Read Imbabura Highland Quichua JEREMÍAS 7 Bible Online

JEREMÍAS 7 - Imbabura Highland Quichua bible

JEREMÍAS 7

¹Mandaj Diosca, cai shimicunatami Jeremiasman cashna nishpa villajurca:

²“Mandaj Dios ñucapaj huasi pungupi shayarishpa, cai shimicunata cashna nishpa villagri: Tucui Judá llactapi causajcuna, cai punguta yaicushpa, Mandaj Diosta ninanda alicachijcuna cunanga, Mandaj Diospaj Shimita uyaichi.

³Tucuita Mandaj, israelcunapaj Taita Diosca, cashnami nin: ‘Cangunapaj causaita alichishpa, alita ruraichiyari. Shina rurajpica cangunataca, cai llactapi causanajuchunmi saquisha.

⁴Caica, Mandaj Diospaj huasimi. Caica, Mandaj Diospaj huasimi. Caica, Mandaj Diospaj huasimi nishpa llullashpa villashcataca, na yariashpa causanachu canguichi.

⁵Ashtahuangarin cangunapaj causaita alichishpa, alita ruraichi. Canguna purapica, shuj runacunamambash, na llullashpa, imatapash cashcatapacha ruraichi.

⁶Shuj llactamanda shamushca runatapash, taita mama illaj huahuatapash, sapalla mamagutapash, na ninanda llaquichishpa charinachu canguichi. Cai llactapica, napash ima nalita ruraj runapaj yahuartaca, na jichanachu canguichi. Shuj dioscunatapash, na catinachu canguichi. Chaicunata rurashpaca, cangunapaj llaquipajllatami canga.

⁷Chaicunata na rurajpica, cangunapaj ñaupa taitacunaman causaita causaicaman carashca cai llactapimi causanajuchun saquisha.

⁸Ricuichi, cangunaca imapajpash na ali llulla shimicunatarami yariashpa causanajunguichi.

⁹Shinamandami shuhuashpa, huañuchishpa, cazarashca jahua shujcunahuan causashpa, llullata juramentushpa causanguichi. Baal shuti diosman inciensota carashpa cushnichishpami, canguna na rijsishca, shuj dioscunata catinajunguichi.

¹⁰¿Chashna rurashca jahuachu, ñuca shutipi mañanajuj cai huasiman shamushpa: Ashtahuan millanayaicunata rurashpa catingapaj, ima llaquimandapash llujchishcami canchi ninajunguichi?

¹¹¿Ñuca shutipi mañanajuj cai huasica, canguna ricuipica, shuhuacuna pacajuna utujuchu imata? Ricuichi, canguna imata ruranajujtaca, ñucapash ricujunimi. Mandaj Dios ñucallatami, chashna nini.

¹²Cunanga, Silo shuti puebloman ñuca causajushca pushtuman richi. Callaripica, chaipi ñuca shuti causajuchunmi saquircani. Chaipica, ñuca agllashca israelcuna nalita rurashcamanda, paicunata chaipi imatalla rurashcata ricuichiyari.

¹³Cunanga, cangunapash cai tucui nalitami rurashpa causanajunguichi. Shina cajpipash ñucaca, punda huatacunamandapachami cangunataca, na shaijushpa rimajurcani. Ashtahuangarin cangunaca, napacha uyashpami causarcanguichi. Cayajpipash na tigrachishpami causarcanguichi’ ninmi Mandaj Diosca nishpa villagri” nijurcami.

¹⁴“Chashna rurashcamandaca, ñuca shutipi mañana cai huasitapash, Silo shuti pueblotashnami ruragrini. Cangunamambash, cangunapaj ñaupa taitacunamambash carashcata yariashpa, canguna causashca cai huasitaca urmachishapachami.

¹⁵Imashnami cangunapaj huauqui Efrainbaj miraicunataca, tucuicunata ñuca ñaupajmanda llujchishpa cacharcani, chashnallatami cangunatapash ñuca ñaupajmanda llujchishpa cachasha” ninmi.

¹⁶“Canga, cai gentecunamandaca ama mañahuaichu. Paicunamandaca, ama caparishpa ñucataca mañaichu, ama cutin cutin mañahuaichu. Paicunamanda mañashcataca, napacha uyashachu.

¹⁷Judá llactapi tiaj pueblocunapi, Jerusalén ñangunapi ima nalicunata paicuna ruranajujtaca, ¿nachu ricungui?

¹⁸Huahuacunaca yamdatami tandachinajun. Taitacunaca ninatami japichinajun. Huarmicunaca, jahua pachata jatun mandaj nishca huarmi diosman carangapaj, shuj dioscunaman carangapajmi, jacuta masashpa mishqui tandata ruranajun. Chashna rurashpami, ñucataca ninandapacha fiñachinajun.

¹⁹Paicuna ñucata fiñachishpaca, ¿nachu paicunallata pandachi tucungapaj, chashna ruranajun?” ninmi Mandaj Diosca.

²⁰Shinamandami Mandaj jatun Diosca, cashnatapash nirca: “Ricuichi cunanga, ninandapacha fiñarishpami, cai llactapica ninan llaquita talinshna cachamugrini. Runacunapaj jahuapi, animalcunapaj jahuapi, pambapi shayanajuj quiru jahuacunapi, pambapi fucushca grano jahuacunapimi, na huañushpa rupajuj ninata cachamugrini” nircami.

²¹Tucuita Mandaj, israelcunapaj Taita Diosca, cashnami nirca: “Cangunaca, animalcunata cushpa huañuchishca jahuapash, ashtahuan mirachishpa cushpa, tucuillata rupachinajuichilla. Chai aichacunatapash micunajuichilla.

²²Ñucaca, cangunapaj ñaupa taitacunata Egipto llactamanda llujchimujui punllapica: ‘Animalcunata ñucaman cushpa huañuchinguichi, tucuillata rupachinguichi’ nishpaca, pitallapash na mandashcanichu.

²³Ashtahuangarin caitami, cashna nishpa mandarcani: ‘Cangunaca, ñuca ima nishcata cazunguichi. Canguna cazujpica, cangunapaj Taita Diosmi casha. Cangunapash, ñuca agllashcacunami canguichi. Ñuca imata mandashcata tucuita rurashpaca, tucuipimi ali causanguichi’ nircanimi.

²⁴Shina mandajpipash napacha rinrita mañachishpa uyanajurcachu. Ashtahuangarin paicunaca shinlli shungu tucushpami, nalitalla yarishpa paicuna munashcata ruranajurca. Chashna cashpami ñaupajman ringapaj randica, huashamanra rinshna rinajurca.

²⁵Cangunapaj ñaupa taitacunata Egipto llactamanda llujchimushca punllamandapacha cunangamanmi, ñucata servij ñuca ima nishcata tucui villajcunata huashan huashan cachamushpa, na shaijushpa villachijurcani.

²⁶Ashtahuangarin napacha rinrita mañachishpa uyanajurcachu. Ashtahuan shinlliyashpami, paicunapaj taitacunatapash yali nalita ruranajurca.

²⁷Can tucui cai shimicunata cunan villajujpipash, na uyanayachingachu. Cayajpipash na tigrachingachu.

²⁸Chashna cashcamandaca, cashna ningui: ‘Cai llactapi causajcunaca, paicunata Mandaj Taita Diostaca, na cazunajurcachu. Ali tucuchun rimashpa yachachishcatapash, na chasquinajurcachu. Paicunapaj shimimandaca, na llullaj shimicunaca, tucuillami chingarca’ ningui” nijurcami.

²⁹Jerusalenbi causajcuna, Mandaj Diosca cangunataca, paita na ricunayachij miraicuna cajpimi, ninanda fiñashpa jichurca. Shina cashcamanda cambaj uma ajchata rutushpa, pambapi shitai. Lomacunaman vichai rishpa, caparishpa huacai.

³⁰Mandaj Diosca, cashnami nin: “Judá llactapi causajcunaca, ñucapaj ñaupajpimi nalita ruranajun. Ñuca shutipi mañana huasitaca, millanayai dioscunata chai ucupi churashpami mapayachinajun.

³¹Hinom shuti runapaj churipaj pugru pambapi tiaj, Tofet shuti huaicupipash, altarcunata rurashpami, paicunapaj churicunata, ushicunata rupachinajun. Chaitaca napacha mandarcanichu. Chaita ruranataca, yaitapash ñuca shungupica na yarcanichu.

³²Shinamandami Mandaj Dios ñucallata, cashna nini: Ricuichi, ninan llaqui punllacunami chayamugrin. Chai punllacunapica, chai pambaca na ashtahuan Tofet ni tucungachu. Hinom shuti runapaj churipaj pugru pamba ni tucushcapash, na cangachu. Ashtahuangarin Huañuchina Pamba ni tucungami. Huañushcacunatapash, maipi pambana illajpimi, chai Tofet shuti pushtupillata pambanajunga.

³³Cai huañushca gentecunapaj cuerpotaca, jahuata rij alasyu animalcuna, sachapi causaj animalcunami micunajunga. Chai animalcunata manllachijca, pillapash na tiangachu.

³⁴Shinamandami, Judá llactapi tiaj pueblocunamandapash, Jerusalén ñangunamandapash asishpa cushijuihuan candanataca tucuchisha. Shinallata cusayu, huarmiyu tucushca punllapi candanatapashmi tucuchisha. Tucui llactatami, llaquinayaita tucuchisha” ninmi.