Read Imbabura Highland Quichua JEREMÍAS 32 Bible Online

JEREMÍAS 32 - Imbabura Highland Quichua bible

JEREMÍAS 32

¹Nabucodonosor shuti runaca, Babilonia llactata chunga pusaj huatata ña mandajujpimi, jatun mandaj Sedequías shuti runaca, Judá llactataca chunga huatata ña mandajurca. Chai huatacunapimi, Mandaj Diosca cai shimicunata Jeremiasman villarca.

²Chai huatapica, Babilonia llactata jatun mandajpaj soldadocunaca, Jerusalén pueblotaca, chaupipi churashpami muyundi chapanajurca. Chai punllacunapica, profeta Jeremiasca, Judá llactata jatun mandajpaj huasi ñaupajpi tiajuj prezuna huasipimi, prezu tiajurca.

³Paitaca, Judá llactata jatun mandaj Sedequías runami, cashna nishpa prezu churashca carca: “¿Imashpata canga, cashna nishpa villangui?: Mandaj Diosca, cashnami nin: ‘Ricui, ñucami, cai pueblotaca Babilonia llactata jatun mandajpaj maquipi churani. Paimi, cai pueblotaca japinga.

⁴Judá llactata jatun mandaj Sedequías runaca, caldeo soldadocunapaj maquimandaca napacha pacajushpa calpangachu. Paica, Babilonia llactata jatun mandajpaj maquipi churai tucungapachami. Chai mandajhuanga, chimba purapacha shayarishpami parlanga. Paitaca, ñavi ñavimi ricunga.

⁵Sedequías shuti runataca, Babiloniamanmi apachun mandanga. Ñucallata cutin ricugringacamanmi, chaipi causajunga. Caldeocunahuan macanajushpaca, ashtahuanmi llaquichi tucunguichi ninmi Mandaj Diosca’ nishpami villajungui” nijurcami.

⁶Jeremiasca cashnami nirca: Mandaj Diosmi, ñucataca cashna nihuarca:

⁷“Ricui, cambaj taitapaj huauqui Salum shuti runapaj churi Hanameel shuti runami, cambajman shamunga. Paica: ‘Anatot shuti pueblopi ñuca alpata randihuai. Chai alpataca, canmi randi ushangui’ ningapajmi shamunga” nihuarcami.

⁸Mandaj Dios villashcashnallatami, ñuca tiopaj churi Hanameel shuti runaca, prezuna huasi patioman shamushpa, cashna nihuarca: “Cunanga, Benjamín llactapi tiaj Anatot shuti pueblopi ñuca charishca alpataca, can randilla. Ñuca taita carashca alpataca, canmi randina cangui. Chai alpa ama shujcunapaj tucuchunga, canmi randina cangui. Cambaj cachun chai alpata randihuailla” nihuarcami. Shina nijpimi, chaita randichunga, Mandaj Diosllata mandashcata yacharcani.

⁹Chaimandami, ñuca tiopaj churi Hanameel shuti runa, Anatot shuti pueblopi charishca alpataca randircani. Chai alpamandaca, patsaj iscun chunga chuscu gramo culquitami pezarcani.

¹⁰Chai jipaca, randishcata ricuchij cartata escribishpami sellarcani. Ñuca randijta chaipi ricuj runacunatapash shutita churachishpami, culquitaca balanzapi pezashpa curcani.

¹¹Chai jipami, jatushcata ricuchij cartataca, imashna mandashcashnallata, imashna ruran cashcashnallata, sellashcata japircani. Shujman yalichishpa escribishca, pascashca cartatapashmi japircani.

¹²Jatushcata ricuchij cartataca, ñuca tiopaj churi Hanameel shuti runapash, ñuca randijta ricushpa, shutita churashca runacunapash, prezuna huasi patiopi shayanajuj, Judá llacta tucui runacunapash ricujtami, Maasías shuti runapaj churi Nerías shuti runapaj churi Baruc shuti runaman curcani.

¹³Tucuilla paicunapaj ñaupajpimi, Baruc shuti runataca cashna nishpa mandarcani:

¹⁴“Tucuita Mandaj, israelcunapaj Taita Diosca, cashnami nin: ‘Jatushcata ricuchijuj cai sellashca cartatapash, cai pascashca cartatapash japi. Chaicunataca, ashtaca punllacunata tiachun, alpa mangapi churai.

¹⁵Cai llactapica, huasicunatapash, alpacunatapash, uvas chagracunatapash, paicunapaj cachun japinajushca alpata randina tiangarami’ ninmi. Tucuita Mandaj, israelcunapaj Taita Diosmi, chashna nin” nircanimi.

¹⁶Jatushcata ricuchij cartataca, Nerías runapaj churi Baruc shuti runaman cushca jipami, Mandaj Diostaca cashna nishpa mañarcani:

¹⁷“¡Jatun Mandaj Dioslla. Ricui, jahua pachatapash, cai pachatapash, cambaj rigraguta chutashpami, cambaj ninan ushaihuan rurarcangui! Can Diospaca, imata ruranapash na shinllichu.

¹⁸Canga, huaranga huaranga gentecunatapash llaquijmi cangui. Taitacuna jatun nalita rurashcamandaca, jipa huahuacunatami llaquichingui. Jatun ninan ushaita charij Taita Dioslla, cambaj shutica tucuita Mandaj Diosmi.

¹⁹Shinallata aligutapacha yarichijpash, juyaillacunata rurajpashmi cangui. Huañuna aichayu runacuna imashna causanajujtaca, tucuitami ricujungui. Imashna causashcamanda, imatalla rurashcamanda, tucuicunaman chashnatallata cungapajmi ricujungui.

²⁰Canmi, Egipto llactapica, pipash na rurai ushanalla juyaillacunata rurashpa ricuchircangui. Cunangamanmi Israel llactapipash, tucui runa purapipash, chaicunataca rurajunguira. Cunan punllacunapipash ricushcashnallatami, canga tucuipi rijsishca cangui.

²¹Can agllashca israelcunataca, pipash na rurai ushanalla juyaillacunata ricuchishpami, Egipto llactamandaca llujchimurcangui. Ninan ushaita charij cambaj maquihuan cambaj rigrata chutashpami, ninan manllaita cushpa llujchimurcangui.

²²Chai jipaca, paicunapaj ñaupa taitacunaman carashapachami nishpa juramentushca cai llactatami cararcangui. Cai llactaca lechepash, balun mishquipash ashtacapacha tiaj llactami.

²³Paicunaca, cai llactaman yaicumushpami, ninanda cushijunajurca. Ashtahuangarin can rimashcataca, na uyanajurcachu, can mandashcatapash na pactachinajurcachu. Imatalla rurachun can mandashcataca, imatapash na pactachircachu. Shinamandami, cai tucui llaquicunata paicunapaj jahuapi cachamurcangui.

²⁴Ricui, caldeocunaca cai pueblota mishashpa japingapajmi, tucui muyundipi ariete nishcacunata shayachinajurca. Cai puebloca, paicunahuan macanajungapaj shamuj caldeocunapaj maquipimi churai tucugrin. Espadahuan, yarjaihuan, jatun ung:uihuan llaquichi tucunajushcamandami chashna tucunga. Can villashcacunaca, ñami pactajun. Ricui, chaitaca can Diosllata ricunguimi.

²⁵¡Mandaj Jatun Dioslla! ¿Cai llactataca, caldeocunapaj maquipi churana cashpatachu ñucataca: ‘Alpata culquipaj randi. Chai randishcata ricuchunga, shuj ricujcunata churai’ nihuarcangui?” nishpami, Diosta mañarcani.

²⁶Chai jipami Mandaj Diosca, Jeremiastaca cashna nijurca:

²⁷“Ricui, ñucaca tucui cai pachapi causajcunata Mandaj Taita Diosmi cani. Ñucapaca, ¿imatapash na rurai ushanalla tianllu?

²⁸Shinamandami Mandaj Dios ñucaca, cashna nini: Ricui, cai pueblotaca caldeocunapaj maquipi, Babilonia llactata jatun mandaj Nabucodonosor runapaj maquipi, ñucallata churajpimi, cai pueblotaca japinga.

²⁹Cai pueblota llaquichinajuj caldeocuna yaicumushpami, ninata japichishpa tucuillata rupachinga. Chai huasicunatapashmi rupachinga. Chai huasi jahuapi tiaj patiocunapimi, Baal shuti diosman inciensota carashpa cushnichinajun carca. Shuj dioscunamambash, vinota carashpami talinajun carca. Chaimandami, ñucataca ninanda fiñachirca.

³⁰Israelcunapash, Judá llactapi causajcunapash, ñuca ñaupajpi imatapash alita rurangapaj randica, chairalla viñaimandapacha nalitalla rurashpami causanajurca. Israelcunaca, paicunapaj maquihuan rurashca dioscunahuan ñucata fiñachishpallami causanajurca. Mandaj Dios ñucami, chashna nini.

³¹Cai puebloca, ñuca ñaupajmanda anchuchi tucungapajmi, shayachishca punllamandapacha cunangaman ñucata llaquichishpa fiñachingapajlla causanajun.

³²Israelcunapash, Judá llactapi causajcunapash, paicunata jatun mandajcunandi, caishuj mandajcunandi, paicunapaj curacunandi, paicunaman villajcunandi, tucui nalita rurashpa ñucata fiñachishpa causashcamandami anchuchigrini. Judá llacta runacunapash, Jerusalenbi causajcunapashmi, ñucata fiñachihuarca.

³³Paicunaca, ñucaman ñavita ricuchingapaj randica, huashatami ricuchihuarca. Ñucaca, pundamandapacha na shaijushpa yachachijurcanillami. Ashtahuangarin canga, nalitami rurajungui nijpica, uyangapajpash na munarcachu.

³⁴Ashtahuangarin ñuca shutipi mañana huasitapash, paicuna rurashca millanayai dioscunata churashpami mapayachinajurca.

³⁵Hinom shuti runapaj churipaj pugru pambapipash, Baal shuti diospaj altarcunata rurashpami, Judá llactapi causajcunataca, juchata rurachinajurca. Paicunapaj churicunata, ushicunatapash, Moloc shuti diosman carashpa rupachingapajmi, chashna ruranajurca. Chaita ruranajuchunga, shuj shimitallapash na mandarcanichu. Chashna millanayaita paicuna ruranataca, yaritallapash na yarircanichu” nijurcami.

³⁶Tucuita shina nishpapash, israelcunata Mandaj Taita Diosca, cunanga cashnami nin: “Cangunaca, cai pueblotaca: ‘Jatun macanajuihuan, yarjaihuan, jatun ung:uihuan tucuchijuchunmi, Babilonia llactata jatun mandajpaj maquipi churagrin’ ninguichimi.

³⁷Ashtahuangarin ñucaca, ninandapacha fiñarishpa, napacha ashtahuan charingapaj munashpa llujchishpa cachashcacunataca, tucui cai pachamandami cutin tandachimusha. Shina tandachimushpami, imatapash na manllashpa, caipi causanajuchun churasha.

³⁸Paicunaca, ñucapajlla gentecunami canga. Ñucapash, paicunapaj Taita Diosmi casha.

³⁹Shinallata ima hora punllacamambash ñucata manllashpa causachunmi, paicunamanda shuj shunguta, shuj causaita cusha. Paicunapash, paicunapaj jipa miraicunapash, ali causaita charichunmi chashna rurasha.

⁴⁰Shinami paicunaman alita ruranataca, napacha saquingapaj causaita causaicaman ari ninajushun. Paicuna ñucamanda ama anchurichunga, ñucata manllana yuyaitami, paicunapaj shungupi churasha.

⁴¹Ñucaca, paicunaman alita rurashpami, paicunahuan cushijusha. Cai llactataca, cutinga na shitangapajmi, na llullashpa ñuca tucui shunguhuan, tucui almahuan tarpunshna churasha” ninmi.

⁴²Mandaj Diosca, cashnatapashmi nin: “Cai llactapi causajcunaman, tucui cai llaquita apamushcashnallatami, paicunaman tucui alicunata apamushami nishcataca pactachisha.

⁴³Cangunaca: ‘Cai llactaca gentecunapash, animalcunapash illaj, jichushcami tucun. Cunanga, caldeocunapaj maquipimi’ ninajunguichimi. Canguna chashna ninajushca llactapillatami japinajunga.

⁴⁴Ashtahuangarin caimanda prezu apai tucushcacunataca, ñucami tigrachimusha. Paicunami, alpacunataca culquipaj randinajunga. Randishcata ricuchij cartacunatapashmi ruranajunga. Chaicunataca, randijta ricujcunata escribichishpami sellanajunga. Benjamín llactapi, Jerusalén muyundi llactacunapi, Judá llactapillata tiaj caishuj pueblocunapi, urcucunapi tiaj pueblocunapi, Sefela shuti pamba pueblocunapi, Neguev pamba pueblocunapipashmi, alpacunata randinajunga” ninmi Mandaj Diosca.