Read Imbabura Highland Quichua EZEQUIEL 18 Bible Online

EZEQUIEL 18 - Imbabura Highland Quichua bible

EZEQUIEL 18

¹Mandaj Diosca, cai shimicunata cashna nishpa villahuarca:

²“Israel llactapi, cai yarichij shimicunata parlajcunaca, ¿imatata yanguichi? Chai shimicunaca, cashnami nijun: ‘Jayaj uvasta taitacuna micushcamandami, churicunapaj quiruta nanachinshna tucun’ nijunmi.

³Mandaj Jatun Dios ñucaca, causajunipachami ninimi. Israel llactapica, cai yarichij shimicunataca, cutinga na ashtahuan rimanachu canguichi.

⁴Ricuichi, tucuicunapaj almami ñucapaj. Taitapaj almapash, churipaj almapash ñucapajmi. Maijanmi juchata ruran, chaipaj almami huañunga.

⁵Maijan runapash, imatapash cashcatapacha ruraj cashpa, imata cashpapash ali cajta ricushpa, imatapash cashcatapacha rurashpaca, causangapachami.

⁶Lomacunapi tiaj altar ladocunapipash na micushpa, israelcunapaj yanga dioscunatapash na mañashpa, shujpaj huarmitapash munai na munai huaglichishpa, quilla nanai pactajpi nanaihuan huarmitapash na tacarishpaca causangapachami.

⁷Pitapash na llaquichishpa charij, divimanda prendashcatapash tigrachishpa, na shuhuashpa, yarjaihuan tiajcunamambash carashpa, churajuna illajcunamambash churachishpaca, causangapachami.

⁸Culquita mañachishpa mirashcata na japishpa, chai mama culqui mirashcamandapash yalishpa na japishpa, nalita ruranamandapash anchurishpa, runacuna fiñanajujpipash, chimbapurashpa aliguta ricushpa alichishpaca causangapachami.

⁹Ñuca mandashcacunatami pactachishpa causanga. Imatapash cashcatapacha rurangapaca, imata rurachun ñuca mandashca shimicunatami cazunga. Paimi, imatapash cashcatapacha ruraj canga. Paimi causanga. Mandaj Jatun Dios ñucami, chashna nini.

¹⁰Ashtahuangarin maijan runaca, shuhua churita, huañuchij churita, na cashpaca cai tucui nalicunamandaca huaquin nalitallapash ruraj churitami charinga.

¹¹Caishuj nalicunata na rurashpapash, lomacunapi tiaj altar ladocunapica micujungami. Na cashpaca, shujpaj huarmitami munai na munai huaglichinga.

¹²Imagutapash na charij runatapash, imagupash illaj runatapashmi llaquichishpalla charinga. Shuhuapashmi canga, prendashcatapash na tigrachingachu. Yanga dioscunatapashmi mañanga, ima millanayaitapashmi ruranga.

¹³Culquita mañachishpa mirashcatapashmi japinga. Chai mama culqui mirashcamandapash yalishpami japinga. Chashna runaca, ¿causangachu imashi? Na, paica na causangachu. Paica, chai tucui millanayaita rurajushcamandaca huañungapachami, paipaj yahuarca paipaj jahuallatami canga.

¹⁴Ashtahuangarin chai runaca, tucui juchacunata paipaj taita rurashcata ricushpapash, paica chaitaca na ruraj churitami charinga.

¹⁵Lomacunapi tiaj altar ladocunapipash na micungachu, israelcunapaj yanga dioscunatapash ricuitapash na ricungachu, shujpaj huarmitapash munai na munai huaglichingachu.

¹⁶Pitapash na llaquichishpalla charingachu, imata mañachishpapash prendataca na japingachu, na shuhuangachu, yarjachijmambash pai micunatami caranga, lluchulla tiajujmambash churajunata churachijmi canga.

¹⁷Imagutapash na charijtapash na llaquichingachu, culquita mañachishpa mirashcatapash na japingachu. Chai mama culqui mirashcamandapash, na yalishpa japingachu. Ñuca escribichishca shimicunatapash pactachishpa, imata rurachun ñuca mandashcacunata cazushpa causaj runami canga. Shina cashpaca, paipaj taita nalita rurajushcamandaca na huañungachu, ashtahuangarin causangapachami.

¹⁸Paipaj taitaca, llaquichij cashcamanda, shujpaj ima charishcatapash munai na munai quichuj cashcamanda, paipaj rijsij gentecunapash ricujta imatapash nalita ruran cashcamandami huañunga. Ricuichi, paica paillata nalita rurajushcamandaca huañungapachami.

¹⁹Cangunaca: ‘¿Imashpashi churica, paipaj taitapaj juchamandaca, na llaquita apan?’ ninguichipashchari. Paipaj churica imapash aligutalla, imatapash cashcatapachami rurarca. Pactachinajuchun ñuca cushca shimicunatapash, tucuita cazushpami pactachirca. Shina rurashcamandaca, causangapachami.

²⁰Maijanmi juchata ruran, chaipaj almami huañunga. Churica, paipaj taitapaj juchamandaca, na llaquita apangachu. Shinallata taitapash, paipaj churipaj juchamandaca, na llaquita apangachu. Imatapash cashcatapacha ruraj runaca, alitami japinga. Ashtahuangarin ñucata na manllaj runaca, ñucata na manllashcamandami llaquita japinga.

²¹Ashtahuangarin ñucata na manllaj runa, tucui juchacunata pai rurajushcamanda anchurishpa, pactachinajuchun ñuca cushca shimicunata cazushpa, imata cashpapash aliguta rurashpa, imatapash cashcatapacha rurashpaca causangapachami, na huañungachu.

²²Pai ñucata na cazushcacunataca, na yarishachu. Ashtahuangarin pai imatapash cashcatapacha rurashcamandami causanga.

²³Mandaj Jatun Dios ñucaca, cashnami nini: ¿Ñucata na manllaj runa huañuchun munanichu? ¿Nachu pai nalita rurashpa causajushcata saquishpaca causanga?

²⁴Ashtahuangarin imatapash cashcatapacha ruraj runaca, imatapash cashcatapacha ruranata saquishpa, jatun nalita rurashpa Diosta na manllaj runashnallata, imatapash millanayaita rurajushpaca, ¿paica causangachu imashi? Imatapash cashcatapacha pai rurashcataca, napacha yarishachu. Ashtahuangarin yachashpata ñucata na cazushpa pai juchata rurashpaca, chai juchata rurashcamandami huañunga.

²⁵Shina cashcamanda cangunaca: ‘Jatun Diosta cazushpa causanaca nalichu’ ninguichipashchari. Israelcuna, cangunaca caita ali uyahuaichi: Ñucata catishpa causanaca, ¿nachu nali? ¿Nachu canguna nalita rurashpa causashca nali?

²⁶Imatapash cashcatapacha ruraj runaca, imatapash cashcatapacha ruranata saquishpa nalita rurashpaca, paica huañungami. Nalita pai rurashcamandami huañunga.

²⁷Shinallata ñucata na manllaj runa ñucata na manllashpa juchata ruranata saquishpa, imatapash alita rurashpa, imatapash cashcatapacha rurajujpica, paipaj almaca causangami.

²⁸Tucui nalicunata rurajushcata paillata ricushpa chaicunata saquishpa anchurishpaca causangapachami, na huañungachu.

²⁹Shina cajpipash israelcunalla, cangunaca: ‘Jatun Diosta cazushpa causanaca nalichu’ ninguichirami. Israelcuna, ñucata cazushpa causanaca, ¿nachu nali? Ashtahuangarin canguna nalita rurashpa causashcami nali” nihuarcami.

³⁰Shina cashcamanda Mandaj Jatun Diosca, cashnami nin: “Israelcunalla, canguna nalita rurashpa causashcashnallatami, ñucaca tucuicunata llaquichisha. Canguna ñucata na cazushpa causanata saquishpa tigrarimuichi. Shina tigrarimujpica, canguna nalita rurashcapash, na llaquipi churangachu.

³¹Canguna na cazushpa tucui juchata rurashcataca shitanami canguichi. Cangunaca shungutapash, yuyaitapash mushujta ruraichi. Israelcunalla, ¿imashpashi huañunguichi?” ninmi.

³²Mandaj Jatun Diosca, cashnatapashmi nin: “Huañunapacha cajtaca, na huañuchun munanichu. Shina cajpica, nalita ruranata saquishpa tigrarichi. Chashna tigrarishpaca causanguichimi.