Read Imbabura Highland Quichua JEREMÍAS 51 Bible Online

JEREMÍAS 51 - Imbabura Highland Quichua bible

JEREMÍAS 51

¹Mandaj Diosca, cashnami nijurca: “Ricuichi, Babilonia llactatapash, chaipi causanajuj, ñucata fiñashpa jatarij runacunatapash llaquichingapaca ñucami, tucuchij jatun huairata cachagrini.

²Huairachinshna tucuchijcunata Babilonia llactaman cachamujpimi, chai llactataca chushajta saquinga. Paipaj jatun llaqui chayamui punllapica, tucui ladomandami paita llaquichingapaca jatarinajunga.

³Arcota chutashpa flechata shitajtapash, jirru churajunata churajushpa ninanda jariyajtapash, cashnami nishca: Chairalla viñaicunatapash na llaquishpa, tucuilla soldadocunata huañuchilla nishami.

⁴Caldeocunapaj llactapimi, huañushpa urmanajunga. Ñangunapillata, lanzacunahuan chugrichi tucushpami urmanajunga.

⁵Israelcunapash, Judá llactapi causajcunapash, tucuita Mandaj, paicunapaj Taita Diosmandaca, na sapalla huarmishna quedashcachu. Paicunapaj llactapi juchahuan junda cashpa, jucha illaj Taita Diosta fiñachishca cashpapash, na jichushpa saqui tucushcachu.

⁶Paicunapaj juchamanda, cangunapash ama huañushpa tucuringapaca, Babilonia llacta chaupimanda ucha llujshishpa tucuicuna calpaichi. Paicuna llaquichishcashnallata Mandaj Dios llaquichina punllacunami chayamushca. Paicunaman cuna cashcatami cugrin.

⁷Babilonia llactaca, oro copashnami, Mandaj Diospaj maquipica carca. Chai copamanda vinomi, tucui llactata machachirca. Chai vinotami, gentecunaca ufianajurca. Tucui llactacunapi causajcunami, juizu chinganshna tucunajurca.

⁸Babilonia llactaca, ñapashmi urmashpa ñuturirca. Paimandaca aij nichiyari. Paipaj nanaita alichingapashchari, paipaca bálsamo nishca jambita churaichiyari.

⁹Babilonia llactataca jambijpipash, na ali tucurcachu. Saquishpa, ñucanchi llactacunaman tucuicunallata jacuchilla. Paicunapaj juchamanda llaquichinaca, jahua pachamambash, fuyucamambashmi vichai chayamurca.

¹⁰Mandaj Diosca, ñucanchi imatapash cashcatapacha rurashcataca, michaman surcushpami ricuchishca. Ñucanchita Mandaj Taita Dios imatalla rurashcataca, Sion shuti pueblopi parlangapaj jacuchi.

¹¹Flechacuna mapayashcata fichaichi, jarcarina escudocunatapash rigrapi aparichi. Mandaj Diosca, Babilonia llactata tucuchingapaj yarishpami, Media shuti llactata jatun mandajcunapaj shungupi yarichishca. Mandaj Diosca, paipaj huasita paicuna urmachishcamandaca, chashnallatami llaquichinga.

¹²Babilonia pueblopaj muyundi jatun pircacunapica, banderata shayachichi. Chaipica, ali cuidaj soldadocunata ashtahuan churaichiyari. Ali alichirishpa chapaichi. Mandaj Diosmi, pai munashcashna llaquichinata yarijurca. Babiloniapi causajcunata llaquichishami nishcataca pactachingapachami.

¹³Ashtaca yacu chaupicunapi causajcunalla, cangunaca imapash ninan valishcacunatami juyailla charinguichi. Imatapash charingapajlla ninanda munashcashnallatami, canguna tucurinapash chayamushca.

¹⁴Tucuita Mandaj Diosca, paimandallatami cashna nishpa juramenturca: Ñucaca, canda fiñajcunataca, langosta jurucunatashna ashtacacunatami apamugrini. Paicunami, ninanda caparishpa canhuan macanajungapaj jatarinajunga” nijurcami.

¹⁵Diosmi, paipaj ninan ushaihuan cai pachataca rurarca. Paipaj ali yachaihuanmi, cai pachataca shinllitapacha churarca. Ali yuyaita charishpami, jahua pachatapash telata mandanshna churarca.

¹⁶Pai mandajpimi, yacucunapash jahua pachapica, culun nij uyarin. Fuyutapash, cai pacha tucuri manñacunamandami vichai apan. Paimi, punchapamba shitamunacunahuan tamiachishpa huairatapash, alichishca pushtumanda llujchin.

¹⁷Tucui gentecunami, imatapash na yachajcuna tucunajun, ima ali yachaitapash na charinllu. Labrashca dioscunata rurajcunapash, paicunapaj yanga dioscunaca, yangacuna cashcamandami pingai tucunajun. Chai dioscunaca, samaitapash na charinllu.

¹⁸Chai rurashcacunaca, asishpa ricui tucuna yanga dioscunallami. Jatun llaqui chayamui huatacunapica tucuringallami.

¹⁹Tucui imatapash Jacoboman caraj Diosca, napacha paicunashnachu. Paica, tucuita Ruraj Diosmi. Paica, tucuita Mandaj Dios shutimi. Israelcunaca, pai mandana varashna cachun agllashcacunami.

²⁰“Babilonia llactapi causajcunalla, cangunaca martilloshna, ima shuj macanajunacunashnami ñucapaca canguichi. Cangunahuanmi, shuj llactapi causajcunataca tucuchisha. Cangunahuanmi, llactacunata tucuchisha.

²¹Cangunahuanmi, caballocunatapash, chai caballocunapi tiarijcunatapash tucuchisha. Cangunahuanmi, carretacunatapash, chai carretacunapi purijcunandi tucuchisha.

²²Shinallata cangunahuanmi jaricunatapash, huarmicunatapash tucuchisha. Cangunahuanmi rucucunatapash, chairalla viñaicunatapash tucuchisha. Cangunahuanmi chairalla viñaicunatapash, jarihuan nara tacarishca cuitsacunatapash tucuchisha.

²³Cangunahuanllatami michijtapash, llamacunandi tucuchisha. Cangunahuanllatami, pambata yapujcunatapash, paicuna yapunajuj huagracunandi tucuchisha. Cangunahuanllatami trabajachijcunatapash, mandajcunatapash tucuchisha” nijurcami.

²⁴Mandaj Diosca, cashnatapashmi nin: “Babilonia pueblopi causajcunatapash, tucui Caldea llactapi causajcunatapash, tucui llaquita Sion pueblopi rurashcamandami, canguna ricunajujpillata chashnallata tigrachigrini” ninmi.

²⁵Mandaj Diosca, cashnatapashmi nin: “Ricui, tucuillata tucuchij urculla. Candami ninanda fiñani. Canmi, tucui llactacunata tucuchircangui. Ñuca maquihuan t'angashpami, candaca rumi jaca ucuman urmachisha. Rupashca uchilla urcutami saquisha.

²⁶Cambi imalla tiashcataca, huasi tigranapi churana shuj rumitallapash, pipash na japingachu. Huasi callarina ucuman churana rumitallapash, pipash na japingachu. Tucui causaicamanmi, llaquinayaita tucuchi tucungui” ninmi Mandaj Diosca.

²⁷Cai pachapica, banderata alsaichiyari. Chai pueblopi causajcunahuan macanajungapaj, trompetata huacachishpa llactacunamanda tandanajuichiyari. Paicunahuan macanajungapaca, Ararat, Mini, Askenaz shuti llactacunamanda runacunapash, tandanajuichiyari. Chai pueblopi causajcunahuan macanajuipi ali pushachunga, ali mandajta churaichiyari. Caballocunataca, ninan millai langostacunatashna vichai pushamuichiyari.

²⁸Media shuti llactata jatun mandajcuna, cangunapaj soldadocunata mandajcunandi, canguna churashca tucui mandajcunandi, canguna mandanajuj llactacunapi tucui causajcunandi, alichirichiyari.

²⁹Babilonia llactata llaquichingapaj, Mandaj Dios yarijushcataca pactachigrinmi. Chai Babilonia llactapica, pipash ama causachunmi, chulunlla pushtuman tigrachinga. Chashna rurajpimi, cai pachapash chujchushpa llaquilla quedanga.

³⁰Babilonia llactamanda ninan shinlli soldadocunaca, macanajuita saquishpami pacajungapaj shinlli torrecunapi vicharinajurca. Paicunaca, ushaipash illaj tucushpami, huarmicunashna tucunajurca. Paicunapaj huasicunaca rupajunmari, pueblo pungu aldabacunapash faquirishcamari.

³¹Paicunapaj llactata japingapaj tucui ladota yaicunajujta, Babilonia llactata jatun mandajpajman villangapaca, cartacunata apajcunapash, cati catimi cartacunataca chayachinajunga. Villajcunapash, cati catimi chayamunajunga.

³²Fiñajcunaca, jatun yacuta chimbanalla pushtucunatapashmi japinajurca. Baluarte nishcacunatapashmi rupachinajurca. Soldadocunaca, ninanda manllashpami chujchunajurca.

³³Tucuita Mandaj, israelcunapaj Taita Diosca, cashnatapashmi nin: “Babilonia llactapi causajcunaca, granota ña trillanashnami. Caimanda asha punlla jipami, cozechana punllacuna chayamugrin” ninmi.

³⁴“Babilonia llactata jatun mandaj Nabucodonosor runami, ñutushpa micuhuarca. Shina rurashpami, chushaj vasotashna saquihuarca. Ñucataca, dragón nishca animalshnami alitalla agllashpa, sajsajta micuhuarca. Shina micushpaca, llujchishpami shitahuarca.

³⁵Ñucatapash, ñuca familia puracunatapash chashna llaquichishcamandaca, Babilonia llacta jahuapica, ninan llaqui urmachun. Ñuca yahuarmandaca, Caldea llactapi causajcunaca, ninan llaquita apanajuchun” ninajungami. Sion shuti urcupi tiaj Jerusalenbi causajcunami, chashna ninajunga.

³⁶Shinamandami Mandaj Diosca, cashna nin: “Ricui, ñucami canmandaca shayarisha. Canda llaquichishcamandami, paicunatapash chashnallata llaquichisha. Paicunapaj mama cuchatapash, ninanda rijuj yacucunatapashmi chaquichisha.

³⁷Babilonia llactaca, rumi mundunllami tucunga. Chaipica, chacal nishca animalcunallami causanga. Manllarina, asishpa ricunallami tucunga. Chaipica, pipash na causangachu.

³⁸Leonguna huacanshnami, tucuicuna caparinajunga. Huahua leonguna huacanajunga.

³⁹Paicunaca, cunujlla chaupipi tianajujpimi, ñucaca jatun micuita rurashpa machachisha. Shina machashpa cushijushpami, causaita causaicaman ama rijcharingapaj puñunajunga. Mandaj Dios ñucami, chashna nini.

⁴⁰Paicunataca, maltun llamacunatashna, jari llamacunatashna, jari chivocunatashnami, huañuchina pushtuman apamuchun mandasha.

⁴¹¡Tucui cai pachapi causajcuna ninanda alicachishca Babilonia llactaca, llaquinayaitamari prezu japi tucushca! Babilonia llactaca, ¡llaquinayaitamari llacta puracunapica, ninanda manllarina tucushca!

⁴²Mama cucha yacumi, Babilonia jahuata shamushca. Manllanayaita mama cucha yacu jatarishpami, tucuita quilpashca.

⁴³Chai llactapaj pueblocunaca, llaquinayaitami tucuchi tucushca. Alpapash chaquishca, jichushcami tucushca. Chai jichushca alpapica, pipash na causangachu. Chaitaca, huañuna aichayu shuj runallapash na yalingachu.

⁴⁴Babilonia llactapaj Bel shuti diostaca, ñucami llaquichisha. Imata micushpa langashcatapash, cutinmi vijsamanda llujchisha. Cutinga, na ashtahuan shuj llactacunamanda paipajman shamunajungachu. Babilonia pueblo muyundi jatun pircapash urmangami.

⁴⁵Ñuca agllashcacunalla, paicunapaj chaupimanda llujshichiyari. Mandaj Dios ñuca, nina japirinshna fiñarishpa llaquichinamandaca, tucuicuna cangunapaj causaita quishpichichiyari.

⁴⁶Cangunapaj shungupica, na shaijunachu canguichi. Chai llactapi jatun llaquicuna tianata uyashpapash, na manllanachu canguichi. Chai llaquicunaca, huatan huatan uyarijungallami. Llactacunata mandashpa llaquichij puracunapashmi macanajunga.

⁴⁷Ricuichi, chaimandami Babilonia llactapi tiaj yanga dioscunataca ñuca tucuchina punllacuna chayamujun. Tucui chai llactami, pingai tucunga. Tucuicuna huañushpami, chaipillata urmanajunga” ninmi.

⁴⁸Mandaj Diosmi, cashnatapash nin: “Jahua lado llactamandami, Babilonia llactata tucuchingapaj shamunajunga. Paicuna shamushpa urmachijpica, jahua pachapash, cai pachapash, tucui chaipi imalla tiajcunapashmi, jatun cushijuihuan candanajunga.

⁴⁹Babilonia llactamandami tucui cai pachapi causajcunaca, huañushpa urmanajurca. Babilonia llactapi causajcunaca, israelcuna huañushcamandaca, chashnallatami huañushpa urmanajunga” ninmi.

⁵⁰Espadapi huañunamanda quishpirishcacunaca, ama shuyashpa, ucha calpaichiyari. Mandaj Diostaca, cangunapaj tucui causai punllapi yarishpa causanguichi. Jerusalendapash, chashnallata yaringuichi.

⁵¹Cangunaca, cashnami ninajunguichi: “Ñucanchitaca, nalicachishpa rimajta uyashpami, pingai tucurcanchi. Caru llactamanda runacuna shamushpami, Mandaj Diospajlla huasi ucucunaman yaicunajurca. Shinamandami, ninanda musparishpa maita ricuitapash na ushanajunchi” ninguichimi.

⁵²Chaimandami Mandaj Diosca, cashna nin: “Shamui punllacunapica, Babilonia llactapi causajcunapaj yanga dioscunatami tucuchisha. Tucui chai llactapimi, chugrichi tucushca runacunaca aij ninajunga.

⁵³Babilonia llactapi causajcuna jahua pachaman vichai rijpipash, chaipi jatun pircacunata rurajpipash, paicunata tucuchijcunataca cachanallatami cani” ninmi Mandaj Diosca.

⁵⁴¡Caldeocuna causanajuj Babilonia llactapica, jatun llaquihuan ninanda caparinajuj uyarichunlla!

⁵⁵Mandaj Diosmi, chai Babilonia llactataca tucuchinga. Chaipi causajcuna ninanda jariyashcataca anchuchingami. Paicunata fiñajcunaca, mama cucha yacushnami jataringa. Manllanayaita, ashtaca yacu huacanshnami caparinajunga.

⁵⁶Fiñashpa tucuchijcuna Babilonia llactaman shamujpimi, paipaj ninan shinlli soldadocunapash prezu japi tucunajurca. Paicunapaj arcopash faquirircami. Mandaj Diosca, imata cashpapash tigrachij Taita Dios cashpami, cuna cashcatallata cunga.

⁵⁷Tucuita Mandaj Dios shuti jatun Mandajca, cashnami nin: “Paicunata mandajcunata, ninanda yachajushcacunata, mandaj soldadocunata, charij runacunata, ninan shinllicunatapashmi machachisha. Chashna machachijpimi, causaita causaicaman na rijcharishpa puñushpa muscunajunga” ninmi.

⁵⁸Tucuita Mandaj Diosca, cashnatapashmi nin: “Babilonia pueblo muyundipi shayajuj jatun ancho pircapash, tucuillami t'unichi tucunga. Chai pircapi tiaj jatun pungucunapash, uchufallami quedanga. Gentecunaca, yangallatami trabajanajurca. Ninapi rupachunllami, shuj llactacunapi causajcunapash shaijujta trabajanajurca” ninmi.

⁵⁹Judá llactata jatun mandaj Sedequías shuti runahuan Babilonia llactaman rijujpimi, profeta Jeremiasca, Nerías shuti runapaj churi Seraías shuti runaman shuj villanata mingashpa cacharca. Sedequías shuti runaca, ñami chuscu huatata mandajurca. Sedequías runa puñuna pushtutaca, Seraías shuti runami ashtahuambacha alicachijurca.

⁶⁰Babilonia llactaman tucui ima llaquicuna shamunatami Jeremiasca, pillushca shuj carapi escribirca. Babilonia llactata llaquichinata villajuj tucui shimicunami, caipica tiajun.

⁶¹Chai jipaca Jeremiasca, Seraías shuti runataca cashnami nijurca: “Babilonia llactaman chayashpaca, tucui cai shimicunata ricushpa leyingui.

⁶²Ña leyijushpaca, cashna ningui: ‘Mandaj Dioslla, canmi cai Babilonia llactata fiñashpa chaipi causachunga, gentecunatapash, animalcunatapash na saquishpa tucuchisha nircangui. Ashtahuangarin causaita causaicamanmi, llaquinayaita tucuchi tucushca canga nircanguimi’ ningui.

⁶³Cai librota tucuilla ña leyishca jipaca, shuj rumita huatashpa, Eufrates yacu chaupiman shitangui.

⁶⁴Chaiman shitajushpaca, cashna ningui: ‘Cai Babilonia llactaca, chashnami huashajunga. Paipaj jahuapi ñuca cachamushca chai llaquimandaca, cutinga na jataringachu. Tucuillami chinganga’ ningui” nijurcami. Jeremías villashca shimicunaca, caicamanmi.