Read Imbabura Highland Quichua JEREMÍAS 34 Bible Online

JEREMÍAS 34 - Imbabura Highland Quichua bible

JEREMÍAS 34

¹Babilonia llactata jatun mandaj Nabucodonosor shuti runaca, paipaj tucui soldadocunandi, pai mandajpi causanajuj tucui cai pachapi tiaj llactacunata mandajcunandimi shamurca. Chai tucui gentecunandi shamushpami, Jerusalenbi causajcunahuan, tucui caishuj pueblocunapi causajcunahuambash macanajurca. Chai punllacunapimi Mandaj Diosca, cai shimicunata Jeremiasman cashna nishpa villarca:

²“Israelcunata Mandaj Taita Dios ñucami, cashna nini: ‘Judá llactata jatun mandaj Sedequías shuti runapajman ucha rishpa, cashna nigri: Mandaj Diosca, cashnami nin: Ricui, cai pueblotaca, ñucami Babilonia llactata jatun mandajman cugrini. Paica, ninata japichishpami, tucuillata rupachigrin.

³Paipaj maquimandaca, cambash napacha quishpiringuichu. Ashtahuangarin prezu japi tucushpami, paipaj maquipipacha churai tucungui. Babilonia llactata jatun mandajtaca, ñavi ñavi ricunguipachami. Paica, canhuan chimba purami parlanga. Babilonia llactaman yaicunguipachami ninmi.

⁴Shina cajpipash, Judá llactata jatun mandaj Sedequías shuti runa, Mandaj Dios rimashcata uyairi. Mandaj Diosca, candaca cashnami nin: Canga, na espadahuan huañuchi tucunguichu.

⁵Casilla ali huañuitami charingui. Cambaj ñaupa taitacunaca, cambaj punda jatun mandajcunami carca. Paicuna huañujpica, mishquillagu ashnajuj jambicunatami rupachirca. Chashnashnallatami canmandapash rupachinga. Shinallata: ¡Aij, ñucanchi mandajlla! nishpami, yarishpa yarishpa huacanajunga. Ñuca villashca shimica, chashnapachami pactanga ninimi’ ninmi Mandaj Diosca” nihuarcami.

⁶Profeta Jeremiasca, Jerusalenbimi Judá llactata jatun mandaj Sedequías shuti runaman, tucui cai shimicunata villajurca.

⁷Babilonia llactata jatun mandajpaj soldadocunaca, Jerusalenbi causajcunahuan, Judá llactapi puchushca tucui pueblocunapi causajcunahuan, Laquis shuti, Azeca shuti pueblocunapi causajcunahuanmi macanajurca. Judá llactapica, muyundi jatun pircahuan jarcashca pueblocunamandaca, chai pueblocunallami puchushca carca.

⁸Jatun mandaj Sedequías shuti runaca, tucuicunata cacharingapajmi, Jerusalenbi causaj tucui gentecunahuan ari nijurca. Chai jipami Mandaj Diosca, cai shimicunata Jeremiasman villarca.

⁹Paicunata servij jaricuna cajpi, huarmicuna cajpipash, hebreo puracunataca, tucuicunata cacharichunlla. Cangunata servishpa causachunga, Judá llactapi causanajuj cangunapaj huauquicunatallataca, pipash na charinachu canguichi nishpami, ari nichirca.

¹⁰Paicunata servij jaricunata, huarmicunata cacharinami canguichi nishpa ari nichishcatami, tucui mandajcunapash, tucui shuj gentecunapash uyanajurca. Pitapash na ashtahuan servij cachun charinachu canguichi nishcata cazushpami cacharinajurca.

¹¹Shina cacharishca jipaca, yangallatami cacharishcanchi nishpami, paicunata servijcunataca jaricunatapash, huarmicunatapash cacharishpa cachashcacunataca, cutinllata servichun tigrachinajurca.

¹²Mandaj Diosca, cai shimicunatami Jeremiasman cashna nishpa villarca:

¹³“Israelcunata Mandaj Taita Diosca, cashnami nin: ‘Ñucaca, cangunapaj ñaupa taitacunahuanga, Egipto llactapi causajcunata servishpa, gañan causanajushcamanda llujchimui punllapimi, cashna nishpa ari nircanchi:

¹⁴Hebreopura cangunapaj huauquicunatallata, cangunaman jatujpica, sucta huatatalla servichishpa charinguichi. Chai huata pactajpica, cachanguichilla nircanimi. Ashtahuangarin cangunapaj ñaupa taitacunaca, na rinrita mañachishpa uyarcachu.

¹⁵Cangunaca, tucuicunallatami cangunata servijcunata cacharishun nishpa, ñuca ñaupajpi aliguta rurashpa ñucapajman tigrarircanguichi. Chaita rurangapaca, ñuca shutipi mañana ñuca huasipimi, ari nircanguichi.

¹⁶Ashtahuangarin ñuca shutita yangapi churashpami, cangunata servij huarmicunata, jaricunata, paicuna munashcashna rurashpa causachun cachashpapash, cutin japircanguichi. Shina japishpami, cutinllata cangunata servijcuna cachun churarcanguichi’ ninmi” nijurcami.

¹⁷Chashna rurashcamandami, Mandaj Diosca cashna nin: “Cangunaca, cangunapaj huauquicunata, cumbacunata servichishpa charinamandaca, tucuicuna cacharinami canguichi nishpa villashcatami na cazurcanguichi. Ricuichi, chaimandami espadaman, jatun ung:uiman, yarjaiman ñucallata villashpa cacharigrini. Chai jatun llaquihuanmi cangunataca, cai pachapi tiaj tucui llactacuna rimajpi pingai tucuchun saquigrini. Mandaj Dios ñucami, chashna nini.

¹⁸Shicuta huañuchishpa ishcaipi chaupishpa, chai chaupita yalishpami, ñuca ñaupajpi cushijushpa ari ninajurca. Chashna yalishpa, ñucahuan ari nishcata saquishpa, na pactachij runacunatami, llaquipi churagrini.

¹⁹Judá llactata mandajcuna, Jerusalén pueblota mandajcuna, shuj mandajcuna, curacuna, cai llactapi causaj tucui gentecunapashmi, shicuta huañuchishpa ishcaipi shicanyachishca chaupita yalinajurca. Paicunatapashmi, chashnallata llaquichigrini.

²⁰Paicunata fiñashpa huañuchingapaj munajcunapaj maquipimi churagrini. Paicuna huañushcataca, jahuata rij alasyu animalcuna, sacha animalcunami micunga.

²¹Cai Judá llactata jatun mandaj Sedequías shuti runatapash, pai churashca mandajcunatapash, paita fiñashpa huañuchingapaj munajujcunapaj maquipimi churasha. Cangunapajmanda llujshishpa rishca, Babilonia llactata jatun mandajpaj soldadocunapaj maquipimi churasha.

²²Ricuichi, paicunataca cutinmi cai puebloman tigrachimusha. Paicunami, cangunataca macanajushpa mishanga. Cai pueblotaca ninahuan rupachijpimi, Judá llactapi tiaj pueblocunapica, shuj runatallapash na causachun saquingacaman, chulunlla pushtuman tigrachisha” ninmi Mandaj Diosca.