Read Imbabura Highland Quichua JEREMÍAS 6 Bible Online

JEREMÍAS 6 - Imbabura Highland Quichua bible

JEREMÍAS 6

¹Benjaminbaj miraicunalla, Jerusalenmanda llujshishpa calpaichiyari. Jahua lado llactamandaca, cangunata tucuchij jatun llaquica ñami shamujun. Tecoa shuti pueblopica, bocinatami huacachina canguichi. Bet-haquerem shuti pueblo ladopica, cushnichishpami ricuchina canguichi.

²Ñucami, Sion shuti urcupi tiaj juyailla ricunayai pueblotaca tucuchigrini.

³Paita llaquichingapajmi michijcunaca, paicunapaj llamacunandi shamunajunga. Paicunaca, paicunapaj muyundipi carpacunata shayachishpami tianajunga. Paicunaca, maipi tiarishcapimi tucuicuna michinajunga.

⁴Paicunaca cashnami ninajunga: “Chai pueblopi causajcunahuan jatun macanajui tianata villaichiyari. Jatarishpa, chai puebloman chaupi punlla yaicushunchi. ¡Aij ñucanchilla! Ñamari punlla tucurimugrin, ñamari chishashpa tutayamushca.

⁵Mandana huasicunataca, tuta jatarishpa yaicushpa tucuchishunchilla” ninajungami.

⁶Tucuita Mandaj Diosca, cashnami nirca: “Quirucunata cuchushpa, Jerusalén muyundipi torrecunata shayachishpa macanajuichi. Tucui cai pueblo ucupica, yapa nalitalla rurana jundami. Chaimandami paicunaca, ninandapacha llaquichi tucunata charin.

⁷Imashnami pugyu yacuca na tucurin, chashnallatami chai pueblopi causajcunapash, jatun nalita ruranataca, ima horapash na tucuchin. Chaipica, shujcunata llaquichishpa, shuhuashpa causanajuillami uyarin. Punllandimi ñuca ñaupajpica ung:uicunapash, chugrichi tucunapash tian.

⁸Jerusalenbi causajcunalla, cangunamanda ñuca shungu ama anchurichunga, nalita ruranata saquishpa, ali tucuichiyari. Canguna causanajuj cai llactapash, ama jichushca pambashna, pipash na causajuj llacta tucuchunmi, ali tucuna canguichi” nircami.

⁹Tucuita Mandaj Diosca, cashnatapashmi nirca: “Huaquinlla puchushca israelcunataca, uvasta tandachishca jipa, pallajunshnami cutin mascanajunga. Malquicunapi uvasta pallajunshna, cambaj maquihuan pallayari” nijpimi, ñucaca cashna nircani:

¹⁰“Caita uyachunga, ¿pitata shinlli tacurishpa rimashayari? Ricui, cai gentecunaca, circuncisión nishcata na rurashcacunashna rinri vicharishcashna cashpa, na uyanga. Ricui, can Mandaj Diospaj Shimica, paicunapaca imapash pinganayai shimicunashnami. Chai shimicunataca, paicunaca na juyanllu” nircanimi.

¹¹Shina nijpimi, cashnata nihuarca: “Chashna na cazushcamandami, Mandaj Dios ñucaca, ninandapacha fiñarishca cani. Chaita ricushpa, casilla saquijushpapash, ña shaijunimi. Cunanga, ñangunapi purinajuj huahuacunapaj jahuapipash, chairalla viñaicuna tandanajushcapaj jahuapipash, ninan llaquitami talimusha. Cusatapash, huarmitapash, rucugutapash, ashtahuan rucutapash, chashnallatami rurasha.

¹²Paicunapaj huasicunatapash, ñuca carashca alpacunatapash, huarmicunatapash, shujcunami quichushpa japinajunga. Ñucami, cai llactapi causajcunataca, ñuca maquita chutashpa llaquichisha. Mandaj Dios ñucallatami, chashna nini.

¹³Paicuna purapica, ashtahuan uchillamanda callarishpa, ashtahuan jatungamanmi, charijyanatalla tucuicuna munanajun. Villaj runamanda callarishpa, curacunacaman tucuicuna umachijcunallami.

¹⁴Ñuca agllashcacuna chugrishcataca, yangalla ali parlocunahuanmi: ‘Casilla ali causaimi tian, casilla ali causaimi tian’ nishpa, nanaita jambinajun. Ashtahuangarin casilla ali causaica, na tianllu.

¹⁵¿Millanayaita rurashcamandaca pinganayachinajunllu? Paicunaca, napacha pinganayachinllu. Imashna pinganayachinatapash, na yachanllu. Shinamandami ñuca llaquichijpica, llaquipi urmaj puracunandi paicunapash urmanajunga” ninmi Mandaj Diosca.

¹⁶Mandaj Diosca, cashnatapashmi nirca: “Ñangunapi shayarishpa, cangunallata ali ricuichiyari. Punda ñangunata tapushpa, maijan ali ñan cajpipash, chai ñanda purichiyari. Chai ñanda purishpaca, cangunapaj alma samanatami taringuichi” nircami. Ashtahuangarin cangunaca: “Punda ñandaca, napacha purishunllu” nircanguichimi.

¹⁷Shinallata: “Trompetata huacachijtapash uyanguichi” nishpami, cuidashpa chapajcunatapash churarcani. Chashna nijpipash: “Na uyashunllu” nircami.

¹⁸Shina cashcamanda cai llactapi causajcuna, uyaichi: “Tandanajushca gentecunapash ima tucunata uyashpa, yuyaita japichiyari.

¹⁹Cai pachapi causajcunapash, uyaichi: Ricuichi, ñucaca ninan llaquitami cai gentecunaman apamugrini. Paicunallata, nalita yarinajushcamandami, chashna llaquichigrini. Ñuca rimashcata na uyashpa, ñuca mandashca shimitapash millanayachishcamandami, chashna llaquichigrini.

²⁰¿Imapajta Sabá shuti llactamanda inciensota cushpa, ñucaman cushnichinguichi? Caru llactamanda apamushca mishquillagu ashnajuj, juyailla virutapash, ¿imapajta cuhuanguichi? Cangunapaj animalcunata cushpa tucuillata rupachishcatapash na chasquinichu. Animalcunata carashpa huañuchishcatapash na munanichu” ninmi.

²¹Shinamandami Mandaj Diosca, cashnatapash nin: “Ricuichi, ñucaca cai gentecunaman nitijanatami churagrini. Chaicunapi nitijashpami taitacunapash, churicunapash urmanajunga. Ladolla causajpash, paipaj cumbapashmi huañunga” ninmi.

²²Mandaj Diosca, cashnatapashmi nirca: “Ricuichi, jahua lado llactamanda gentecunami shamugrin. Cai pacha tucuri manñacunamandapash, ashtaca gentecunami shamugrin.

²³Chai gentecunaca arcotapash, lanzatapash aisashcami shamunajunga. Paicunaca, llaquitapash na llaquij, pitapash na llaquijcunami. Paicuna shamushpaca, mama cucha yacu manllanayaita jatarinshnami uyarimunga. Sion pueblopi causajcunalla, paicunaca cangunahuan macanajungapajmi, caballocunapi tiarishpa, alichirishca shamunajunga” nircami.

²⁴Chai runacunata uyashpami, ñucanchi maquipash chujchushpa huarcurirca. Ñucanchitaca, ninan llaquimi japirca. Huahuata ungugrijuj huarmitashnami, jatun nanai japirca.

²⁵Pambamambash ama llujshinguichu, ñandapash ama puringuichu. Fiñajcunaca, espadahuan maipipash chapariashpami manllachinajun.

²⁶Ñuca llactapi causajcunalla, cañamuta huatarishpa, uchufapi sirichiyari. Shujlla churi huañushcapishna, yanata churajushpa, ninanda caparishpa huacaichiyari. Ñucanchita tucuchij runaca, ñallami shamunga.

²⁷“Candaca, ñuca agllashcacuna pacajuna pircashcashna cachumbash, torreshna cachumbashmi churarcani. Paicuna imashna cajtaca, canllatami yachangui. Imashna causajtaca, callarishpami ricungui.

²⁸Tucuicunallata ñucata na cazujcuna, huashalla parlashpa purijcunami. Tucuicunallatami bronceshnalla, jirrushnalla tucushca. Tucui paicunaca, jatun nalita rurashpa, shujcunatapash llaquipi churajcunami.

²⁹Nina yapata rupashcamandami, ninata fucuchinapash rupashca. Plomo nishca jirrupash, tucuillami yacuyashca. Culquimanda plomo jirruta tucuilla anchuchingapaj rupachij runaca, yangallatami chashna rurarca. Yacuyajta rupachijujpipash, chai mapaca napacha anchurircachu.

³⁰Caicunataca, Mandaj Dios na munashpami jichushpa saquirca. Shinamandami: ‘Caica, shitashca culquimi’ ninajunga” nijurcami.