Read Imbabura Highland Quichua LAMENTACIONES 5 Bible Online

LAMENTACIONES 5 - Imbabura Highland Quichua bible

LAMENTACIONES 5

¹Mandaj Dioslla, ñucanchi llaquichi tucushcataca yaripairi. Ñucanchita nalicachishpa rimanajujtaca ricupairi.

²Ñucanchi alpacunaca, na rijsishca gentecunapajmanmi yalishca. Ñucanchi huasicunapash, shuj llactamanda shamushca gentecunapajmanmi yalishca.

³Taita illaj, jichushca huahuacunamari canchi. Ñucanchi mamacunapash, sapalla huarmicunashnami.

⁴Ñucanchi yacutallatami, culquipaj ufianchi. Ñucanchi yamdatallatami randinchi.

⁵Ñucanchitaca catiriashpami, ninanda llaquichinajun. Samanatapash na charishpami, shaijushpalla causanajunchi.

⁶Micushpa vijsa pactangapajpash, Egipto llactamanda, Asiria llactamanda gentecunatami, maquita vichai churashpa mañanajunchi.

⁷Juchata ruraj ñucanchi taitacunaca, ñamari huañushca. Paicunamandaca, ñucanchimari llaquita apanajunchi.

⁸Servijcunarami ñucanchitaca mandanajurca. Paicunapaj maquimanda cacharichijca, pipash na tiarcachu.

⁹Ñucanchi micunataca, jichushca pambapi espadahuan huañuchi tucunalla cashpapashmi, apamun carcanchi.

¹⁰Ñucanchi aicha carapash, yarjaimanda rupajunshna tucushpami, jornoshna yanayarca.

¹¹Sion pueblopi causaj huarmicunata, Judá llactapi tiaj pueblocunapi causaj, jarihuan nara tacarishca cuitsacunataca, munai na munaimi llaquichinajurca.

¹²Mandajcunataca, maquipi huatashpami huarcunajurca. Rucu taitacunatapash na cazushpami, ñavi ñavi rimanajurca.

¹³Chairalla viñaicunataca, cutachunmi apanajurca. Huambracunapash yamdata apachijpimi, shaijushpa ña huañungashna tucunajurca.

¹⁴Pueblo pungucunapica mandaj rucucunapash, ña na ricurinllu. Chairalla viñaicunapash, paicuna candanajushcataca saquircami.

¹⁵Ñucanchi shungupi cushijunaca tucurircami. Ñucanchi danzanaca, ninan llaquimanmi tigrarca.

¹⁶Ñucanchi umamanda coronapashmi urmarca. ¡Cunanga, aij ñucanchilla! Juchata rurashcamandami, cashna llaquipi canchi.

¹⁷Chaimandami ñucanchi shungupica, llaquilla causanajunchi. Chaimandami ñucanchi ñavicunaca, amsayashcashna causanajunchi.

¹⁸Sion urcuta llaquinayaita tucuchishcamandami, chashna causanajunchi. Añascunallami chaitaca purinajun.

¹⁹Mandaj Dioslla, ashtahuangarin canga, causaita causaicamanmi causajungui. Can mandashpa tiajunaca, mirai miraicamanmi canga.

²⁰¿Imamandata ñucanchitaca, cungaitapacha cungarcangui? ¿Imamandata cai tucui huatacunata jichushpa saquingui?

²¹Mandaj Dioslla, ñucanchitaca cambajman tigrachihuayari, ñucanchica tigraripashunllamari. Ñucanchi punllacunataca, callaripishnallata mushujyachipairi.

²²Ñucanchitaca shitashpami saquishcangui. Ñucanchihuanga ninandapachami fiñarishcangui.