Read Imbabura Highland Quichua JEREMÍAS 52 Bible Online

JEREMÍAS 52 - Imbabura Highland Quichua bible

JEREMÍAS 52

¹Sedequías shuti runaca, ishcai chunga shuj huatata charishpami, mandai callarirca. Paica, chunga shuj huatatami, Jerusalenbi mandajurca. Paipaj mamaca, Libna shuti pueblomanda Jeremiaspaj ushi Hamutal shutimi carca.

²Sedequías runaca, Mandaj Diospaj ñaupajpica, Joacim shuti runashnallatami tucui nalitalla rurashpa causajurca.

³Shinamandami, Mandaj Diosca ninanda fiñarishpa, Jerusalenbi causajcunatapash, Judá llactapi causajcunatapash, paipaj ñaupajmanda llujchishpa cacharca. Chai jipaca Sedequías runaca, Babilonia llactata jatun mandajta na cazushpami jariyarca.

⁴Sedequías shuti runa ña iscun huatata mandajujpimi, cashna tucurca: Chai huatapaj chunga quilla, chunga punllapimi, Babilonia llactata jatun mandaj Nabucodonosor runaca, paipaj tucui soldadocunandi, Jerusalenda fiñashpa shamurca. Paicunaca, chai pueblo ladollapi carpacunata shayachishpami, chaipi causajcunahuan macanajungapaj, baluarte nishcacunata tucui ladopi shayachinajurca.

⁵Sedequías runa, Judá llactata chunga shuj huatata mandajungacamanmi, Jerusalén muyundipi chashna chapashpa causanajurca.

⁶Chai huatapaj chuscu quilla iscun punllapimi, Jerusalenbica jatun yarjai tiarca. Chaipi causajcunapaca, ima micunapash na tiarcachu.

⁷Shinamandami, pueblo muyundi jatun pircapica, shuj utujuta ruranajurca. Chai utujuta llujshishpami, tucui soldadocuna pacajushpa calpanajurca. Chai pueblomandaca tuta llujshishpami, jatun mandajpaj huerta ladopi tiaj ishcai pirca chaupipi punguta llujshishpa calpanajurca. Caldeo soldadocuna muyundi chapanajujpillatami, Arabá shuti pambaman rina ñanda calpanajurca.

⁸Ashtahuangarin caldeo soldadocuna catishpami, jatun mandaj Sedequías runataca, Jericó shuti pambapi japinajurca. Paita japijpica, paipaj tucui soldadocunaca jichushpami rirca.

⁹Shinamandami jatun mandajtaca, Hamat shuti llactapi tiaj Ribla shuti puebloman, Babilonia llactata jatun mandajpajman apanajurca. Chaipimi paitaca, imashna llaquichijuchumbash mandarca.

¹⁰Babilonia llactata jatun mandajca, Sedequías runapaj churicunataca, pai ricujujpillatami cungata muchurca. Judá llactata mandajcunatapash, Ribla shuti pueblopimi, tucuillacunata cungata muchurca.

¹¹Ashtahuangarin Babilonia llactata jatun mandajca, Sedequías runataca ñavita surcuchishpami, cadenacunahuan huatashpa, Babiloniaman prezu aparca. Chai llactapimi, huañuna punlla chayangacaman, prezuna huasipi churarca.

¹²Jatun mandaj Nabucodonosor runaca, Babilonia llactataca, chunga iscun huatatami ña mandajurca. Chai huatapaj picha quilla chunga punllapimi, Babilonia llactata jatun mandajta cuidaj soldadocunata mandaj Nabuzaradán shuti runaca, Jerusalenman shamurca. Paica, chai jatun mandajpaj ñaupajpimi causan carca.

¹³Pai shamushpaca, Mandaj Diospaj huasitapash, jatun mandajpaj huasitapash, Jerusalenbi tiaj tucui caishuj huasicunatapashmi tucuillata rupachirca. Jatun huasicunataca, chashnami tucuillata ninahuan rupachishpa tucuchirca.

¹⁴Tucui caldeo soldadocunaca, cuidaj soldadocunata mandaj soldadohuan shamushpami, Jerusalén muyundi jatun pircacunataca tucuilla urmachinajurca.

¹⁵Soldadocunata mandaj Nabuzaradán shuti runaca, Jerusalenbi causanajuj imagutapash na charijcunatapash, chai pueblomanda na llujshishca tucui gentecunatapashmi apachun mandarca. Babilonia llactata jatun mandajpaj maquiman paicunallata yaicugrijcunatapash, chai pueblopi puchushca ashtaca gentecunatapashmi, tucuillata apachun mandarca.

¹⁶Ashtahuangarin cuidaj soldadocunata mandaj Nabuzaradán shuti runaca, chai llactapi causanajuj imagutapash na charij puracunatallami, uvastapash, shuj granocunatapash tarpunajuchun saquirca.

¹⁷Caldeo soldadocunaca, Mandaj Diospaj huasi ñaupajpi shayanajuj, ishcai bronce pilarcunatapashmi faquinajurca. Shinallata broncetallata rurashca, mama cucha nishcatapash, uchilla tanquecunatapashmi faquinajurca. Shina faquishpami chaicunataca, Mandaj Diospaj huasimanda Babiloniaman tucuillata apanajurca.

¹⁸Diospajta rurangapaj imalla tiashcacunataca, jatun mangacunata, palacunata, rupashca pavizacunata anchuchinacunata, jatun tastacunata, cucharacunata, bronceta rurashca imalla charishcacunatapashmi apanajurca.

¹⁹Cuidaj soldadocunata mandajca, inciensota rupachinacunata, jatun tastacunata, copacunata, uchilla mangacunata, candelerocunata, uchilla platocunata, uchilla tastacunatapashmi apanajurca. Orota rurashcataca oro puralla, culquita rurashcataca culqui puralla tandachishpami aparca.

²⁰Ishcai pilarcunata, yacuta churana jatun tanqueta, mama cucha nishca ucupi shayanajuj chunga ishcai bronce huagracunataca, jatun mandaj Salomonmi, Mandaj Diospaj huasipi broncemanda rurachishca carca. Tucui chai broncecuna mashna pezashcatapash, na yachai ushanallami carca.

²¹Jatun pilarcunaca, ishcandillatami pusaj metro, chunga centimetrota charirca. Chaipica, racuta caupushca picha metro, chuscu chunga centimetrota charij puchahuan caupushcami carca. Chai pilar bronceca, canchis centímetro racumi carca. Chai ucuca, utuju chushajmi carca.

²²Chai pilar jahuacunapi umatashna churashca capitel nishca ishcai jatun bolacunaca, ishcai metro yali altomi carca. Chaicunapash, tucuilla bronceta rurashcallami carca. Chai uma muyundipica, linllihuan pilluchishpami, granadillas nishcacunata rurashpa, muyundipi huarcushca carca. Chaishuj pilarpash, chashnallatami granadillas muyucunata huarcushca carca.

²³Cada jilapimi, iscun chunga sucta granadillas nishcacunata linllipi huarcushca carca. Shinallata tucuilla uma muyundipica, patsaj granadillastami churashca carca.

²⁴Cuidaj soldadocunata mandajca, curacunata mandaj Seraías shuti curatapash, paipaj jipa tucui imapipash ricuj Sofonías shuti curatapash, Diospaj huasi patiopi cuidaj quimsa soldadocunatapashmi japirca.

²⁵Shinallata Jerusalenbi causaj puracunamandaca, soldadocunata mandajtapash, jatun mandajman ali yuyaita cuj, chai pueblopi causaj canchis ali cumba rucucunatapash, macanajuita yachachingapaj tandachishpa shuticunata escribijtapashmi japirca. Chai llactamanda soldadocunataca, paimi macanajuipaj alichirishca cachun ricushpa yalin carca. Jerusalenbillata causaj sucta chunga runacunatapashmi japirca.

²⁶Cuidaj soldadocunata mandaj Nabuzaradán shuti runaca paicunata japishpami, Babilonia llactata jatun mandajpajman, Ribla shuti puebloman aparca.

²⁷Hamat shuti llactapi tiaj Ribla shuti pueblopimi, Babilonia llactata jatun mandajca chugrichishpa huañuchirca. Chashnami, Judá llactapi causajcunaca, paicunapaj llactamanda prezu apai tucunajurca.

²⁸Nabucodonosor runaca, Judá llactamandaca, tucui caicunatami prezu aparca: Pai mandajui canchis huatapica, quimsa huaranga ishcai chunga quimsa runacunatami aparca.

²⁹Nabucodonosor runallatami, pai mandajui chunga pusaj huatapica, pusaj patsaj quimsa chunga ishcai Jerusalenmanda runacunata prezu aparca.

³⁰Nabucodonosor runa mandajui ishcai chunga quimsa huatapica, cuidaj soldadocunata mandaj Nabuzaradán shuti runami, Judá llactamanda runacunamandaca, canchis patsaj chuscu chunga picha runacunatami prezu aparca. Tucuimandaca, chuscu huaranga sucta patsaj runacunatami prezu aparca.

³¹Judá llactata jatun mandaj Joaquín shuti runaca, quimsa chunga canchis huatata Babilonia llactapi prezu causajujpimi, cashna tucurca: Chai huatapimi, Evil-merodac shuti jatun mandajca, Babilonia llactata mandai callarirca. Pai mandai callarishpaca, chai huatapaj chunga ishcai quillapaj ishcai chunga picha punllapimi, Judá llactata jatun mandaj Joaquín shuti runataca, prezuna huasimanda llujchirca. Chaimanda llujchishpaca, alicachi tucunapimi cutin churarca.

³²Paihuanga, ali cumba tucushpami, alitalla parlanajun carca. Shinallata Babilonia llactaman, shuj llactacunamanda apashca tucui jatun mandajcunata yali alipimi churarca.

³³Prezu churai tucushca tiajushpa churajushca churajunata llujchishpa, shuj churajunata churajuchumbashmi mandarca. Joaquín shuti runaca, paipaj tucui causai punllacunapimi, jatun mandajpaj mezapi punllandi micushpa causajurca.

³⁴Shinallata Babilonia llactata jatun mandajca, Joaquín shuti runapaj tucui causaipimi, imata cashpapash punllandi carashpa aliguta charirca. Joaquín shuti runa huañungacamanmi, chashna charirca.