Read Imbabura Highland Quichua EZEQUIEL 1 Bible Online

EZEQUIEL 1 - Imbabura Highland Quichua bible

EZEQUIEL 1

¹Quimsa chunga huata, chuscu quilla, picha punllapimi ñucaca, prezu apai tucushca puracunahuan, Quebar shuti jatun yacu manñapi carcani. Chaipimi cashna tucurca: Jahua pacha pascarijpimi, muscuicunapishna Taita Dios imatalla ricuchishcata ricujurcani.

²Jatun mandaj Joaquín shuti runata prezu apamushcamandaca, picha huata picha punllami tucurca.

³Chai huatapimi Mandaj Diosca, Buzi shuti runapaj churi, Ezequiel curaman, caldeocunapaj llactapi tiaj Quebar shuti jatun yacu manñapi, cai shimicunata rimarca. Chaipimi Mandaj Diosca, ñuca jahuapi paipaj maquita churahuarca.

⁴Ñucaca, jahua ladomanda ninan huairahuan tamia shamujujtapash, ashtaca fuyupi nina pillurimujujtapashmi ñapash ricurcani. Chai fuyu muyundipica, punchapambami ricurirca. Shinallata nina chaupipica, bronceshnalla rijchaj punchapambami ricurirca.

⁵Chai fuyu chaupipica, causaita charijcunami chuscu ricurirca. Paicunaca cashnami ricurirca: Paicunaca, runaman rijchajcunami carca.

⁶Tucuillami chuscu ñavita, chuscu alasta charirca.

⁷Paicunapaj chaquica, na vishtuchu carca. Paicunapaj chaqui ucucunapash, shicupaj chaquishna, llambulla bronceshnami punchapamba carca.

⁸Paicunapaj alas ucupica, chuscundi ladomanmi, gente maquita charirca. Ñavitapash, alastapash, chuscundi ladomanmi charirca.

⁹Caishujpaj, chaishujpaj alascunahuanmi tuparinajurca. Paicunaca, puritapash maimambash na tigrarishpami purinajurca. Paicunaca tucuillami, na quingushpa ñaupajmanlla purinajurca.

¹⁰Paicunapaj ñavica, runapaj ñavishnami carca. Chai chuscundipaj ali ladopica, leonbaj ñavishnami carca. Chai chuscundipaj lluqui ladopica, huagrapaj ñavishnami carca. Shinallata chai chuscundipillatami, jatun angapaj ñavishnapash carca.

¹¹Paicunapaj ñavica, chashnami carca. Paicunapaj ishcandi alastaca, jahuata chutashcami carca. Chai alashuanmi, caishujhuan chaishujhuan tuparinajurca. Caishuj ishcai alascunahuanga, paicunapaj cuerpotami quilpashca carca.

¹²Tucuicunallatami na quingushpa ñaupajmanlla ricushpa purinajurca. Paicunaca, maijan ladoman espíritu pushajpi purinajushpapash, na tigrarishpami purinajurca.

¹³Causaita charijcunaca, carbonda japichishca ninashna rijchajmi ricurijurca. Michunda japichishca rupajunshnami, causaita charij puracunahuanga, caiman chaiman purinajurca. Chai ninaca, ninandami punchayachijurca. Chai ninamandaca, punchalla shitajujmi ricurijurca.

¹⁴Causaita charijcunaca, punchapamba shitamunshnami calpashpa, cutin tigranajurca.

¹⁵Causaita charijcunata ñuca ricujujpillatami, chai causaita charijcunapaj ladopica, ruedacuna alpa jahuapi chuscundi ladoman ñapash ricurirca.

¹⁶Chai ruedacunaca, crisólito nishca rumi colorman rijchajta rurashcami ricurijurca. Chai ruedacunaca, chuscundimi chashnallata carca. Chai ruedacunaca, chaupi ruedapi shuj ruedata quinraiman churashpa rurashcashnami ricurijurca.

¹⁷Chai ruedacuna purishpaca, chuscundi ladomanmi purinajurca. Shina purijushpapash, na tigrarishpami purinajurca.

¹⁸Chai rueda arocunaca, jatunguna, manllanayaicunami carca. Chuscundi ruedamanmi, muyundipi ñavicuna junda carca.

¹⁹Causaita charijcuna purijpica, ruedacunapash paicunahuanmi purinajurca. Causaita charijcuna alpamanda jahuata jatarijpica, chai ruedacunapashmi jahuata jatarinajurca.

²⁰Maiman richun espíritu pushajpipash rircallami. Maiman richun espíritu pushajpipash, chai ruedacunapash catishpa rircallami. Causaita charijcunapi tiaj espiritullatami, ruedacunapipash carca.

²¹Chaimandami causaita charijcuna purijpica, ruedacunapash purinajurca. Paicuna shayarijpica, ruedacunapashmi shayarirca. Shinallata paicuna alpamanda jahuata jatarijpica, ruedacunapash paicunata catishpa jatarircallami. Causaita charijcunapi tiaj espiritullatami, ruedacunapipash carca.

²²Causaita charijcunapaj umapica, juyailla cristalshnalla rijchaj shicanyachijujmi ricurirca. Chaica, paicunapaj uma jahuapimi chutashca tiajurca.

²³Chai shicanyachijuj ucupica, paicunapaj alastaca caishujhuan chaishujhuan tuparingacamanmi ali chutashca carca. Shinallata tucuicunallatami, ishcai alascunahuan paicunapaj cuerpota quilpashca carca.

²⁴Paicuna purijpica, paicunapaj alascuna huacashcapash, ashtaca yacu huacajunshna, Tucuita Rurai Ushaj Dios rimajunshna, ashtaca runacuna purinajunshna, soldadocuna purinajunshnami uyarijurca. Paicuna shayarishpaca, uraimanmi alascunataca huarcunajurca.

²⁵Paicuna shayarishpa alasta urai huarcujpica, paicunapaj uma jahuapi shicanyachijujmanda rimashca uyarircallami.

²⁶Chai shicanyachijuj jahuapica, mandangapaj tiarinatami, zafiro nishca rumitashna rurashca tiajujta ricurcani. Chai tiarinapica, runaman rijchaj tiajujmi ricurirca.

²⁷Chai runaman rijchajca, punchapamba bronceshnami ricurirca. Paipaj chaupipipash, paipaj muyundipipash, punchapamba ninashnami rupajurca. Cinturasmanda vichaimambash, cinturasmanda uraimambash, ninashna muyundi punchapamba cajtami ricurcani.

²⁸Imashnami tamia punllacuna, fuyupi cuichij ricurin, chashnami chai punchapambapash muyundi ricurirca. Mandaj Diospaj punchapambaguman rijchajta, muscuipishna ñuca ricushcacunaca, chaipachami carca. Chaita ricushpami, cungurishpa alpaman chayajta cumurircani. Chaipimi, shuj rimashpa parlajta uyarcani.