Read Imbabura Highland Quichua JEREMÍAS 8 Bible Online

JEREMÍAS 8 - Imbabura Highland Quichua bible

JEREMÍAS 8

¹Mandaj Diosca, cashnatapashmi nin: “Chai punllacunapica, Judá llactata jatun mandajcunapaj tullucunata, caishuj mandajcunapaj tullucunata, curacunapaj tullucunata, villajcunapaj tullucunata, Jerusalenbi causajcuna huañushcapaj tullucunatapashmi, pambashca utujucunamanda llujchinajunga.

²Chai tullucunataca indiman, lunaman, jahua pachapi tiaj tucui luzerocunamanmi, tsirapashpa shitanajunga. Paicuna causashpaca, chaicunatami juyashpa, servishpa catinajurca. Chaicunatami, cungurishpa imatapash tapunajurca. Tullucunataca, pipash na tandachishpa pambanajungachu. Ashtahuangarin mapa huanushnami, alpa jahuapi siringa.

³Chai nalita ruraj miraicunamanda puchushcacunataca, caita chaitami cachasha. Paicunaca, maipi cashpapash causanata munangapaj randica, huañungapajmi munanajunga” ninmi tucuita Mandaj Diosca.

⁴“Cashnatapash ningui: Mandaj Diosca, cashnami nin: ‘Maijambash urmashpaca, ¿nachu cutin jatarin? Ñanda chingachijpash, ¿nachu ñanda mascashpa cutin tigran?

⁵¿Imashpata Jerusalenbi causanajuj cai gentecunaca ñucataca, paicunapaj tucui causaipi napacha cazunajun? Umachishpalla causanata ugllanshna juyashpami, ñucapajman tigrangapaca na munan.

⁶Ñucaca, tucuitami ali uyajuni. Aliguta rimajca, pipash na tianllu. Nalita rurashcamanda llaquirijpash, shujllapash na tianllu. ¿Imatata rurajuniyari? nishpa tapurijllapash, na tianllu. Tucuicunami, paicunapaj ñandaca, caballopaj shimi huatashcata cacharijpi, macanajuiman calpashpa yaicunshna purinajun.

⁷Cig:ueña nishca animalpash, jahua pachata ricushpaca, ima quillapi shuj ladoman rinata yachanmi. Urpipash, grulla nishca animalpash, golondrinapash ima quillapi quiquin llactaman tigranataca yachanmi. Ashtahuangarin ñuca agllashca gentecunaca, Mandaj Dios ñuca aliguta ricushpa mandashcataca, na rijsishpami causanajun.

⁸Shina cashpapash, ¿imashpata cangunaca: Ñucanchica, alipacha yachajushcami canchi. Mandaj Dios mandashca shimitaca, ñucanchimi charinchi ninajunguichi? Chai mandashcacunataca, llullashpa escribijcunami llullaman tigrachishpa escribinajurca.

⁹Ricuichi, alipacha yachajushcacunapash ninanda pingai tucushpa manllarishpami, imatapash na yachajushcashna tucunajun. Mandaj Diospaj Shimita na ricunayachij gentecunacarin, ¿imatata ashtahuan ali yachajushca cangayari?

¹⁰Chaimandami paicunapaj huarmicunatapash, chagracunatapash cai llactata quichungapaj shamujcunaman cugrini. Paicunaca, ashtahuan uchillamanda callarishpa, ashtahuan jatungamanmi, imashnamambash charijyanatalla tucuicuna yarinajun. Villaj runamanda callarishpa curacunacamanmi tucuicuna umachinajun.

¹¹Ñuca agllashcacuna chugrishcataca, yangalla parlocunahuanmi: ‘Casilla ali causaimi tian, casilla ali causaimi tian’ nishpa, nanaita jambinajun. Ashtahuangarin, casilla ali causaica na tianllu.

¹²Millanayaita ruranajushcamandaca, ¿pingai tucunajunllu? Paicunaca, ashallatapash na pinganayachinllu. Paicunaca, imashna pingai tucunatapash na yacharcachu. Shinamandami ñuca llaquichijpica, caishuj urmaj puracunandi paicunapash urmanajunga’ ninmi ningui” nijurcami Mandaj Diosca.

¹³Mandaj Diosca, cashnatapashmi nin: “Ñucaca tucuillatami tucuchigrini. Uvas chagrapica, shuj uvasllapash na puchungachu. Jigos yurapipash, shuj granollapash na puchungachu, yuramanda fangacunapashmi chaquishpa urmanga. Imatalla ñuca carashcacunaca, shujcunapajmi tucunga” ninmi.

¹⁴Ñucanchica, ¿imapajta caipi tianajunchilla? Cunanga tandanajushpa, muyundi jatun pircacunahuan rurashca pueblocunaman yaicushpa huañushunchilla. Ñucanchita Mandaj Taita Diosca, ñucanchitaca huañuchi tucuchunllatami saquishca. Mandaj Diosta fiñashpa juchata rurashcamandami paica, jayajhuan chapushca yacuta ufiachishca.

¹⁵Casilla ali causaitami shuyanajujpipash, ima alipash na tiarcachu. Nanaimanda jambirina punllatami shuyanajurcanchi. Ricuichi, ashtahuangarin musparinallami tian.

¹⁶Fiñajcunapaj caballocuna fucushcapash, Dan pueblomandapachami uyarimurca. Chai caballocunaca, tucuilla llacta chujchujtami huacashpa calpamunajurca. Paicuna chayamushpaca, alpapi imalla ashtacapacha tiajtami tucuchirca. Pueblotapash, chaipi causajcunatapashmi tucuchirca.

¹⁷Mandaj Diosca, cashnami nin: “Ricuichi, cangunata llaquichijuchunga, ñucami huañuchij culebracunata cachamuni. Chaicunataca, imahuan muspayachitapash na usharinllu. Chaicunami, cangunataca canishpa tucuchinga” ninmi.

¹⁸Cai ninan shinlli nanaimandami, ñuca shungupipash huañugrijunshna tucujuni.

¹⁹Ricuichi, ñuca llactapi causajcuna aij nishpa, ninanda caparishcapash, caru llactamandapachami uyarimujun. “Mandaj Diosca, ¿nachu Sion shuti pueblopi imatayari? Sion pueblota jatun Mandajca, ¿nachu chaipi imatayari?” ninajunmi. Diosca: “¿Imashpata labrashpa rurashca, imamambash rijchaj dioscunahuan, yanga shuj dioscunahuan fiñachihuarca?” ninmi.

²⁰Granocunata cozechana rupai punllacunaca, ñami yalirca. Ashtahuangarin ñucanchitaca, nara quishpichishca.

²¹Ñuca llactapi causajcuna ninanda llaquichi tucunajujpimi, ñucapash jatun llaquihuan cani. Jatun llaqui, jatun manllai japijpimi, yana yana tutapi apai tucunajunshna cani.

²²Galaad shuti llactapica, ¿nachu bálsamo nishca aceite tian? ¿Nachu maijan jambijllapash tian? ¿Imamandata ñuca llactapi causajcunata jambingapaca, ima jambillapash na tian?