Read Imbabura Highland Quichua LAMENTACIONES 1 Bible Online

LAMENTACIONES 1 - Imbabura Highland Quichua bible

LAMENTACIONES 1

¹¡Ashtacacuna causanajushca puebloca, llaquinayaitamari jichushca quedashca! Llacta puracunamanda ashtahuan jatun puebloca, sapalla huarmishnamari quedashca. Mandaj huarmishna llactacunata mandaj puebloca, impuestota cujmari tucushca.

²Tutapica, ninanda llaquirishpami huacan. Ñavimanda jicharijuj viquipash na chaquinllu. Paita tucui juyajcunamanda cushichijca, pipash na tianllu. Paipaj tucui cumbacunami, paita na llaquishpa fiñajcuna tucushca.

³Judá llactapi causajcunaca, shinlli ruranacunata rurashpa, llaquichi tucushca jahuami, prezu apai tucurca. Paicunaca, shuj llactacunapaj chaupipi causanajushpami, samanataca na tarirca. Paicunata llaquichingapaj tucui catijcunaca, quichijicunapimi japigrirca.

⁴Sion puebloman shamuna ñangunaca, jatun fiestacunaman pipash na shamujpimi, yanata churajushcashna quedashca. Puebloman yaicuna paicunapaj tucui pungucunapash, llaquinayaitami tucurishca. Paipaj curacunapash, aij nishpami huacanajun. Jarihuan nara tacarishca cuitsacunapash, ninandami llaquirinajun. Sion puebloca, jatun llaquitami charin.

⁵Paita fiñajcunarami, mandajcuna tucurca. Paita millanayachij runacunarami, tucuipi ali llujshirca. Paillata ninandapacha, na cazushcamandami Mandaj Diosca llaquichirca. Paipaj huahuacunapash, paicunata fiñajcunapaj ñaupajpimi, prezu rinajurca.

⁶Sion pueblopi causajcunapaca juyaillagu cashcapash, tucuillami chingarca. Paicunata mandajcunapash, jihuata na tarishpa purij tarugacunashnami rinajurca. Paicunata catiriashpa llaquichijcunapaj ñaupajpica, ushai illajmi purinajurca.

⁷Jerusalenbi causajcuna, paicunata fiñajcunapaj maquipi japi tucujpica, paicunata ayudangapaca, pipash na tiarcachu. Shinamandami, llaquita apanajushca punllacunatapash, paicunallata na cazushcatapash, ñaupa huatacunamandapacha tucui ima juyailla charishcacunatapash yarinajurca. Paicunata fiñajcunaca chaita ricushpami, paicuna urmashcamandaca asishpa ricunajurca.

⁸Jerusalenga, juchatami rurarca. Chaimandami, paica anchuchi tucurca. Paita tucui alicachijcunapash, paipaj pinganayai lluchullata ricushpami, yangapi churanajurca. Chaimandami jatunda llaquirishpa, huashaman tigrarca.

⁹Nalita rurashcamandami, paipaj churajunapash mapayarca. Pai tucurinataca, na yarircachu. Shinamandami, paica cungashcapi urmarca. Paita cushichingapaca, pipash na tianllu. Mandaj Dioslla, ñuca llaquilla cajtaca ricuhuayari. Ñucata fiñajcunaca, ninan jatungunami tucushca.

¹⁰Fiñajcunaca, paicunapaj maquihuanmi, tucui imata juyailla paicuna charishcacunatapash, quichushpa aparca. Paimi, shuj llactamanda runacuna Diospajlla huasiman yaicunajujtaca ricurca. Chai cambaj tandanajuimanmi, can Diosca pipash ama yaicuchun mandarcangui.

¹¹Jerusalenbi causajcunaca, tucuicunami micunata mascashpa, jatunda llaquirishpa purinajurca. Yarjaimanda ama huañungapaca, paicuna tucui imata juyailla charishcacunatami, micunamanda cunajurca. Mandaj Dioslla, ñuca ñavita urai cumuchi tucushcataca ricuhuayari.

¹²Ñanda maijanlla yalijcuna ñucata ricushpaca, ¿nachu llaquinayan? Ricuichi, ñucata cashna jatun llaquicuna japishcashnaca, maipipash japircachu imashi, ricupaichiyari. Mandaj Diosca, nina japirinshna ñapash fiñarishca punllapimi, cashna llaquichihuashca.

¹³Paica, jahuamandami ninata cachamurca. Chai ninami, ñucataca tullucunacaman tucuchijun. Ñuca purina ñambi linllita churashpami, huashaman tigrachihuarca. Ñucataca, llaquinayaita tucuchi tucushcatami, punllandi jatun nanaihuan cachun saquihuarca.

¹⁴Ñuca na cazushcacunahuanmi, yugotashna paipaj maquihuan huatahuashca. Chai huatashcacuna ñuca huashapi cajpimi, ushai illaj, irquilla cani. Jatun Diosmari, ñucataca shinlli runacunapaj maquipi saquihuashca. Chai runacunata fiñashpa shayaritaca, na ushashachu.

¹⁵Jatun Diosca, ñucapaj shinlli runacunataca, ñuca chaupipillatami sarushpa tucuchirca. Paica, ashtaca soldadocunata cayashpami, chairalla viñai ñuca huambracunataca tucuchirca. Judá llactapi causaj huarmicunataca, jarihuan nara tacarishca cuitsashna cajpipash, Jatun Diosllatami uvasta cutana pushtushna ñuturca.

¹⁶Chaimandami, ñuca ñavica huacan. Ñuca ñavimandaca, yacushnami viquica llujshijun. Ñucata cushichishpa, ñuca almata samachijca caruyarcamari. Ñuca huahuacunapash, fiñajcuna mishashpa huañuchijpimi tucurirca.

¹⁷Sion pueblopi causajcunaca, maquita chutanajujpipash, paicunata cushichijca pipash na tianllu. Jacobota fiñajcuna cachunga, paipaj ladopi causajcunatallatami, Mandaj Diosca mandarca. Jerusalenbi causajcunaca, paicuna purapillatami na ricunayachi tucunajurca.

¹⁸Mandaj Diosca, imatapash cashcatapachami ruran. Ñucami, pai mandashca shimicunata na cazurcani. Cunanga, tucui gentecuna, uyahuaichi. Ñuca llaquitaca ricuichiyari. Jarihuan nara tacarishca ñuca cuitsacunapash, ñuca huambracunapashmi, prezu apai tucurca.

¹⁹Ñucapaj juyashcacunatami caparijurcani. Ashtahuangarin paicunaca umachihuashcami. Ñuca curacunapash, ñucata mandaj rucucunapash, pueblopillatami huañurca. Yarjaimanda ama huañungapaj, micunata mascanajushpallatami huañunajurca.

²⁰Ricui Mandaj Dioslla, jatun llaquipimari cani. Canda ninandapacha na cazushcamandami, ñuca vijsa ucutapash rupajshna, ñuca shungutaca nanan. Canllapica, espadahuanmi tucuchinajurca. Ucupica, huañuimi mandashpa tucuchijurca.

²¹Aij nishpa huacajujta uyashpapash, ñucata cushichijca, pipash na tianllu. Ñucata tucui fiñajcunami, cashna llaquita apajujtaca uyarca. Can chashna rurashcamandami cushijunajun. Cachamusha nishca llaquichina punllataca, paicunamambash cachamupairi. Shina cachamujpimi, paicunapash ñucashnallata canga.

²²Paicuna tucui nalita rurashcapash, cambaj ñaupajman shamuchunlla. Tucuita ñuca na cazushcamanda, ñucata llaquichishcashnallata, paicunatapash llaquichipangui. Ñucaca, ninandapachami jatunda llaquirini. Shinamandami, ñuca shungutapash nanajun.