Read Imbabura Highland Quichua EZEQUIEL 10 Bible Online

EZEQUIEL 10 - Imbabura Highland Quichua bible

EZEQUIEL 10

¹Querubín nishcacunapaj uma jahuapi shicanyachijuj pushtupica, zafiro nishca rumitashnallami ricurcani. Chai jahuapi ricurijujca, mandangapaj tiarinaman rijchajmi carca.

²Lino churajunata churajushca runataca, cashnami nirca: “Querubingunapaj ucupi tiajuj rueda chaupiman yaicui. Chai querubingunapaj chaupipi rupajuj carbón ninayashcata maqui jundata japishpa, pueblo jahuapi chafsishpa shitai” nijpimi, chai runaca ñuca ricujta yaicurca.

³Chai runa yaicujujpica, querubingunaca chai huasi ali ladomanmi carca. Shinallata chai huasi ucu patiopica, fuyumi jundajurca.

⁴Shinamandami Mandaj Diospaj punchapambaguca, querubinbaj jahuamanda anchurishpa, pungu umbralman rirca. Chai huasipica, fuyu jundami carca. Shinallata patiopash, Mandaj Diospaj punchapamba punchayachijujhuanmi jundarca.

⁵Chai querubingunapaj alascuna culun nishcapash, Tucuita Rurai Ushaj Dios caparishpa rimashcashnami, canlla patiocaman shinllipacha uyarirca.

⁶Chaipimi, cashna tucurca: Lino churajunata churajushca runataca: “Querubingunapaj rueda chaupimanda ninata japi” nishpa cachajpimi, ninata japingapaj yaicushpa, rueda chaupipi shayarirca.

⁷Chai querubingunapaj chaupimanda shuj querubinga, paicunapaj chaupipi tiaj ninata japishpami, lino churajunata churajushca runapaj maquipi churarca. Chai runaca, ninata japishpami, llujshishpa rirca.

⁸Querubingunapaj alas ucupica, runapaj maquishnallami ricurirca.

⁹Querubingunapaj ladopica, chuscu ruedatapashmi ñapash ricurcani. Tucui querubinbaj ladopimi, shuj ruedahuan carca. Chai ruedacunaca, crisólito nishca rumiman rijchajmi carca.

¹⁰Chai ruedacunaca chuscundimi, chashnallata carca. Chai rueda ucupillata, shuj ruedata quinraiman churashcashnallami carca.

¹¹Chai ruedacuna purishpaca, chuscundi ladomanmi rin carca. Maijan ladoman ringapajpash, na tigrarinllu carca. Ashtahuangarin punda rueda maiman rijpipash, caishuj ruedacunapash catinajurcallami. Maijan ladoman rijushpapash, na tigrarinllu carca.

¹²Chai querubingunapaj tucui cuerpopipash, huashapipash, maquipipash, alascunapipash, ruedacunapipash, ñavicunalla jundami carca. Chuscundi ruedacunapimi, chashnallata carca.

¹³Chai ruedacunataca, ñuca uyajtami: “¡Rueda!” nishpa caparirca.

¹⁴Chai querubingunaca, tucuicunami chuscu ñavita charirca. Shuj lado ñavica, querubinbaj ñavimi carca. Caishuj ladopica, runapaj ñavimi carca. Caishuj ladopica, leonbaj ñavimi carca. Caishuj ladopica, jatun angapaj ñavimi carca.

¹⁵Chai querubingunaca jatarircallami. Chaicunaca, Quebar shuti jatun yacu manñapi ñuca ricushca, causaita charijcunallatami carca.

¹⁶Chai querubinguna purijpica, ruedacunapash paicunahuanmi purinajurca. Shinallata chai querubinguna, alpamanda jahuata jataringapaj paicunapaj alasta pascajpica, ruedacunapash paicunamandaca na anchurircachu.

¹⁷Paicuna shayarijpica, ruedacunapash shayarinllami carca. Paicuna jahuata jatarijpica, ruedacunapash paicunahuanmi jahuata jatarinajurca. Chai causaita charijcunapaj espiritullatami, ruedacunapipash carca.

¹⁸Chai jipami, Mandaj Diospaj punchapambaguca, huasi umbral jahuamanda jatarishpa, querubingunapaj jahuapi tiarirca.

¹⁹Ñuca ricujtami querubingunaca, alascunahuan jahuata jatarishpa, alpamanda rinajurca. Paicuna jahuata jatarishpa rijpica, ruedacunapash jatarishpami, paicunahuan rinajurca. Paicunaca, indi llujshimuj ladota yaicuna, Mandaj Diospaj huasi pungupimi shayarinajurca. Shinallata israelcunapaj Taita Diospaj punchapambaguca, paicunapaj jahuapimi carca.

²⁰Chaicunaca, Quebar shuti jatun yacu manñapi israelcunapaj Taita Dios tiajuj ucupi ñuca ricushca causaita charijcunallatami carca. Chaimandami, querubingunallata cajta rijsircani.

²¹Tucuicunallatami chuscu ñavita, chuscu alasta charirca. Shinallata paicunapaj alas ucupica, runapaj maquiman rijchajmi carca.

²²Paicunapaj ñavicuna, cuerpocunaca, Quebar shuti jatun yacu manñapi ñuca ricushcashnallatami carca. Tucuicunallatami, maiman rishpapash na quingushpa, ñaupajmanlla ricushpa purinajurca.