Read Imbabura Highland Quichua JEREMÍAS 5 Bible Online

JEREMÍAS 5 - Imbabura Highland Quichua bible

JEREMÍAS 5

¹“Cunanga, Jerusalén ñangunapi purishpa, ali ricuichi. ¿Shuj runallapash, imatapash cashcatapacha ruraj, na llullaj shimita mascaj tianllu? Plazacunapi callarishpa mascashpa, tapushpa ricuichi. Shuj runallapash chashna ali ruraj tiajpica, Jerusalendaca quishpichishami.

²Maijan cashpapash: ‘Mandaj Diosca causajumbachami’ nishpa juramentushpapash, yangami chashna nijun” ninmi.

³Mandaj Dioslla, canga na llullaj cachunmi munangui. Paicunaca, can astijpipash na nanachircachu. Tucuita tucuchijpipash, napacha ali tucungapaj munanllu. Rumitapash yali shinlli shungu tucushpami, cambajman tigraringapaca napacha munarca.

⁴Ashtahuangarin ñucaca, cashnami yarijurcani: “Imagutapash na charijcunami, yuyai chingashcashna causan. Paicunami, paicunata Mandaj Dios mandashcatapash, paicunapaj Taita Dios llaquichinatapash, na yachan.

⁵Jatungunapajman rishpami, paicunahuan parlasha. Paicunaca, paicunata Mandaj Dios mandashcatapash, paicunapaj Taita Dios llaquichinatapash yachangami” yajurcanimi. Ashtahuangarin paicunapashmi yugota faquinajurca, yugota huatashcatapashmi fitinajurca.

⁶Shinamandami paicunataca, sachapi causaj león huañuchinga. Jichushca pambapi causaj atuj shamushpami tucuchinga. Leopardomi, paicunapaj pueblo muyundicunapica, llaquichingapaj pacalla chapanga. Maijambash chai pueblomanda llujshijtaca, japishcandimi micunga. Paicunallata, Diosta na cazushpa, ashtahuan ashtahuan caruyashcamandami, chai llaquica japinga.

⁷“Paicunapaj huahuacunapash, ñucata saquishpami, yanga dioscunapira juramenturca. Paicunaman imagutapash na munajta ñuca carashpa charijpitami, paicunaca cazarashca jahua shujcunahuan causanajurca. Taucapura tandanajushpami, culquimanda huainayaj huarmicunapaj huasiman rinajurca. Chai juchamandaca, ¿imashnata na llaquichishpa saquishayari?

⁸Virayashca caballocuna huacashpa catinajunshnami, tucuicuna shujcunapaj huarmicunata catinajurca.

⁹Chashna juchamandaca, ¿nachu astishpa llaquichina cani? Chashna nalita ruraj llactataca, ¿nachu paicuna nalita rurashcashnallata tucui shunguhuan llaquichina cani? Mandaj Dios ñucallatami, chashna nini.

¹⁰Cai pueblo muyundi pircacunaman vitsiashpa, chai pircacunata t'unichi. Chai pircacunaca, Mandaj Dios ñucapaca na canllu. Jahuamanda chapangapaj rurashca patacunamanda callarishpami urmachina canguichi. Ashtahuangarin na tucuillata tucuchinachu canguichi.

¹¹Israel aillucunapash, Judá aillucunapash, ishcandillatami ñucataca na cazunajurca” ninmi Mandaj Diosca.

¹²Mandaj Diosca na tianllu nishpami, cashna ninajun: “Diosca, na tianllu. Ñucanchitaca, ima llaquipash na japingachu. Pipash na espadahuan huañuchingapaj shamungachu, ima yarjaipash na tiangachu.

¹³Ashtahuangarin profetacunarami, huairashna chinganajunga. Paicunaca, Diospaj shimitaca napacha villanajunllu. Chaimandami, paicuna villashcashnallata tucurinajunga” ninajunmi.

¹⁴Shinamandami, tucuita Mandaj Taita Diosca, cashna nin: “Ricui, paicuna chashna nishcamandami cunanga, ñuca villashca shimicunataca, ninatashna cambaj shimipi churani. Chai gentecunataca, yamdatashnami rurani. Cai shimicunami, paicunataca tucuchinga” ninmi.

¹⁵Mandaj Diosca, cashnatapashmi nin: “Ricuichi, israelcunalla. Cangunata llaquichinajuchunga, caru llactamanda runacunatami pushamugrini. Paicunaca, pundamandapacha causanajuj, ninan shinlli runacunami. Canguna na uyashca rimaita rimajcunami. Chaimandami, paicuna imata rimajtapash na yachai ushanguichi.

¹⁶Paicunaca, tucuicunami ninan shinllicuna. Paicunapaj flechacunata alichinacunaca, huañushcata pambana utujushnami.

¹⁷Paicunami, canguna cozechashca granocunata, llamacunata, huagracunata, uvascunata, jigoscunata micushpa tucuchinajunga. Shinallata cangunapaj churicunatapash, ushicunatapashmi micunajunga. Chashna rurashpami, canguna chaitalla yariashpa causashca jatun pircacunahuan pueblocunatapash, espadahuan tucuchishpa, chushajta saquinajunga” ninmi.

¹⁸Mandaj Diosca, cashnatapashmi nirca: “Chai punllacuna chayamujpipash, tucuillataca na tucuchishachu.

¹⁹Chai punllacunapica: ‘Ñucanchita Mandaj Taita Diosca, ¿imamandata ñucanchitaca cashna llaquichin?’ ninajungami. Shina nijpica, cashna ningui: ‘Cangunallatami Mandaj Diosta saquishpa, cangunaman pai carashca llactapi shuj dioscunata servircanguichi. Chashnallatami cangunaca, na rijsishca runacunata servishpa, na rijsishca llactapi causagringuichi’ ningui” nircami.

²⁰“Caitaca, Jacobopaj miraicunaman villaichiyari, Judá llactapi causajcuna uyachun, cashna nichiyari:

²¹‘Juizu illaj, shungu illaj gentecuna. Cunanga, caita uyaichi: Cangunaca, ñavita charishpapash na ricuj, rinrita charishpapash na uyajcunami canguichica. Cunanga, caita uyaichiyari:

²²Mandaj Diosca, cashnami nin: Ñucataca, ¿nachu manllanguichi? Ñuca ñaupajpica, ¿nachu chujchunguichi? Ñucami t'iyu alpataca, causaita causaicaman tiachun mandashpa, mama cucha manñapi churarcani. Ñuca mandashcamandaca, na yalinllu. Ninan huairahuan yacu jatarishpapash, na maitapash ringachu. Chai t'iyu alpamandaca, na yalingachu.

²³Ashtahuangarin cai gentecunaca, na cazuj nali shungucuna cashpami, ñucamanda anchurishpa maitapash rinajurca.

²⁴Cangunapaj shungupica, cashnatallapash na yarishpami causarcanguichi: Cunanga, ñucanchita Mandaj Taita Diosta manllashpa causashunchi. Paimi, punda tamiatapash, jipa tamiatapash tamiana punllacunapillata cachamun. Cozecha tiachumbash, paillatami rupai punllacunata cachamun nishpallapash na yarishpami causarcanguichi.

²⁵Chashna nalicunata canguna rurashcami, chai alicuna shamunataca jarcarca. Cangunapaj juchallatami, chai alicunataca cangunamanda anchuchirca’ nichiyari.

²⁶Ñuca agllashca purapillatami, ñucata na manllajcuna tiarca. Lazuta churanshnami, llaquichingapaj pacalla chapanajurca. Runacunata japingapajmi, tugllacunata churanajurca.

²⁷Jaulapi alasyu animalcunata jundachishcashnami, paicunapaj huasipica umachina munailla jundashca tiajun. Chashnami, ninan charijcuna tucunajurca.

²⁸Carucaman punchapamba ricurijtami virayanajurca. Paicunaca, yapatapachami nalita ruranajurca. Taita mama illaj huahuacunamambash, ima alitapash na ruranajurcachu. Imagutapash na charijcunata llaquichinajujpipash, na mitsanajurcachu. Ashtahuangarin paicunata quichushpami charijyanajurca.

²⁹Shina rurashcamandaca, ¿nachu llaquichina cani? Chashna gentecunataca, ¿nachu paicuna nalita rurashcashnallata, tucui shunguhuan llaquichina cani? Mandaj Dios ñucallatami, chashna nini.

³⁰Cai llactapica, ninan manllarina, na ricunayai nalitami ruranajurca.

³¹Diosmanda villajcunapash, llullashpallami villanajurca. Curacunapash, paicuna munashcatami mandanajurca. Ñuca agllashcacunapash, chaitami munanajurca. Shina cashcamandaca, llaqui chayamui punllapica, ¿imatashi ruranguichi?” ninmi.