Read Imbabura Highland Quichua EZEQUIEL 12 Bible Online

EZEQUIEL 12 - Imbabura Highland Quichua bible

EZEQUIEL 12

¹Mandaj Diosca cai shimicunatami, cashna nishpa villahuarca:

²“Huañuna aichayu runa, canga na cazujcunapaj chaupipimi causajungui. Paicunaca, na cazujcuna cashpami, ñavita charishpapash na ricunajun. Rinrita charishpapash, na uyanajunllu.

³Shina cashcamanda, huañuna aichayu runa. Canga, apashpa rinata ucha quipishpa, paicuna ricunajujpillata punlla llujshishpa ringui. Can maipi causajushcamandaca, shuj ladoman paicuna ricujta yalingui. Chaita ricushpaca cazungapashchari. Paicunaca, na cazujcunami.

⁴Can imatalla charishcataca, prezu apai tucushpa apana quipitashna paicuna ricujta punlla llujchingui. Ashtahuangarin canga, prezu apai tucunshna, paicuna ricujta chishi llujshingui.

⁵Paicuna ricujta, patata utujushpa ñanda rurashpa chaita llujshingui.

⁶Imatalla apanataca rigrapi churashpa, paicuna ricujta apashpa, tuta llujchingui. Cambaj ñavitapash quilparingui, chai llactataca ama ricunguichu. Israelcunata, llaquichinata ricuchij cachunmi, candaca churarcani” nihuarcami.

⁷Ñucaca, pai mandashcashnallatami rurarcani. Prezu apai tucushpa apana quipitashnami, punlla llujchircani. Chishica, ñuca maquihuambacha patata utujushpami, ñanda rurarcani. Chai jipaca, paicuna ricujtami, quipita rigrapi churashpa, tuta llujshircani.

⁸Cayandi tutamandatami Mandaj Diosca, cai shimicunata cashna nishpa villahuarca:

⁹“Huañuna aichayu runa, chai na cazuj israelcunaca: ¿Nachu: ‘¿Imata rurajungui?’ nishpa tapurca?

¹⁰Paicunataca cashna ningui: Mandaj Diosca cashnami nin: ‘Cai villanaca, Jerusalenda mandajpash, chaipi causanajuj tucui israelcunapash, imalla tucunatami ricuchijun’ ningui.

¹¹Shinallata ñucapachami, canguna imalla tucunataca ricuchijuni. Imashnami ñuca rurarcani, chashnallatami cangunapash tucunguichi. Cangunaca, huatashcashnami prezu apai tucunguichi.

¹²Paicunata mandajtapash rigra jahuapi churashpami, tuta llujchishpa apanajunga. Patata ñanda rurashpami, paitaca llujchinajunga. Chashna apajpimi, llactata ama ricungapaca, paipaj ñavitapacha quilparinga.

¹³Ashtahuangarin ñuca linllita paipaj jahuapi shitajpimi, ñuca tugllapi prezu urmanga. Shinamandami, caldeocuna causanajuj Babilonia llactaman apachun saquisha. Shina apajpimi cai llactata na ricushpa, chaipi huañunga.

¹⁴Paita ayudangapaj muyundi tucuilla shayanajuj gentecunataca, paipaj tucui soldadocunandimi, huairapi cachanshna caita chaita cachasha. Paicunataca espadahuanmi catisha.

¹⁵Tucui cai pachapi tiaj llactacunapi causajcunapajman, caita chaita maitapash cachajpimi ñucataca, Mandaj Dios cajta yachanajunga.

¹⁶Paicuna puramandaca huaquingunatallami, espadahuan, yarjaihuan, ung:uihuan huañunamanda quishpichisha. Maijan llactaman paicuna chayashpapash, tucui millanayaita paicuna ruranajushcata villanajuchunmi, chashna quishpichisha. Shina villajpimi ñucataca, Mandaj Dios cajta yachanajunga” nihuarcami.

¹⁷Mandaj Diosca, cai shimicunatami cashna nishpa villahuarca:

¹⁸“Huañuna aichayu runa. Cambaj micunataca, manllaihuan chujchushpa micuyari. Yacutapash, ninan munaihuan cashpapash, llaqui llaquilla ufiayari.

¹⁹Chai jipaca, Israel llactapi causajcunataca, cashna ningui: Mandaj Jatun Diosca, Jerusalenbi causajcunatapash, israelcunatapash cashnami nin: ‘Paicunaca, micunatapash manllaihuanmi micunajunga, yacutapash manllaihuanmi ufianajunga. Chaipi tucui causajcuna nalita rurashcamanda, paicunapaj llactamandaca tucui ima charishcacunatapash quichujpimi, chushajpacha tucunga.

²⁰Pueblocunapash jichushcami tucunga, alpacunapash llaquinayaitami tucuchi tucunga. Shina rurajpimi ñucataca, Mandaj Dios cajta yachanajunga’ nishpa villai” nihuarcami.

²¹Mandaj Diosca, cai shimicunatami cashna nishpa villahuarca:

²²“Huañuna aichayu runa. ¿Imata yarichijuj shimicunata charishpata, Israel llactapica: ‘Punllacunaca na ucha chayamunllu, muscuipishna ricushcacunapash chinganllami’ ninajunguichi?

²³Shinamanda paicunataca, cashna ningui: Mandaj Jatun Diosca, cashnami nin: ‘Cai yarichijuj shimicunataca, chingachishami. Cai yarichijuj shimicunataca, Israel llactapica na ashtahuan rimanajungachu. Chai punllacunaca ñamari chayamushca, muscuipishna ricushcapash tucuimi pactamushca.

²⁴Israel purapica, ima yangacunata muscuipishna ricunapash, yacharcanimi nishpa uyanayaita llullashpa parlanapash na ashtahuan tiangachu.

²⁵Mandaj Dios ñucami rimasha. Ñuca rimashca shimicunaca pactangami. Na ashtahuan unayangachu, canguna causajui punllacunapillatami pactanga. Na cazujcunalla, ñuca rimashca shimicunaca pactangapachami’ ninmi Mandaj Jatun Diosca, nishpa villai” nihuarcami.

²⁶Mandaj Diosca, cai shimicunatami cashna nishpa villahuarca:

²⁷“Huañuna aichayu runa. Ricui candaca, israelcunaca cashnami ninajun: ‘Muscuipishna ricushpa cai runa villashcacunaca, cunanmanda ashtaca punllacuna jipami pactanga. Paica, jipa huatacunapi pactanatami villajun’ ninajunmi.

²⁸Shina nijcunataca, cashna ni: Mandaj Jatun Diosca, cashnami nin: ‘Ñuca imatalla rimashca shimicunamandaca, na ashtahuan unayangachu. Ashtahuangarin imatalla ñuca rimashca shimicunaca pactangapachami’ ninmi Mandaj Jatun Diosca ni” nihuarcami.