Read Imbabura Highland Quichua JEREMÍAS 33 Bible Online

JEREMÍAS 33 - Imbabura Highland Quichua bible

JEREMÍAS 33

¹Jeremiasca, prezuna huasi patiopi tiajujpillatami, Mandaj Diosca cai shimicunata cutinllata Jeremiasman cashna nishpa villajurca:

²“Mandaj Dios ñucami, cai pachataca rurarcani. Ñucami, tucuita rurashpa shinllitapacha churarcani. Ñuca shutica, Mandaj Dios shutimi. Ñucami, cashna nini:

³‘Ñucata caparihuailla, ñucaca tigrachishallami. Can na yachashca, pacalla tiajuj jatun yachajunacunatami yachachishalla’ ninmi” nijurcami.

⁴Israelcunata Mandaj Taita Diosca, ariete nishcacunahuan, jachacunahuan urmachi tucushca cai Jerusalén pueblo huasicunamandapash, Judá llactata jatun mandajcunapaj huasicunamandapash, cashnami nin:

⁵(“Caipi causajcunaca, caldeocunahuan macanajungapajmi shamunajurca. Shinamandami caicunapica, huañushcacunata jundachinajurca. Paicunallata, yapa nalita rurashpa causashcamandami, ninandapacha fiñarishpa cai pueblopi causajcunamandaca, ñuca ñavita shujman churarcani. Chashna ninandapacha fiñarishpami, ñucallata llaquichircani).

⁶Ricuichi, ñucami ali tucunatapash, jambitapash apamushpa jambisha. Chai jipaca, tucui llaquimanda alichishpami, na tucurij, na llullaj, casilla ali causaita carasha.

⁷Judá llactamanda prezu apai tucushcacunata, shinallata Israel llactamanda prezu apai tucushcacunatapash tigrachimushami. Chashna tigrachimushpami callaripishnallata, cutin alichisha.

⁸Ñucata fiñashpa juchata rurashca tucui nalicunamandapashmi fichasha. Ñucata fiñashpa tucui juchata rurashcatapash, jariyashpa juchacunata rurashcatapashmi cungasha.

⁹Paicunaca, cai pachapi tiaj tucui llacta purapica, ninanda cushijuna, alicachina juyailla shutimi ñucapaca canga. Israelcunaman tucui alicunata rurashcatami, paicunaca uyanga. Manllarinayai alicunata rurashpa, casilla ali causaita carajta ricushpami, manllashpa chujchunajunga” ninmi.

¹⁰Mandaj Diosca, cashnatapashmi nin: “Cangunaca, Judá llactapi tiaj pueblocunata, Jerusalén ñangunataca: ‘Cai pushtuca, shuj runallapash, animalcunallapash illaj, jichushcami siringa’ ninajunguichimi. Chashnallatami runacunapash, animalcunapash illaj, llaquinayaita tucuchi tucushca siringa.

¹¹Shina cajpipash jatun cushijuihuan candanajuj uyaringarami. Cusayu tucushpa, huarmiyu tucushpa candanajujpashmi uyaringa. ‘Tucuita Mandaj Diostami alicachinguichi. Mandaj Diosca aligupachami. Paica, causaita causaicaman llaquijunllamari’ nishpa candajpashmi uyaringa. Ñucaman caranacunata apamushpa, Mandaj Dios ñucapaj huasiman shamujcuna, pashi nishpa candajpashmi uyaringa. Prezu apai tucushcacunata tigrachimushpami, callaripishnallata cai llactapi causachun churasha” ninmi Mandaj Diosca.

¹²Tucuita Mandaj Diosca, cashnatapashmi nin: “Cai pushtucunaca, runacunapash, animalcunapash illaj, jichushca pambashnami canga. Shina cashpapash, ashtaca animalcunata michijcunami, chugllacunata rurashpa cuidanajunga.

¹³Urcucunapi tiaj pueblocunapi, Sefela shuti pamba pueblocunapi, Neguev pamba pueblocunapi, Benjamín llactapi, Jerusalén muyundi pambacunapi, Judá llactapi tiaj tucui caishuj pueblocunapipashmi, michijcunaca paicunapaj animalcunata cuentanajunga” ninmi Mandaj Diosca.

¹⁴Mandaj Diosca, cashnatapashmi nin: “Ricuichi, israelcunaman, Judá llactapi causajcunaman, ñuca imalla ali shimicunata pactachishapachami nishcata shinllitapacha churana punllacunaca chayamugrinmi.

¹⁵Chai punllacunapi, chai huatacunapica, Davidpaj mirai puracunamandami, imatapash cashcatapacha ruraj Retoñota llujchisha. Paimi, cai llactapica, imatapash cashcatapacha ricushpa aliguta mandajunga.

¹⁶Chai punllacunapimi, Judá llactaca quishpichi tucunga. Jerusalenbi causajcunaca, imatapash na manllashpami, aliguta causanajunga. Paicunaca: ‘Mandaj Diosmi ñucanchiman imagutapash cashcatapacha ruran’ ninajungami.

¹⁷Mandaj Diosca, cashnatapashmi nirca: Davidpaj mirai puracunamandaca, israelcunata mandangapaj tiarinapi tiarijca, napacha illangachu.

¹⁸Shinallata curacunapash, levitacunapash, animalcunata cushpa ñuca ñaupajpi tucuillata rupachij runapash, granocunata ñucaman cushpa rupachijpash, animalta ñucaman cushpa punllandi huañuchijpash, napacha illangachu” ninmi.

¹⁹Mandaj Diosca, cai shimicunatami Jeremiasman cashna nishpa villarca:

²⁰“Mandaj Dios ñucami, cashna nini: Ñucaca, punlla canapica punlla cachun, tuta canapica tuta cachunmi mandashpa churarcani. Chaita canguna yangapi churashpa, tutapash, punllapash illachun ni ushanalla cajpica,

²¹ñucapash ñucata servij Davidman ari nishcataca, yangapi churaimanllami. Mandashpa pai tiarinapi pipash ama tiarishpa mandachunga, na ashtahuan huahuacunata charichun saquimanllu. Shinallata ñucata servij levitacunahuan, curacunahuan ari ninajushcatapash, yangapi churaimanllami.

²²Jahua pachapi punchayachijcunatapash, mama cucha manñapi tiaj t'iyu alpatapash, pipash na cuentai ushanllu. Ñucata servij Davidpaj miraicunatapash, ñucata servij levitacunapaj miraicunatapash, chashnallatami pipash na cuentai ushanallata mirachisha” nircami.

²³Mandaj Diosca, cai shimicunatami Jeremiasman cashna nishpa villarca:

²⁴“Mandaj Diosca, ishcai aillucunatami agllarca. Ashtahuangarin, cunanga ñami jichurca nishpa, chai runacuna rimanajujtaca, ¿nachu uyarcangui? Shina nishpami paicunaca, ñuca agllashca gentecuna cashcataca na yashpa, yangapi churanajurca.

²⁵Shina cajpipash Mandaj Dios ñucaca, cashnami nini: Punllapash, tutapash paicunahuan ñuca ari nishcashnallata na tiajpi, jahua pachapash, cai pachapash imashna tiachun ñuca mandashcashna na tiajpica,

²⁶ñucapash Jacobopaj miraicunataca jichuimanllami. Ñucata servij Davidpaj miraicunatapash cungaimanllami. Shamui punllapica Abrahambaj, Isaacpaj, Jacobopaj miraicunata mandachunga, Davidpaj mirai puramandaca napacha churaimanllu. Ashtahuangarin ñucaca, caimanda prezu apai tucushcacunataca llaquishpami tigrachimusha” nijurcami.