Read Imbabura Highland Quichua JEREMÍAS 9 Bible Online

JEREMÍAS 9 - Imbabura Highland Quichua bible

JEREMÍAS 9

¹¡Ñuca umaca, yacushna tucushpachari ali canman. Ñuca ñavimandapash, pugyu yacushna viqui llujshijushpachari ali canman. Shina cajpica, ñuca llactapi causajcuna huañushcamandaca, tutapash punllapash huacajuimanllami!

²¡Na cashpaca ñanda purijcuna, jichushca pambapi llandunatallapash ñucaman cushpachari ali canman! Ñuca llactapi causajcunata saquishpa rishpaca, paicunamanda caruyaimanmi. Paicunaca tucuicunami, cazarashca jahuapash shujcunahuan causanajun. Yachashpata na cazuj puralla tandanajushca gentecunami.

³Mandaj Diosca, cashnami nin: “Paicunapaj jalluhuanga, flechata arcohuan shitanshnami llullanajun. Chaimandami cai llactapica, shinlli canata, na llullashpa causanataca na usharca. Ashtahuangarin nalicuna tucushpami, ashtahuan ashtahuan ñucataca na rijsinajurca.

⁴Tucuicuna cuidarishpa, paipaj cumbahuanga ama cungashca purichun. Maijan cashpapash, ama huauquitalla yariashpa causachun. Tucui huauquicunallata, llullashpa umachinllami. Cumbacunapash tucuicunami yangata juchachishpa parlashpa purinajun.

⁵Tucuicunami, paicunapaj cumbatallata umachishpa, llullashpalla parlanajun. Paicunapaj jalluca, llullashpa parlanata yacharishca cashpami, jatun nalitalla ruranajun.

⁶Paicunaca, umachijcunapaj chaupipimi causanajun. Chashna yapata umachinajuj cashpami, ñucata rijsinataca na munarca” ninmi Mandaj Diosca.

⁷Chashnacuna cajpimi tucuita Mandaj Diosca, cashna nin: “Ricui, imashna cajta ricungapaca ninapi churashpami, tucuilla mapata anchuchigrini. Ñuca agllashcacunataca, ¿imatata ashtahuan rurasha?

⁸Paicunapaj jalluca, filo filota rurashca flechashnami. Shimihuanga, umachingapajllami cumba purapash, casilla aliguta causashun ninajun. Ashtahuangarin shungu ucupica, imashnamambash pacalla llaquichinatami yarinajun.

⁹Chashna ruranajushcamandaca, ¿nachu llaquichina cani? Chashna llactacunataca, ¿nachu ñucapash chashnallata tigrachina cani?” ninmi Mandaj Diosca.

¹⁰Cunanga chai llactacunataca, maijanllapash na yalijuj ricurinllu. Huagra huacajllapash, na uyarinllu. Sacha animalcunapash, jahuata rij alasyu animalcunapashmi, llaquinayaita pacajushpa maimambash rishca. Chaimandami urcucunamandapash huacagrisha, jichushca pambacunapi tiaj michina pambacunamandapashmi ninanda huacasha.

¹¹Jerusalendaca, tucuillata urmachishpa rumi mundundallami saquisha, chacal nishca animalcuna causanamanmi tigrachisha. Judá llacta pueblocunatapash, llaquinayaita tucuchishpami, shuj runallapash na causana puchunata saquisha.

¹²¿Imashpata cai llactapi ima tiashcacunapash, tucuilla llaquinayaita tucurirca? ¿Imashpata jichushca pambashna tucurca? Cunanga, maijan yalijpash, na ricurinllu. Tucui cai imashpa chashna tucushcata yachangapaca, ¿pita alipacha yachajushca canga? Mandaj Diosca, shujcunaman villachunga, ¿maijanmambash imatallapash villarcachu?

¹³Mandaj Diosca, cashnatapashmi nirca: “Ñucaca, paicunapaj maquipimi ñuca mandashca shimitaca curcani. Chaitaca napacha cazushpa saquishpami, chai mandashcapi nijunshnaca na catinajurca.

¹⁴Ashtahuangarin paicunapaj shungupi yanga yarishcatallami ruranajurca. Paicunapaj taitacuna yachachishcashnallatami, Baal shuti dioscunata catinajurca” nircami.

¹⁵Chaimandami cunanga, tucuita Mandaj, israelcunapaj Taita Diosca, cashna nin: “Ricuichi, cai gentecunamanga, ajenjotami micuchigrini. Shinallata jayajhuan chapushca yacutami ufiachigrini.

¹⁶Paicunapash, paicunapaj taitacunatapash na rijsishca llactacunamanmi, caita chaita cachagrini. Paicunataca catishpa, tucuchingacaman espadahuan huañuchinajuchunmi cachasha” ninmi.

¹⁷Tucuita Mandaj Diosca, cashnatapashmi nin: “Caita aliguta yarichi. Huacanata yachaj huarmicuna shamuchun cayaichi. Huacanata alipacha yachajcunata mascaichi” ninmi.

¹⁸Ñucanchimanda huacangapaj ucha jatarishpa shamuichi. Ñucanchi ñavimanda viquipash, yacushnami llujshinga. Ñucanchi ñavi milmamandapash, viquica yacushnami shutujunga.

¹⁹Sion shuti pueblomandaca cashna nishpami, yarishpa yarishpa huacanajuj uyarirca: “Ñucanchi alpacunata shitashpamari rigrinchi. Ñucanchi huasicunatapashmi urmachinajurca. ¡Llaquinayaitamari tucuchi tucurcanchi! Ninandapachami pingaichi tucushcanchi” nishcami uyarirca.

²⁰Huarmicunapash, Mandaj Diospaj Shimi imatalla nishcataca rinrita pascashpa, uyashpa chasquichiyari. Paipaj shimihuanmi cashna nin: “Cangunapaj ushicunatarami yarishpa yarishpa huacanataca, yachachina canguichi. Cangunapaj cumba huarmicunamambash, tucuicunallatami chashna llaquirishpa huacanata yachachina canguichi.

²¹‘Huañuica, ñucanchi ventanacunata vichai yaicumushpami, mandashpa tiajuna ñucanchi huasicunamambash yaicumushca. Shinallata ñangunapi purinajuj huahuacunatapash, plazacunapi purinajuj chaira viñaicunatapashmi tucuchishca’ ninmi ningui.

²²Cashnatapash ningui: Mandaj Diosca, cashnami nin: ‘Huañushcacunaca, pambapi huanuta shitashcashnami sirinajunga. Trigota cuchushpa, tandachinajujpi urmashpa puchushcashnami, pipash na tandachijpi sirinajunga’ ninmi ningui” nircami.

²³Mandaj Diosca, cashnami nin: “Alipacha yachajushca runapash, alipacha yachashcamandalla ama alicachirichun. Ninan shinlli runapash, ninan shinlli cashcamandalla ama alicachirichun. Charij runapash, charij cashcamandalla ama alicachirichun.

²⁴Ashtahuangarin maijan alicachiringapaj munashpaca, ñucata yarishcamanda, ñucata rijsishcamanda alicachirichun. Mandaj Dios ñucaca, cai pachapica llaquijpash, aliguta ricushpa mandajpash, imatapash cashcatapacha rurajpashmi cani. Ñucaca, chashna rurashpa causachunmi munani” ninmi Mandaj Diosca.

²⁵Mandaj Diosca, cashnatapashmi nin: “Ricuichi, circuncisión nishcata tucui rurashcacunatapash, chaita na rurashcacunatapash, ñuca llaquichina punllacunami chayamujun.

²⁶Egipto, Judá, Edom, Amón, Moab shuti llactacunapi causajcunata, shinallata jichushca pamba ashtahuan juchucunaman causajcunatapashmi, tucuicunata llaquichisha. Chai tucui llacta runacunaca, circuncisionda na rurashcacunami. Tucuilla israelcunacarin, circuncisionda na rurashcashnallatami, nali shunguhuan causanajun” ninmi.