Read Imbabura Highland Quichua JEREMÍAS 43 Bible Online

JEREMÍAS 43 - Imbabura Highland Quichua bible

JEREMÍAS 43

¹Paicunata Mandaj Taita Diosca, tucui cai shimicunata villachunmi, paicunapajmanllata cachamushca carca. Mandaj Taita Dios rimashca tucui cai shimicunata tucui gentecunaman, Jeremías villashpa tucuchishca jipami, cashna tucurca:

²Osaías shuti runapaj churi Azarías shuti runapash, Carea shuti runapaj churi Johanán shuti runapash, tucui caishuj jariyashca runacunapash Jeremiastaca, cashnami ninajurca: “Canga, llullashpallami nijungui. Ñucanchita Mandaj Taita Diosca: ‘Na Egiptopi causagrinachu canguichi’ nigri nishpaca, maita cachamushcangayari.

³Ashtahuangarin Nerías shuti runapaj churi Baruc shutimi, caldeocunapaj maquipi churashpa huañuchingapaj, na cashpaca Babilonia llactaman ñucanchita prezu cachangapaj, chashna nichun yuyaita cushcanga” ninajurcami.

⁴Shina nishpami, Carea shuti runapaj churi Johanán shuti runapash, soldadocunata tucui mandajcunapash, tucui gentecunapash, Mandaj Dios rimashcata na cazushpa, Judá llactapillata causangapaca na munanajurca.

⁵Ashtahuangarin Carea shuti runapaj churi Johanán shuti runahuan, soldadocunata tucui mandajcunahuanga, Judá llactapi huaquin puchushca gentecunatami tandachinajurca. Paicunaca, tucui caishuj llactacunamanda llujchishpa cachamujpi cutin tigramushpami, Judá llactapillata causanajurca.

⁶Jaricunatapash, huarmicunatapash, huahuacunatapash, jatun mandajpaj ushicunatapash, cuidaj soldadocunata mandaj Nabuzaradán shuti runa, Ahicam shuti runapaj churi Gedalías runahuan saquishca tucui gentecunatapashmi pushanajurca. Ahicam shuti runaca, Safán shuti runapaj churimi carca. Profeta Jeremiastapash, Nerías shuti runapaj churi Baruc shuti runatapashmi pushanajurca.

⁷Mandaj Dios rimashcata na cazushpami, Egipto llactaman yaicugrirca. Shina rishpaca, Tafnes shuti pueblomanmi chayanajurca.

⁸Tafnes shuti pueblopi cajpimi Mandaj Diosca, Jeremiastaca cashna nirca:

⁹“Jatun rumicunata, cambaj maquihuan japi. Chai rumicunataca, Judá llacta runacuna ricujta Tafnes shuti pueblopi Faraonbaj huasiman yaicuna chimba purapi tiaj ladrillota rurana turupi pambai.

¹⁰Shina rurashpaca, cashna ningui: Tucuita Mandaj, israelcunapaj Taita Diosca, cashnami nin: ‘Ricuichi, ñucata servij, Babilonia llactata jatun mandaj Nabucodonosor runatami, caiman cachamugrini. Shina cachamushpami, pai mandangapaj tiarinataca, cai rumicunapaj jahuapi churasha. Chai jahuapimi, paita llanduna carpatapash shayachinga.

¹¹Pai shamushpami, Egipto llactataca llaquinayaita tucuchinga. Cai llactapi causajcunaca, huañuchi tucunacunaca, huañuchi tucunajungami. Prezu apai tucunaca, prezumi apai tucunajunga. Espadapi huañunacunaca, espadapimi huañunajunga.

¹²Egiptopi tiaj dioscunapaj huasicunataca, ninata japichishpami rupachinga. Shina rurashpami chaipi causajcunataca, prezu apanga. Shinami Egipto llactataca, jahualla churajunata michij runa chafsinshna, imapash illajta saquinga. Shina rurashpapash, paica imapash na tucushpami, casilla paipaj llactamanllata tigranga.

¹³Shinallata Egipto llactapi tiaj Bet-semes shuti pueblopi rumi dioscunatapashmi faquinga. Egiptopi tiaj dioscunapaj huasicunataca, rupachishpami saquinga’ ninmi ningui” nircami.