi, ari ninajushcashnaca, na rurashachu. Ñuca, paicunapaj cusa cajpipash, ñucahuan ari ninajushcataca, yangapi churashpami, na cazunajurca” ninmi Mandaj Diosca.

³³Mandaj Diosca, cashnatapashmi nin: “Shamui punllacunapica, israelcunahuan imatalla rurangapaj ari ninajushpaca, cashnami rurasha: Ñuca mandashcataca, paicunapaj yuyaipimi churasha. Shinallata paicunapaj shungupimi escribinshna churasha. Shina rurashpami ñucaca, paicunapaj Taita Dios casha, paicunapash ñucapajlla gentecunami canga.

³⁴Chaipica, paicunapaj cumbacunata cashpapash, paicunapaj huauquicunata cashpapash: ‘Mandaj Diosta rijsinami cangui’ nishpaca, pipash na yachachijungachu. Ñucataca, tucuicunami uchillamandapacha callarishpa, rurucunacaman rijsihuanga. Ñucallatami, paicuna nalita rurashcataca cungasha. Paicunapaj juchataca, napacha cutinga yarishachu” ninmi Mandaj Diosca.

³⁵Mandaj Diosca, punllata punchayachijuchun indita churajmi. Tutata, punchayachijuchun lunata, luzerocunata mandajmi, mama cucha yacutapash jatarichishpa manllanayaita huacachijmi. Paica, tucuita Mandaj Dios shutimi. Paimi cashna nin:

³⁶“Tucui chaicunata ñuca mandashca jahua, ñuca ñaupajpi imapash nali llujshijpica, chashnallatami israelcunapaj miraicunapash ñuca ñaupajpica, causaita causaicaman llacta caitaca na ushanga.

³⁷Mandaj Diosca, cashnatapashmi nin: Maijambash jahua pachata medi ushajpi, cai pacha ucumambash maicaman cashcata medi ushajpica, ñucapash israelcunataca, paicuna tucui nalita rurashcamandaca shitashallami” ninmi Mandaj Diosca.

³⁸Mandaj Diosca, caitapashmi nin: “Ricuichi, shamui punllacunapica, Jerusalén puebloca Hananeel shuti torremandaca, Esquinapi tiaj pungucamanmi, Mandaj Dios ñucapajlla cachun shayachi tucunga.

³⁹Chai pungumandaca, Gareb shuti lomacamanmi, cordelhuan medi tucunga. Chai lomamandami, Goa shuti pambaman muyunga.

⁴⁰Huañushcacunata pambana pugru pambapash, uchufata shitana pambapash, chai tucui pugru pambacunapash, Cedrón shuti jatun larca yacucaman, indi llujshimuj ladoman tiaj, caballocuna yaicuna pungu esquinacamanmi, Mandaj Dios ñucapajlla shicanyachishca pueblo canga. Shinamandami, paicuna na cutinga llujchishpa cachai tucunga. Napacha causaita causaicaman tucuchi tucungachu” ninmi.