Read Imbabura Highland Quichua EZEQUIEL 14 Bible Online

EZEQUIEL 14 - Imbabura Highland Quichua bible

EZEQUIEL 14

¹Israelcunata mandaj huaquin rucucunami, ñucapajman shamushpa, ñuca ñaupajpi tiarinajurca.

²Chaipimi Mandaj Diosca, cai shimicunata cashna nishpa villahuarca:

³“Huañuna aichayu runa, cai runacunaca paicunapaj yanga dioscunatami paicunapaj shungupi charin. Shinamandami jatun nalita rurashpa nitijanshna pandanatara, paicunapaj ñaupajpi churashca. Chashna rurajcunaca, ñucata tapungapaj shamuchunga, ¿maitata saquishayari?

⁴Shinamanda, paicunaman cashna nishpa villangui: Mandaj Jatun Diosca, cashnami nin: ‘Israel puramanda maijan runapash, paipaj yanga dioscunata paipaj shungupi charingapashchari. Shinallata jatun nalita rurashpa nitijanshna pandanatara, paipaj ñaupajpi churashpa callaringapashchari. Shina cashpata, ñuca ima nishcata villajta tapungapaj shamujpica, chai shamuj runataca, Mandaj Dios ñucami, paicunapaj yanga dioscunata imashna paicuna ashtacata charishcashnallata tigrachisha’ ninmi.

⁵Israelcunataca, paicunapaj shungupi yarishcata japingapajmi, chashna tigrachisha. Paicunallatami, paicunapaj yanga dioscunamandalla, ñucamandaca tucuicuna anchurirca.

⁶Shina cashcamanda israelcunataca, cashna ningui: Mandaj Jatun Diosca, cashnami nin: ‘Cangunapaj yanga dioscunata saquishpa, ñucapajman tigrarimuichi. Chai tucui millanayaicunata canguna rurashcataca, na ashtahuan ricunachu canguichi.

⁷Maijan runapash Israel purallata cashpapash, shuj llactamanda shamushpa Israel llactapi causajushpapash, ñucamanda anchurishpaca, paipaj yanga dioscunata paipaj shungupi charingapashchari. Shinallata jatun nalita rurashpa, paipaj ñaupajpi nitijanshna pandatara churashpa callaringapashchari. Shina cashpata ñuca ima nishcata villaj runata imatapash ñucamanda tapungapaj shamujpica, Mandaj Dios ñucallatami tigrachisha.

⁸Chai runataca fiñashpa ricushpami, ñuca agllashca puracunapaj chaupimanda anchuchisha. Chashna rurashcataca, shujcunaman ricuchij cachun, chaita ricushpa yarina cachunmi churasha. Shina rurajpimi ñucataca, Mandaj Dios cajta yachanguichi.

⁹Villaj runa umachishpa villajujpica, Mandaj Dios ñucallatami umachishpa villachircani. Paitaca, ñuca maquita chutashpami, ñuca agllashca israelcunapaj ñaupajmanda tucuchisha.

¹⁰Ima tucunata tapuj runapash, villaj runapash nalita rurashcamandaca, chashnami ishcandillata llaquichi tucunga.

¹¹Israelcunataca, ama ñucamanda ashtahuan anchurishpa, ama ashtahuan na cazushpa mapayachunmi, chashna llaquichisha. Paicunaca, ñuca agllashcacunami canga, ñucapash paicunapaca Taita Diosmi casha’ ninmi ningui” nihuarcami Mandaj Jatun Diosca.

¹²Mandaj Diosca, cai shimicunatami cashna nishpa villahuarca:

¹³“Huañuna aichayu runa. Cai llactapi causajcuna ñucata jariyashpa, ninandapacha na cazushpa juchata rurajpica, ñucallatami maquita chutashpa llaquichisha. Micushpa shinlli tucunatapash tucuchishpami, yarjai punllacunata cachamusha. Runacunatapash, animalcunatapashmi, cai llactamandaca tucuchisha.

¹⁴Noé, Daniel, Job shuti cai quimsandi runacuna cai llactapi cashpaca, imatapash cashcatapacha rurajcuna cashcamandami, paicunalla quishpirinman. Mandaj Jatun Diosmi, chashna nini.

¹⁵Shinallata millai animalcunata cai llactaman cachamushpa llaquinayaita tucuchijpica, chai animalcunata manllashpa chaita pipash na yalijpimi, cai llactaca llaquinayaita jichushca sirinman.

¹⁶Shinallata chai quimsa runacuna, cai llacta chaupipi causashpapash, paicunapaj churicunatapash, ushicunatapash na quishpichi ushanmanllu. Ashtahuangarin paicunallami quishpirinman. Cai llactaca, llaquinayaitami jichushca sirinman. Causajujlla Mandaj Jatun Dios ñucami, shina nini.

¹⁷Na cashpaca, espadata cai llactaman apamushpami, cashna niman: ‘Espada, cai llactapi causanajuj gentecunatapash, animalcunatapash huañuchi’ nimanmi.

¹⁸Shina cachamujpica, chai quimsa runacuna cai llacta chaupipi causashpapash, paicunapaj churicunatapash, ushicunatapash na quishpichi ushanmanllu. Ashtahuangarin paicunallami quishpirinman. Causajujlla Mandaj Jatun Dios ñucami, chashna nini.

¹⁹Na cashpaca, chai llactapi causajcunaman ninan ung:uita cachamushpami, gentecunatapash, animalcunatapash huañuchishpa tucuchingapaj ñuca ninanda fiñarishcata talinshna paicunapaj jahuapi cachamuiman.

²⁰Shina cachamujpica, Noé, Daniel, Job shuti runacuna chaipi cashpapash, chaipi causajcunapaj churitapash, ushitapash na quishpichi ushanmanllu. Ashtahuangarin imatapash cashcatapacha rurajcuna cashcamandami, paicunapaj causaitalla quishpichi ushanman” ninmi causajujlla Mandaj Jatun Diosca.

²¹Chaimandami Mandaj Jatun Diosca, cashna nin: “Jerusalenbi causajcunata llaquichingapaca, chaitapash yali ashtahuan manllanayai chuscu jatun llaquicunatami cachamusha. Chai pueblopi causanajuj gentecunata, animalcunata tucuchingapaca espadatapash, yarjaitapash, millai animalcunatapash, ninan ung:uicunatapashmi cachamusha.

²²Shina llaquichijpipash, chai pueblopica churicuna, ushicunami huaquingunalla puchunga. Shina cajpipash, paicunataca llujchishpami apanga. Ricuichi, paicunami cangunapajman shamunga. Chaipimi, paicuna imashna causashcatapash, imata rurashcatapash ricunguichi. Chaita ricushpami, Jerusalenbi causajcunata ñuca imashnalla llaquichishcamandaca cushijunguichi.

²³Paicuna imashna causashcata, imata rurashcata ricushpami cushijunguichi. Shina rurashcata ricushpami, chai pueblopi causajcunataca na yangamanda llaquichishcata yachanguichi” ninmi Mandaj Jatun Diosca.