Read Imbabura Highland Quichua JEREMÍAS 37 Bible Online

JEREMÍAS 37 - Imbabura Highland Quichua bible

JEREMÍAS 37

¹Joacim shuti runapaj churi Conías shuti runapaj randica, Josías shuti runapaj churi jatun mandaj Sedequías shuti runami mandajurca. Paitaca, Babilonia llactata jatun mandaj Nabucodonosor shuti runami, Judá llactapi jatun mandaj cachun churarca.

²Mandaj Diosca, Jeremias runahuanmi paipaj Shimicunata villachirca. Ashtahuangarin chai shimicunataca, Sedequías runapash, paita servijcunapash, chai llactapi tucui gentecunapash na cazurcachu.

³Jatun mandaj Sedequías runaca: “Ñucanchita Mandaj Taita Diosta ñucanchimanda ninanda mañapai” nichunmi, Selemías shuti runapaj churi Jucal shuti runata, Maasías shuti runapaj churi Sofonías shuti curata, profeta Jeremiaspajman cachamurca.

⁴Jeremiastaca, nara prezu churashcachu carca. Chaimandami paica, gentecunahuan yaicujurca, llujshijurca.

⁵Faraonbaj soldadocuna Egiptomanda llujshimujujtami, Jerusalén muyundipi chapanajuj caldeo soldadocunaca yacharca. Chaita yachashpami, Jerusalenmandaca anchurishpa rinajurca.

⁶Chaimandami Mandaj Diosca, cai shimicunata Jeremiasman cashna nishpa villarca:

⁷“Israelcunata Mandaj Taita Diosca, cashnami nin: ‘Ñucata tapuchun cangunata cachamuj, cai Judá llactata jatun mandajtaca, cashna nigrichi: Ricuichi, cangunata ayudangapaj llujshimuj Faraonbaj soldadocunaca, ñami paicunapaj Egipto llactamanllata cutin tigrarca.

⁸Shinamandami caldeocunaca, cutin tigramugrin. Paicunaca, macanajushpa mishashpa japishpami, cai pueblotaca rupachinajunga’ ninmi.

⁹Mandaj Diosca, cashnatapashmi nin: ‘Caldeocunaca, anchurishpa rishcapachami nishpaca, na umachirinachu canguichi. Paicunaca, napacha anchuringachu.

¹⁰Cangunahuan macanajujuj caldeo soldadocunataca, tucuillacunata chugrichijpi chugrishca soldadocunalla puchushpapash, paicunapaj carpacunamanda tucuilla jatarishpami, cai pueblotaca rupachinga’ ninmi nigrichi” nijurcami.

¹¹Chai jipaca, cashnami tucurca: Faraonbaj soldadocuna shamunajujta yachashpami, caldeo soldadocunaca Jerusalén ladomanda anchurinajurca.

¹²Shina anchurijpimi Jeremiasca, Jerusalenbi causanajuj gentecunapaj chaupimanda anchurishpa, Benjamín llactaman ringapaj llujshijurca.

¹³Paica, Benjamín shuti pungutami llujshigrijurca. Chaipica, soldadocunata mandaj Irías shuti soldadomi cuidajurca. Paimi, profeta Jeremiastaca: —Canga, caldeocunapajmanmi rijungui— nishpa prezu japirca. Irías shuti runaca, Selemías shuti runapaj churimi. Selemías shuti runaca, Hananías shuti runapaj churimi.

¹⁴Irías japijpimi, Jeremiasca: —Pandatami nijungui, na caldeocunapajman rijunichu— nirca. Shina nijpipash na uyashpami Irías shuti runaca, Jeremiasta japishpa, mandajcunapaj ñaupajman pusharca.

¹⁵Mandajcunaca ninanda fiñarishpami, Jeremiastaca astishpa, Jonatán shuti escribij runapaj huasipi, prezu churanajurca. Chai huasitaca, prezuna huasitami rurashca carca.

¹⁶Chai huasipica Jeremiastaca, ucuman allashpa utujushca, quinraimambash utujushcacunapimi churarca. Chaipimi paica, tauca punllacunata tiajurca.

¹⁷Jatun mandaj Sedequías runaca, Jeremiasta chai ucumanda llujchimuchunmi cacharca. Chaimanda llujshimujpimi: —¿Mandaj Diosca, imatapash villanllu?— nishpa, paipaj huasipi pacalla tapurca. Shina tapujpimi Jeremiasca, cashna nirca: —Ari, pai villashcataca charinimi. Babilonia llactata jatun mandajpaj maquipimi, churai tucugringui— nircami.

¹⁸Jeremiasca, jatun mandaj Sedequías shuti runataca, cashnatapashmi nijurca: —Ñucata prezu churangapaca candapash, canda servijcunatapash, cai gentecunatapash, ¿imata rurashpata juchata rurarcani?

¹⁹Cunanga, cangunaman villajcunaca, ¿maipita? Paicunaca: ‘Babilonia llactata jatun mandajca cangunatapash, cai llactatapash na llaquichingapaj shamungachu’ nishpami villanajurca.

²⁰Jatun mandaj ñuca amolla, cunanga caigutallami mañagripani. Ñuca mañashcata ari nihuailla: Ñucaca, escribij Jonatán runapaj huasipi huañungapaca, na munapanichu. Ama chaiman cutin cachahuanguichu— nijurcami.

²¹Shina nijujpimi, jatun mandaj Sedequías shuti runa mandajpi, Jeremiastaca prezuna huasi patiopilla churashpa cuidanajurca. Paimanga, Tandata Rurajcunapaj chaquishca mishqui tandata ñanmanda apamushpami, punllandi caranajurca. Chai pueblopi tucuilla tanda tucuringacamanmi caranajurca. Shinami Jeremiasca, prezuna huasi patiopilla tiajurca.