Read Imbabura Highland Quichua JEREMÍAS 36 Bible Online

JEREMÍAS 36 - Imbabura Highland Quichua bible

JEREMÍAS 36

¹Josías shuti runapaj churi, jatun mandaj Joacim shuti runa, Judá llactata ña chuscu huatata mandajujpimi, cashna tucurca: Mandaj Diosca, cai shimicunatami Jeremiasman cashna nishpa villarca:

²“Escribina cara pillushcata japi. Chaipica israelcunata, Judá llactapi causajcunata, tucui shuj llactapi causajcunata imashna llaquichinata, Josías shuti runa causajui punllacunamanda cunangaman ñuca villashca shimicunata tucuita escribi.

³Judá llactapi causajcunaca, cai tucui llaquicunahuan ñuca llaquichinata uyashpaca, tucuilla paicuna nalita rurashpa causanajushcamanda llaquiringapashchari. Chashna llaquirijpica, paicuna nalita rurashca juchataca, ñucapash cungashami” nircami.

⁴Shina nijpimi Jeremiasca, Nerías shuti runapaj churi Baruc shuti runata cayarca. Mandaj Dios tucui imatalla villashcata Jeremías villajpimi Baruc shuti runaca, shuj pillushca carapi escribirca.

⁵Chai jipami Jeremiasca, Baruc shuti runataca cashna nishpa cacharca: “Ñucaca, Mandaj Diospaj huasiman ama yaicuchun jarcai tucushcami cani.

⁶Shina cashcamanda na micushpa Diosta mañangapaj tandanajui punllapica, Mandaj Diospaj huasiman can yaicungui. Chaipica, Mandaj Diospaj Shimicunata ñuca rimajujpi, cai carapi can escribishcataca gentecuna uyajta leyingui. Judá llactapi tiaj tucui pueblocunamanda shamushcacunamambash, leyishpa uyachingui.

⁷Chaita uyashpaca, paicuna nali causanajushcata saquishpa tigraringapashchari. Paicuna mañashcapash, Mandaj Diospaj ñaupajman chayangapashchari. Mandaj Diosca, cai gentecunahuanga ninandapacha fiñarishpa, llaquichinatami villajurca” nijurcami.

⁸Shina nijpica, Nerías shuti runapaj churi Baruc shuti runaca, profeta Jeremías mandashcashnallatami, tucuita rurarca. Mandaj Diospaj Shimicunata carapi escribishcataca, Mandaj Diospaj huasipimi leyishpa uyachirca.

⁹Josías shuti runapaj churi, jatun mandaj Joacim shuti runa, Judá llactata picha huata iscun quillata ña mandajujpimi, cashna tucurca: Jerusalenbi tucui causajcunapash, Judá llactapi tiaj pueblocunamanda Jerusalenman tucui shamujcunapash, Mandaj Diospaj ñaupajpi na micushpa mañangapaj shamuchun nishpami villanajurca.

¹⁰Chaipimi Baruc shuti runaca, Jeremías rimashca shimicunata escribishca librotaca, tucui gentecuna uyajta, Mandaj Diospaj huasipi leyirca. Chaitaca, Safán shuti runapaj churi Gemarías shuti escribijpaj huasi ucumandami leyirca. Chai ucuca, Mandaj Diospaj huasiman yaicuna mushuj pungu, janaj lado patiomanmi carca.

¹¹Safán shuti runapaj churi Gemarías shuti runapaj churi Micaías shuti runaca, Mandaj Diospaj Shimicunata chai carapi leyijujtaca, tucuitami uyarca.

¹²Chaita uyashpami, jatun mandajpaj huasiman urai rishpa, escribij runa tiajuj ucuman yaicurca. Cai mandajcunami, chaipica tianajurca: Escribij Elisama shuti runapash, Semaías shuti runapaj churi Delaía shuti runapash, Acbor shuti runapaj churi Elnatán shuti runapash, Safán shuti runapaj churi Gemarías shuti runapash, Ananías shuti runapaj churi Sedequías shuti runapashmi, chaipi tiajunajurca.

¹³Paicunamanmi Micaías shuti runaca, carapi escribishcata gentecuna uyajta Baruc shuti runa leyijujpi, pai uyashcataca tucuita villajurca.

¹⁴Chaita villajpimi, chai tucui mandajcunaca, Nerías shuti runapaj churi Baruc shuti runata cashna nishpa cayachun, Netanías shuti runapaj churi Jehudí shuti runata cachanajurca: “Tandanajushcapi leyishpa uyachishca pillushca carata apashpa shamui” nigrichunmi cachanajurca. Shina nijpimi Baruc shuti runaca, chai pillushca carata apamushpa, chai mandajcunapajman shamurca. Netanías shuti runapaj taitaca, Selemías shutimi. Selemías shuti runapaj taitaca, Cusi shutimi.

¹⁵Paicunaca, Baruc runataca: —Cunanga tiarishpa, ñucanchimambash leyishpa uyachi— nijpimi Baruc runaca, leyishpa uyachirca.

¹⁶Chai tucui shimicunata uyashpaca, tucuicunami manllarishpa, caishuj chaishuj ñavitalla ricurinajurca. Chai jipami, Baruc runataca: —Cai shimicunataca, na cungashpami jatun mandajman villashun— ninajurca.

¹⁷Chai jipami, Baruc runataca: —Cunanga villayari. Jeremías villashca cai tucui shimicunataca, ¿imashnata escribircangui?— ninajurca.

¹⁸Shina ninajujpimi Baruc runaca, cashna nirca: —Jeremiasmi, tucui cai shimicunataca paipacha rimajurca. Chaitami ñucaca, cai carapica tintahuan escribishpa catijurcani— nircami.

¹⁹Shina nijpimi mandajcunaca, Baruc runataca cashna ninajurca: —Canguna maipi cashcata pipash ama yachachunga cambash, Jeremiaspash pacajugrichi— ninajurcami.

²⁰Shina nishpaca, Baruc runa charijushca pillushca carataca, escribij Elisama shuti runapaj ucupi saquishpami, jatun mandaj tiajuj ucu patioman yaicunajurca. Chaipimi, tucui chai shimicunata uyashcataca, jatun mandajman villanajurca.

²¹Chaita villajpimi jatun mandajca, Jehudí shuti runataca, pillushca chai carata apachun cacharca. Paimi, escribij Elisama shuti runapaj ucumanda apashpa, jatun mandajpash, paihuan tianajuj tucui mandajcunapash uyajta leyijurca.

²²Huatapaj iscun quillapica, tamia punllacuna cashcamandami jatun mandajca, tamia punllacunapi causana huasipi causajurca. Paipaj ñaupajpica, ninayashca carbonda churana jahuapimi nina rupajurca.

²³Jehudí shuti runaca, ñami quimsa pillushcatachu, chuscu pillushcatachu imachari leyishpa uyachirca. Shinamandami jatun mandajca, chai escribishcata quichushpa, escribina plumata fitinahuan caita chaita liquishpa, ninayashca carbonda churana jahuapi rupajuj ninapi shitarca. Chaipi shitashpami, pillushca chai carapi escribishcataca, paipaj ñaupajpi rupajuj ninapi tucuillata rupachirca.

²⁴Jatun mandajhuan, paita servij tucui mandajcunahuanga, chai tucui shimicunata uyashpapash, na manllanajurcachu. Paicunapaj churajushcatallapash, na liquinajurcachu.

²⁵Elnatán, Delaía, Gemarías shuti runacuna ama rupachipaichu ninajujpipash, jatun mandajca na uyashpami rupachirca.

²⁶Jatun mandajca, escribij Baruc shuti runatapash, profeta Jeremiastapash japichunmi, Hamelec shuti runapaj churi Jerameel shuti runata, Azriel shuti runapaj churi Seraiasta, Abdeel shuti runapaj churi Selemías shuti runata cacharca. Ashtahuangarin Mandaj Diosmi pacarca.

²⁷Jeremías villashpa Baruc runata escribichishpa pillushca carata, jatun mandaj rupachishca jipami, Mandaj Diosca cai shimicunata Jeremiasman cashna nishpa villarca:

²⁸“Pillushca carata cutin shujta japi. Chaipica, Judá llactata jatun mandaj Joacim shuti runa rupachishca carapi punda tiajushca tucui shimicunatallata escribi.

²⁹Chai jipaca, Judá llactata jatun mandaj Joacim runataca, cashna nigringui: Mandaj Diosca, cashnami nin: ‘Punda escribishpa pillushca carataca, canmi rupachishpa cashna nijurcangui: Cai pillushca carapica, ¿imamandata cashna nishpa escribircangui? Babilonia llactata jatun mandajca shamungapachami. Paimi, cai llactataca tucuchinga. Paica gentecunatapash, animalcunatapash na saquishpami tucuchinga’ nijurcanguimi ninmi.

³⁰Shinamandami Mandaj Diosca, Judá llactata jatun mandaj Joacim shuti runataca, cashna nin: ‘Paica, David mandashpa tiajushcapi tiarishpa mandachunga, shuj churitallapash na charingachu. Pai huañujpipash, punllapica rupaipi, tutapica chiri rasupimi shitai tucunga.

³¹Nalita rurashpa causashcamandaca paitapash, paipaj miraicunatapash, paita servijcunatapashmi llaquichisha. Llaquichishami nishpa ñuca villajpipash, paicunaca na cazurcachu. Tucui chai llaquicunatami, paicunapaj jahuapi, Jerusalenbi causajcunapaj jahuapi, Judá llacta runacunapaj jahuapi cachamusha’ ninmi nigringui” nijurcami.

³²Shina nijpimi Jeremiasca, pillushca shuj carata japishpa, Nerías shuti runapaj churi escribij Baruc shuti runaman curca. Chai carapimi Baruc shuti runaca, Judá llactata jatun mandaj Joacim runa rupachishca carapi tucui escribishca shimicunatallata, Jeremías cutin villajujpi escribijurca. Chai carapica, shuj shimicunatapash ashtahuan mirachircarami.