Read Imbabura Highland Quichua JEREMÍAS 48 Bible Online

JEREMÍAS 48 - Imbabura Highland Quichua bible

JEREMÍAS 48

¹Tucuita Mandaj, israelcunapaj Taita Diosca, Moab shuti llactata llaquichinamandaca, cashnami nijurca: “¡Aij Nebo shuti pueblolla, tucuchi tucushca, pingaichi tucushcamari! Quiriataim shuti pueblotapash quichushcamari. Misgab shuti pueblopi causajcunapash, yapata musparishpami ninanda shaijushca.

²Moabitacunaca, na cutin paicunallata alicachirinajungachu. Hesbón shuti pueblopi causajcunami, paicunata fiñashpa: ‘Jacuchi, chai llactataca llacta puracunamanda chingachishunchi’ nishpa, nalitalla yarinajushca. Madmena shuti pueblolla, cambashmi fitijpishna tucuringui. Candaca, espadami catiriashpa llaquichinga.

³¡Horonaim shuti pueblotapash, faquinshnami ninanda llaquichishpa tucuchinajun nishpa, ninanda caparishpa huacashcami uyarijun!

⁴Moab llactaca, ninandami llaquichi tucurca. Uchilla huahuacuna ninanda caparishpa huacashcapash, uyarijtami llaquichirca.

⁵Luhit shuti pueblo vichaitaca, ninanda caparishpa huacashpami, vichai rinajunga. Horonaim shuti pueblo uraitapash, fiñajcunapash uyajtami ninanda caparishpa huacashpa, urai rinajurca.

⁶Pacajungapaj calpaichiyari, cangunapaj causaitaca quishpichichiyari. Jichushca pambapi tiaj retama yurashna causagrichiyari.

⁷Cangunaca, imatalla canguna charishcata, imapash ninan valishcacunata charishcata yariajllami causarcanguichi. Chaimandami cangunapash, apai tucunguichi. Cangunapaj Quemos shuti diospash paipaj curacunandi, paipaj mandajcunandimi prezu apai tucunga.

⁸Chai tucuchijca, tucuilla pueblocunaman shamushpami, shuj pueblotallapash, na quishpichinga. Pugru pambapash, loma jahua pambapashmi, tucuchi tucunga. Mandaj Diosllatami, chashna nirca.

⁹Jahuata richunga, Moab llactaman alasta cuichiyari. Chaipi tiaj pueblocunapica, pillapash causangapaj illajpimi, jichushca pambashna canga.

¹⁰Imatalla rurachun Mandaj Dios mingashcata, na aliguta pactachij runaca, ninanda llaquichi tucuchun. Paipaj espadahuan na huañuchigrij runapash, ninanda llaquichi tucuchun.

¹¹Moab llactapi causajcunaca, chairalla viñaimandapachami casilla aliguta causanajurca. Vinoca, chai fundupilla unaita tiashpapash, mishquillagu carcallami, mishquillagu ashnaipash na anchurircachu. Vinota shuj fundumanda caishuj funduman na yalichishcashnami paicunaca, maijan llactamambash na prezu apai tucurca” nijurcami.

¹²Mandaj Diosca, cashnatapashmi nijurca: “Chashna causashcamandami, shuj fundumanda shujman yalichijcunata cachamuna punlla chayamujun. Chai punllapi paicuna shamushpami, chai vinotaca shuj funducunaman yalichinajunga. Funducunamanda talishpami, chushajta saquinga. Cara muchilacunatapashmi liquinajunga.

¹³Shina rurajpimi moabitacunaca, Quemos shuti diosta yangallata charishcamanda, pingai tucunajunga. Bet-el shuti pueblota yariajlla causashcamanda, israelcuna pingai tucushcashnallatami, pingai tucunajunga.

¹⁴¿Imashnata cangunaca: ‘Ñucanchica, ninan shinlli runacunami canchi, ali macanajuj jaricunami canchi’ nigringuichi?

¹⁵Moab shuti llactaca, ñami tucuchi tucushca. Pueblocunapash, llaquinayaitami tucuchi tucushca. Chairalla viñai, agllai tucushca runacunapash, cungata muchui tucungapajmi urai rinajushca” nijurcami Jatun Mandajca. Paica, tucuita Mandaj Dios shutimi.

¹⁶“Moab llactapaj llaquicuna shamuna punllapash, ñami chayamugrin. Jatun llaquica, ñapashmi shamujun.

¹⁷Paipaj muyundipi causajcunaca, tucuicunallata llaquirichiyari. Paipaj shutita rijsijcunaca, tucuicuna: ‘Shinllipacha, juyailla vara caspimari carca. ¿Imashnata faquirircayari?’ nichi.

¹⁸Dibón shuti pueblopi causajcunalla, juyailla tiajushcamanda uriajushpa, chaquishca alpapi tiarichiyari. Moab llactata tucuchijmari, cangunahuan macanajungapaj shamushpa, cangunapaj jatun pircacunatapash urmachirca.

¹⁹Aroer shuti pueblopi causajcunalla, ñambi shayarishpa ricuichiyari. Quishpiringapaj pacajushpa calpajcunataca: ‘¿Imata tucurcayari?’ nishpa tapuichi.

²⁰Moab llactaca llaquichi tucushcamandami, pingai tucurca. Shina cashcamandaca, ninanda caparishpa huacaichiyari. Moab llacta tucuchi tucushcataca, Arnón shuti yacu manñapi causajcunamambash villaichiyari.

²¹Pugru pambapi tiaj pueblocunamanmi, jatun llaqui shamurca. Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Queriot, Bosra shuti pueblocunamanmi, jatun llaqui shamurca. Moab llactapica, ladollapi tiaj, carupi tiaj tucui pueblocunamanmi, jatun llaquica shamurca.

²⁵Ninan ushaita charij Moab llactaca tucurircami, paipaj rigrapash faquirishcashnami tucurca” ninmi Mandaj Diosca.

²⁶Moabitacunataca machashcatashna saquichi. Paicunaca, Mandaj Diostami jariyanajurca. Moabitacunaca, paicuna shunguta tigrachishca jahuapillatami urmanajunga. Paicunataca, na cazushpa asishpa ricui tucushcapash cachun.

²⁷Cangunaca, ¿nachu israelcunataca shuhuanajujta japishpashna na cazushpa asinajurcanguichi? Paicunata yarishpa parlanajushpaca, ninandami asinajurcanguichi.

²⁸Moab llactapi causajcunalla, pueblocunamanda llujshishpa, rumi jacacunapi causagrichi. Jatun huaicu patapi, paloma tazinda rurashpa tiarinshna causagrichilla.

²⁹Moab llactapi causajcuna jariyashpa jatun tucushcataca uyarcanchimi. Paicunaca, ninanda jariyashca, jatun tucushca, ninan shinlli tucushca, pitapash na manllaj, pitapash na cazuj shungucunami.

³⁰Mandaj Diosca, cashnami nin: “Ñucaca, manllanayaita paicuna fiñarishcatapash rijsinimi. Ashtahuangarin imatapash na rurai ushanajungachu. Paicuna na cazushpa jariyashcapash, yangallatami canga” ninmi.

³¹Shinamandami ñucaca, Moab llactamandaca ninanda caparishpa huacagrini. Tucui moabitacunamanda, Kir-hares shuti pueblopi causajcunamandaca, aij nishpami huacagrini.

³²Sibma shuti pambapi tiaj uvas chagralla, canmandaca Jazer shuti pueblopi causajcunamanda huacashcashnallatami, ninanda caparishpa huacasha. Cambaj malqui yuracunaca, mama cucha chimbacamanmi jatunyarca. Jazer shuti cuchacamanmi, ñaviyashpa viñarcangui. Shina juyailla viñashpa fucushcata tandachinalla cajpimi, chai tucuchijca chayamushpa tucuchirca.

³³Moab llactapi ali fucuj pambacunapi ninanda cushijunapash, na tiangachu. Uvasta cutana pushtucunapipash, vinoca illangami. Candashpandi uvasta sarunapash tucuringami, ima candanapash na tiangachu.

³⁴Hesbón shuti pueblopi causajcunaca, Eleale shuti pueblocaman uyarijtami, ninanda caparishpa huacanajurca. Jahaza shuti pueblocamambashmi uyarirca. Nimrim shuti yacucunapashmi, tucuchi tucunga. Chaimandami Zoar shuti pueblomandaca, Horonaim shuti puebloman uyarijta, quimsa huatata charij shicucunashna huacanajurca.

³⁵Mandaj Diosca, cashnami nin: “Moabita puramandaca, paicunapaj dioscunaman lomacunapi animalta carashpa huañuchijcunata, inciensota carashpa cushnichijcunataca tucuchishami” ninmi.

³⁶Shinamandami ñuca shunguca, gaitacuna huacanshna Moab llactamandaca huacanga. Kir-hares shuti pueblomandapashmi, gaitacuna huacanshnallata huacanga. Paicuna charingapaj imatalla mirachishcacunaca, tucuillami tucurirca.

³⁷Tucuicunapaj uma ajchatapashmi rutunga, tucuicunapaj barbastapashmi anchuchinga. Tucuicunapaj maquipipashmi, aspishpa chugrichi tucunajunga. Tucuicunami cañamuta churajunajunga.

³⁸Mandaj Diosca, cashnami nin: “Ñucami, Moab llactataca maucayashca funduta na munashpa, ñutunshna llaquichircani. Shinamandami moabitacunaca, tucui huasi jahuacunapipash, ñangunapipash ninanda caparishpa huacanajunga” ninmi.

³⁹¡Ninanda llaquirishpa huacaichiyari! ¡Moabitacunaca, ninandamari llaquichi tucushca! ¡Moab llactaca, huashaman tigrashpa calpashpamari, na cazushpa asi tucurca! Paipaj muyundipi tucui causajcunapaca, ninanda nalicachi tucushca, ninan manllai japi tucushcami causanajunga.

⁴⁰Mandaj Diosca, cashnami nin: “Ricuichi, Moab llactata llaquichingapaca, alasta pascashpa jatun anga shamunshnami shamunga.

⁴¹Shina shamushpami, pueblocunataca mishanga, jatun pircahuan jarcashca pueblocunatapashmi mishashpa japinga. Chai punllapica, Moab llactapi causaj shinlli runacunapaj shunguca, huahuata unguna nanaihuan huarmipajshnami canga.

⁴²Moab llactapi causajcunaca, Mandaj Dios ñucatami fiñashpa ninanda jariyanajurca. Shinamandami paicunapaj llactapash chingangacaman tucuchi tucunajunga” ninmi.

⁴³Mandaj Diosca, cashnatapashmi nin: “Moabitacunalla, cangunapaca ninan manllaipash, urmana utujupash, japina lazupashmi tianga.

⁴⁴Manllarishpa pacajungapaj calpashpapash, utujupimi urmanguichi. Utujumanda llujshishpapash, lazupimi japi tucunguichi. Ñucami, Moab llactapi causajcunaman jatun llaqui huatata apamugrini” ninmi Mandaj Diosca.

⁴⁵“Pacajushpa calpajcunaca, Hesbón shuti pueblo llandupimi, na ushashpa shayarinajurca. Ashtahuangarin Hesbón shuti pueblomandapash, Sehón shuti pueblo chaupimandapash, rupajuj nina llujshishpami, Moab llacta manña ladotapash rupachijurca. Ninanda caparinajuj gentecunaca, umacamanmi rupanajurca.

⁴⁶¡Aij moabitacunalla! Quemos shuti diosta yarij gentecunaca tucurircami. Cangunapaj churicunapash, ushicunapash shuj llactamanmi prezu apai tucunajurca.

⁴⁷Ashtahuangarin jipa punllacunapica, Moab llactamanda prezu apai tucushcacunataca cutinmi tigrachimusha” ninmi Mandaj Diosca. Moab llacta llaquichi tucunata villashca shimicunaca, caicamanmi.