Read Imbabura Highland Quichua LAMENTACIONES 3 Bible Online

LAMENTACIONES 3 - Imbabura Highland Quichua bible

LAMENTACIONES 3

¹Ñucami, Dios fiñashpa astinshna llaquichijpi, llaquita ricushca runa cani.

²Ñucataca, yana yana tutapimi pushahuarca, michapica na pushahuarcachu.

³Ñucataca fiñashpapachami, cutin cutin tigrashpa, paipaj maquihuan cada punlla macahuarca.

⁴Shinami, ñuca cuerpotapash, ñuca caratapash rucuyachirca. Ñuca tullucunatapashmi faquirca.

⁵Ñuca muyundipipash, baluarte nishcacunata shayachijpimari, jatun llaquicunalla shinlli ruranacunalla muyuhuarca.

⁶Ña unai huatacunata huañushcacunatashnami, yana yanapi saquihuarca.

⁷Ñuca tucui muyundita jarcajpimari, llujshitapash na ushani. Ashtahuan llashachij cadenacunahuanmi huatahuarca.

⁸Ninanda caparishpa ñuca mañajujpipash, ñuca mañashcata ama uyangapaca, rinritami quilparirca.

⁹Ñuca rina ñangunatapash, labrashca rumicunahuan jarcashpami, quingu ñandara pushahuarca.

¹⁰Paica ososhnami chapariajuhuarca. León pacalla chaparianshnami carca.

¹¹Shuj ñanda pushashpami, asha asha ñutushpa, llaquinayaita tucuchirca.

¹²Paipaj arcota chutashpa cacharingapajmi, ñucataca flechata cacharina yuraj señaltashna churahuarca.

¹³Alichina carapi charijushca flechacunataca, ñuca vijsa ucucaman yalijtami shitarca.

¹⁴Ñuca llactapi causajcunapaca, na cazushpa asi tucuna, punllandi asishpa ricui tucunami carcani.

¹⁵Jatun llaquicunataca, ñucapi jundachishpami, jayaj ajenjohuan machachinshna saquihuarca.

¹⁶Cascajo rumicunahuanmi, ñuca quirucunaca faquirirca. Ñucataca, uchufahuanmi quilpahuarca.

¹⁷Ñuca almapash, casilla ali causaimandaca caruyashcami. Ima ali tiashcatapash, ña cungashcanimi.

¹⁸Chashna cashpami, ñucaca: “Ñuca ushaipash tucurircami. Mandaj Diosta shuyashpa causanapash tucurircami” yajurcani.

¹⁹Llaquita ñuca apajushcatapash, ñavita urai cumuchi tucushcatapash, ajenjota, jayaj hielta ufiachinshna llaquichishcatapash yaripairi.

²⁰Ñuca almapi ninan llaquita apajushcamandami, chaitaca yarijushalla.

²¹Caita ñuca shungupi yariajushpallami, ñucaca Diosta shuyashpa causasha.

²²Mandaj Dios llaquijpillami, na tucuchi tucushcanchi. Paica, ñucanchita llaquinataca, ima horaspash na saquishcachu.

²³Chai llaquinaca, cada tutamanda mushujmi. Can imata pactachinapash jatunmari.

²⁴Ñuca tucui almahuanmi: “Tucui imata ñuca charinapash, Mandaj Diosmari” nircani. Chaimandami, paitalla shuyasha.

²⁵Mandaj Diosca, paitalla shuyashpa, tucui almahuan paita mascajcunapaca alimari.

²⁶Mandaj Dios quishpichinata upalla shuyanaca aligumari.

²⁷Huambramandapacha yugota apanaca, pipajpash alimari.

²⁸Runaca, pailla upalla tiajuchunlla, Taita Diosllatami, chashna tucuchun churarca.

²⁹Quishpirinata shuyana tiaipajpash, ñutu alpapi shimihuan chayajta cumurichunlla.

³⁰Chugrichij runamambash, lado ñavita ricuchijuchunlla, ninanda pingaichi tucujuchunlla.

³¹Jatun Diosca, causaita causaicaman shitashpaca na saquinllu.

³²Llaquichishpapash, ashtahuangarin pai ninanda juyan cashcashnallatami llaquin.

³³Paica, huañuna aichayu runacunataca, na paipaj munai llaquichinllu.

³⁴Llactapi tucui prezu tianajujcunata sarushpa ñutuchun,

³⁵jahua pachapi causajuj Diospaj ñaupajpi, nalicunatara alipi churachun,

³⁶napash llaquichina runata llaquichijuchunga, napacha Jatun Diosca munanllu.

³⁷¿Pita: “Jatun Dios na mandajpillatami imapash tucurca” nitaca ushangayari?

³⁸¿Nachu jahua pachapi causajuj Diospaj shimihuan rimajpi, alipash, llaquipash shamun?

³⁹Causaj quedashca runaca, ¿imamandata huacan? Runaca, pai juchata rurashcamandami huacanata charin.

⁴⁰Ñucanchi imashna causanajushcata aliguta yarishunchi. Mascashpa, Mandaj Diospajman tigrarishunchi.

⁴¹Jahua pachapi tiajuj Taita Diostaca, ñucanchi shungutapash, maquitapash, vichai churashpa mañashunchi.

⁴²Ñucanchimari, candaca na cazuparcanchi. Ñucanchimari, canmandaca anchurircanchi. Chaimandamari ñucanchi juchataca, na cungarcangui.

⁴³Ninanda fiñarishpami, ñucanchitaca catiriashpa llaquichircangui. Na llaquishpami huañuchircangui.

⁴⁴Ñucanchi mañanajushca ama uyarichunga, fuyuhuanmi quilparircangui.

⁴⁵Ñucanchitaca, shuj gentecunapaj chaupipi nalicachishpa, rimai tucushpa, na ricunayachi tucushpa causachunmi saquircangui.

⁴⁶Ñucanchita tucui fiñajcunamari, nalicachishpa rimangapaj shimita pascanajurca.

⁴⁷Ñucanchitaca ninan manllaipash, lazui tucunapash, llaquinayaita tucuchi tucunapash, jatun llaquipashmi japirca.

⁴⁸Ñuca llactapi causajcuna ninan llaquita apanajushcamandami, ñuca ñavicunamandaca jatun yacushna, viquica jicharijun.

⁴⁹Ashatallapash cushijuica na tiajpimi, na upallayashpa huacajunilla.

⁵⁰Mandaj Dios jahua pachamanda ricungacamanmi huacajushalla.

⁵¹Ñuca pueblopi causanajuj tucui huarmicunamandami, ñuca ñavipash, ñuca almapash, shaijujta huacarcani.

⁵²Ñucata fiñajcunaca, yanga yangamandami alasyu animaltashna huañuchingapaj catiriahuarca.

⁵³Ñuca causaitaca, yacuta tandachingapaj rurashca jatun utujupi churashpami, rumihuan quilpanajuhuarca.

⁵⁴Yacupash ñuca umacaman quilpajpimi: “Cunanga huañunimi” yajurcani.

⁵⁵Mandaj Dioslla, prezuna utuju ucumandapachami, cambaj shutipi mañarcani.

⁵⁶Ñuca mañashcataca uyaparcanguimi. Jatunda llaquirishpa ñuca caparijujta, ama uyangapaca cambaj rinrita ama quilparipaichu.

⁵⁷Canda ñuca mañajui punllapi, ñucapajman quimirimushpami: “Ama manllaichu” nihuarcangui.

⁵⁸Jatun Dioslla, ñuca alma llaquipi cajpica, canmari shayarircangui. Canmari, ñuca causaitaca quishpichircangui.

⁵⁹Mandaj Dioslla, ñuca llaquitaca canllata ricushcanguimi, ñucataca mitsahuayari.

⁶⁰Ñucata ninanda llaquichinajujtapash, ñucata fiñashpa imatalla yarinajujtapash, tucuitami ricuparcangui.

⁶¹Mandaj Dioslla, ñucata nalicachishpa rimanajujtapash, ñucata fiñashpa tucui nalita yarinajujtapash uyarcanguimi.

⁶²Paicuna ñucata fiñashpa parlanajujtapash, ñucata llaquichingapaj punllandi yarinajujtapash uyarcanguimi.

⁶³Paicuna tiarijta, jatarijtapash ricupairi. Ñucataca, nalicachishpami candanajun.

⁶⁴Mandaj Dioslla, paicunapaj maquihuan rurashcashnallata, paicuna japinataca cupairi.

⁶⁵Paicunapaj shungu shinlliyachumbash saquipailla. Can ninanda nalicachinaca, paicunapaj jahuapillata urmachun.

⁶⁶Mandaj Dioslla, ñapash fiñarishpa catiriashpa, cai pachamanda anchuchipairi.